نامه غلاطیَه کلیسارا 1 - کتاب مقدس به زبان تالشی شمالی1 پولسی طرفی کا، رسولی که چَیی رسالت نِه اِنسانون طَرفی کا و نِه اِنسانی واسطه نَه بَه، بَلکَم عیسایِ مسیح و خِدای دَده، واسطه نَه یَه که اَیی مَردَه اون دیلَه کا زِنده آکَردِشه، 2 و هِنتَه نی گِردِ بِرااونی که مِنه اینه، غَلاطیه کلیسا اوون را: 3 فیض و صُلح و سلامتی خِدا طرفی کا چَمَه دَده، و خِداوند عیسایِ مسیح طرفی کا شِمَه را با، 4 که اِشتَن جانی چَمَه گناه اون راه کا آدوشَه، تا اَمَه، خِدا اِراده نَه و چَمَه دَده، اِم شَرَه دورانی کا رهایی بِدَه. 5 تا اَبَد اَیی جلال بِبو. آمین. ایلَه دییَر اِنجیلی نییَه 6 از تعجب بَکَردیم که شِمَه اِنتَه اَلبَحَل اَ کسی کا که مسیح فیضی واسطه نَه شِمَه دعوت کَردَشه، آگَردَه ایرونه، و شِمَه دیمی ایلَه دییَر اِنجیلی طرفی را آگاردِنییَرونه. 7 البته که ایلَه دییَر اِنجیلی نییَه، امّا کَسونی اِستینه که شِمَه پریشون بَکَردین و پیستِشونَه که مسیح اِنجیلی کا دَس بِبَرِن. 8 امّا حتی اَگم اَمَه یا ایلَه ملائیکه آسِمونی نَه، اَ اِنجیلی غِیراز که اَمَه، شِمَه را اِعلام کَردَمونه موعظه بِکَرِه، لعنت بِبو! 9 هَتَه که پیشتری واتِمونه، حِسَه هَنی بَواتیم: اَگم کسی ایلَه اِنجیلی، اَ چیی غِیراز که قبول کَردَرونه شِمَه را موعظه بِکَرِه، لعنت بِبو! 10 یعنی حِسَه از مردمی تائیدی دومله کاایمَه یا خِدا تائید؟ یا تَقَّلا بَکَردیم که مردمی راضی آکَرِم؟ اَگم هِنتَه مردمی راضی آکَردِه دومله کا بیمَه، مَسیح خادم نِبیم. پولس اِشتَن خدمتی کا دفاع بَکَردی 11 اِی بِرااِن، پیستِمَه بِزونَه اِنجیلی که اَز اَیی اِعلام کَردَمَه، اِنسانی یَه اِنجیل نییَه، 12 چوم اَز اَیی هیچ اِنسانی کا ویگِتَه نیمَه، و کسی نی اَیی مِن آموتَه نیشَه؛ بَلکَم عیسایِ مسیح اَیی بَه مِرا آشکار آکَردِشَه. 13 چوم که شِمَه چِمِن قدیمی یَه زِندگی تعریفی، اَ موقعی که از یَهودیی بیمَه دَرَسَرونه، که چِنتَه خِدا کلیسا اَذیت آزار بَکَردیم و تَقّلا بَکَردیم اَیی ویرونَه بِکَرِم. 14 و از یهودی گَری کا چِمِن هَم سِندسالون کا وِر نارتَر بیمَه، چِمِن مردمی دیلَه کا چَمَه دَده اون رسم و رسوماتی را وِر غیرت داریم. 15 ولی وختی اَ کسی که حتی چِمِن نَنه اِشکمی نَه مِن اِشتَن کاری را وقف کَردَش بَه و اِشتَن فیضی واسطه نَه مِن دعوت کَردِشه، چَیی خوشحالی اِمی کا بَه که، 16 اِشتَن زوعَه بَه مِن کا آشکار آکَرِه تا غیریهودیون دیلَه کا اَیی اِعلام بِکَرِم، اَ موقع از جسم و خونی نَه مشورت نِکَردِمه، 17 و اورشلیمی شهری را نی، نِشیمَه کَسونی وَر که چِمِن پیش رسول بینَه؛ بَلکَم عربستانی را رایی بیمَه و دومله آگَردِستیمَه دَمشق. 18 دومله سه سالی پَش، شیمَه اورشلیم تا کیفا بِوینِم، و پونزده روز چَیی وَری کا مَندیمَه. 19 ولی بقیه رسولون کا، خِداوند عیسی بِرا یعقوبی غیراز، دِ هیچکسی نِویندِمه. 20 خِدا حضوری کا شِمَه اِطمینان بَدایم اَ چیی که بَنیویشتیم دوروع نییَه. 21 چَیی پَش، شیمَه سوریه و کیلیکیه منطقه اون طرفی را. 22 یهودیَه ولایتی کلیسااِن که مسیح کا اِستینه، حَلا چِمِن قیافه آنِزونین. 23 اَوِن فقط دَرَسَشون بَه که بَواتین: «اَ مِردی که پیشتَر اَمَه اَذیت آزار بَکَردی، حِسَه هَ ایمانی موعظه بَکَردی که قبلا کَمر دَوستش بَه اَیی نابود آکَرِه.» 24 و اَوِن چِمِن واسی خِدا ستایش بَکَردین. |
@ 2024 Korpu Company