نامَه اَفسوسی کلیسارا 6 - کتاب مقدس به زبان تالشی شمالیدَده نَنه و خِردَنِن 1 اِی خِردَنِن، خِداوندی کا شِمَه دَده نَنه کا اِطاعت بِکَرَه، چوم کار دُرست اِمَه. 2 «شِمَه دَده نَنه حُرمت اِحترام بِنییَه»، که اِم اوّلین حُکم وعدَه نَه یَه: 3 «تا خوشبخت بِبی و زمینی کا درازَ عمر بِداری.» 4 اِی دَده اِن، شِمَه خِردَنون عصبانی مَکَرَه، بَلکَم اَوون خِداوندی تعلیم و تربیتی نَه یال آکَرَه. نوکَرِن و اَربابِن 5 اِی نوکَرِن، شِمَه زمینی یَه اَربابون کا، ترس و لرزی نَه، و صِدق دیلی نَه، اِطاعت بِکَرَه، جوری که اِنگاری مسیح کا اِطاعت بَکَردیرون. 6 و اِم نی، نِه فقط اَ وختی که کارا شِمَه دَیِسِن، اَ کسونی شیوار که چِمی دومله اینه که آدَمی راضی آکَرِن، بَلکَم مسیح نوکرون شیوار که خِدا اِراده جان و دیلی نَه اَنجام بِدییَه. 7 چاکَه نیتی نَه خدمت بِکَرَه، جوری که اِنگاری خِداوندی خدمت بَکَردیرون نِه اِنسانی، 8 چوم بَزنیرون هَر کسی که چاکَه کار بِکَرِه، چَیی عوضی خِداوندی کا ویگِرِه، چِه نوکر بِبو، چِه آزاد. 9 اِی اَربابِن، شِمَه نوکَرون نَه هِنتَه رفتار بِکَرَه، و چَوون تهدید کَردِه کا دَس پِگِرَه، چوم بَزنیرون کسی که هَم شِمَه اَرباب و هَم چَوون اَربابَه، آسِمونی کایَه، و اَ هیچکسی را فرقی نِنَه. خِدا تَمام کمالَ اَسلحه 10 آخِرسَر خِداوندی کا و اَ قوّتی کا که چَیی قدرتی کا بومَی قوی بِبییَه. 11 خِدا اَسلحۀ تَمام کمال دَکَرَه تا بِشایَه اِبلیسی حُقّه اون پیشی کا بومونه. 12 چوم که چَمَه جنگ جسم و خونی نَه یعنی آدَمی نَه نییَه، بَلکَم اَمَه رئیسون ضِد، قدرتون ضِد، و اَ تاریکی نیرواون ضِد که اِم دنیا سَری کا حاکمی نَه، شَریری روحانی یَه قُشونی ضِد، که آسِمونی یَه جِگا اون کا اینه، بَجَنگِستیمون. 13 بَس خِدا اَسلحه تَمام کمال دَکَرَه، تا شَرّه روزی کا بِشایَه مقاومت بِکَرَه، و بِشایَه گِردِ چییون اَنجام بییَه پَش، پابَرجا بومونه. 14 بَس پابَرجا بومونه، هَتَه که حقیقتی کَمَردَوِندی دَوِندَه و شِمَه صالِحی یَه زِرِه دَکَرَه، 15 صُلح و سلامتی یَه اِنجیلی ایلَه کفشی شیوار دَکَرَه جوری که اِنگاری چَیی اِعلام کَردِه را آماده ایرونه. 16 هَر وضعی کا، ایمانی سِپَری پِگِرَه، تا بِشایَه اَیی نَه، اَ شریری گِردِ آتشینَ تیرون دَکِشه. 17 نجاتی کلاهخودی شِمَه سَری کا پِنَیَه و روح شمشیری که خِدا کلامَه، دَسی کا بِگِرَه. 18 و همیشه، هَمه جورَه دعا و مِنَتی نَه، خِدا روح کا دعا بِکَرَه و اِمی واسی آگا و هوشیار بِبییَه و همیشه مقاومتی نَه گِردِ مقدسون را دعا بِکَرَه. 19 بَه مِرا نی دعا بِکَرَه، تا هَر موقع که چِمِن گَ آکَرِم گف بِژَنِم، بَه مِن اَ کلامی قدرت آدوعَه بِبو تا اِنجیلی سِرّی دیل و جرئتی نَه اِعلام بِکَرم، 20 هَ اِنجیلی که چَیی سَفیریمَه، هَر چَن زِنجیری کا! دعا بِکَرَه که اَیی دیل و جرئتی نَه اِعلام بِکَرِم، هَتَه که چَیی شَئنی کایَه. آخِرسَر 21 اِمی واسی که چِمِن اَحوالاتی کا خَوَردار بِبییَه و بِزونَه چِه بَکَردیم، تیخیکوس که عزیزَه بِرا و خِداوندی وفادارَه خادِمَه، گِردِ چییون شِمَه را بَواتی. 22 اَز اَئی اِم هدفی نَه ویسا آکَرِم شِمَه وَر تا چَمَه اَحوالاتی کا خَوَردار بِبییَه، و تا اَ شِمَه دیلگرم آکَرِه. 23 خِدای دَده طرفی کا و عیسایِ مسیحِ خِداوندی طرفی کا، بِرااون را صُلح و سلامتی و محبت، ایمانی نَه بِبو. 24 چَیی فیض گِردِ کسونی نَه بِبو که چَمَه خِداوند عیسایِ مسیح نَه، اَ محبتی نَه خِشی نَه که از بِین نِشو. |
@ 2024 Korpu Company