نامَه اَفسوسی کلیسارا 5 - کتاب مقدس به زبان تالشی شمالی

محبتی نَه رفتار بِکَرَه

¹ بَس عزیزَه خِردَنون شیوار، خِدا کا سَرمشق بِگِرَه.

² و محبتی نَه رفتار بِکَرَه، هَتَه که مسیح اَمَه محبت کَردِشه و اِشتَن جانی چَمَه راه کا، ایلَه قِربونی و خوشبویَه هدیه‌ای شیوار خِدا تقدیم کَردِشه.

³ ولی شِمَه دیلَه کا بی عفتی یا هَرجورَه ناپاکی یا هَواهَوسی کا حتّی نَبی گفی بِه زَوون با، چوم اِمِن مقدّسون شئنی کا نینَه.

⁴ زِشتَه گَفِن و مِفتَه گَفِن و رَکیکَه گَفِن نی شِمَه دیلَه کا مَبو که شِمَه شئنی کا نییَه؛ چَوون عوض بَسی شُکر بِکَرَه.

⁵ چوم مطمئن بِبییَه که هیچ بی‌عفت یا ناپاک یا طمعکارَه آدَمی، که هَ بُت پرستِن بِبون، خِدا و مسیح پاُتشایی کا سهمی نیشونه.

⁶ مَرزَه کسی شِمَه مِفتَه گفون نَه گول بِژَنِه، چوم هِم چیوون واسی یَه که خِدا غَضَب چَوون سَر بومَی.

⁷ بَس اَوون نَه شریک مَبییَه.

⁸ چوم که شِمَه ایی زمانی تاریکی کا بیرونه، امّا حِسَه خِداوندْی کا نوری رونه. بَس نوری خِردَنون شیوار رفتار بِکَرَه.

⁹ چوم نوری ثمرۀ، هَرجورَه چاکی، راستی و درستی کا پیدا بَبی.

¹⁰ تَقَّلا بِکَرَه بِفهمَه که چِه چیی خِداوندی راضی بَکَردی.

¹¹ تاریکی بی فایدَه کارون کا شریک مَبییَه، بَلکَم اَوون بَرمَلا بِکَرَه.

¹² چوم حتّی بِه زَوون وَردِه اَ چیی که اَوِن نِینَکی بَکَردین، شرم آوَرَه.

¹³ امّا وختی هَر چیی که نوری نَه بَرملا بَبی، آشکار بَبی،

¹⁴ چوم هَر چیی آشکار بِبو نورَه. اِمی واسی واتَه بییَه که: «اِی تِه ایی که خِتیش، پِرِز، مَردَه اون دیلَه کا، زِندَه آبَش، و مسیح اِشتَن نوری بَه تِن دَتاوونه.»

¹⁵ بَس، شِمَه هَواس وِر جمع بِبو که چِنتَه رفتار بَکَردیرون، دانایون شیوار رفتار بِکَرَه نِه نادونون شیوار.

¹⁶ اِم وختی قَدری بِزونه، چوم اِم روزِن بَدَه روزونی اِستینه.

¹⁷ بَس نادون مَبییَه، بَلکَم بِفهمَه که خِداوندی اِراده چَه.

¹⁸ و شَراوی نَه مست آمَبییَه، که شِمَه کَشونِه بَدَه کارون طرفی را؛ بَلکَم خِدا روح کا پور آبییَه.

¹⁹ مزامیر و پرستشی یَه سرودون و آوازونی نَه که خِدا روح کایَه، یَندی نَه گف بِژَنَه و صِدق دیلی نَه خِداوندی را بوخونه و آهنگ وَج آکَرَه.

²⁰ همیشه خِدای دَده، چَمَه خِداوند عیسایِ مسیح نومی نَه، گِردِ چییون واسی شُکر بِکَرَه.

²¹ مسیح حُرمتی را، یَندی کا اِطاعت بِکَرَه.

²² اِی ژِنَکِن، شِمَه شواون کا اِطاعت بِکَرَه، هَتَه که خِداوندی کا اِطاعت بَکَردیرون.

²³ چوم که مِرد اِشتَن ژِنی سَرَه، هَتَه که مسیح کلیسا سَرَه، یعنی اِشتَنش بَدن، و اَ اِشتَن، کلیسا نجات دهنده یَه.

²⁴ بَس هَتَه که کلیسا مسیح کا اِطاعت بَکَردی، ژِنَکِن نی بَسی هَر چیی کا اِشتَن مِردَکون کا اِطاعت بِکَرِن.

²⁵ اِی مِردَکِن، شِمَه ژِنَکون نَه خِش بِبَیه، هَتَه که مسیح نی کلیسا نَه خِش بَه و اِشتَن جانی اَیی را فیدا کَردِشَه،

²⁶ تا اَیی خِدا کلامی آوی نَه پاک آکَرِه و اِنتَه کلیسا تقدیس بِکَرِه،

²⁷ تا کلیسا اَ شکوهی نَه که هِستِشَه بواَرِه اِشتَن وَر، بیدون هیچ لک و چین و چروکی یا هَر چیی دییَری، تا کلیسا مقدّس و بی‌عیب بِبو.

²⁸ اِمی واسی، مِردَکِن بَسی اِشتَن ژِنَکون نَه اِشتَن جانی شیوار خِش بِبون. اَ کسی که اِشتَن ژِنی نَه خِشَه، اِشتَن نَه خِشَه.

²⁹ چوم هرگز کسی اِشتَن جانی کا بیزار نییَه، بَلکَم اَیی غذا بَدای و چَیی ویرا بَبی، هَتَه که مسیح کلیسا کا مواظِبت بَکَردی؛

³⁰ چوم که اَمَه، چَیی بَدنی اَعضا ایمونه.

³¹ «اِمی واسی مِرد، اِشتَن دَده نَنه کا جِدا آبو، اِشتَن ژِنی دَچیکه، و اَ دِ نفر ایلَه بَدن آبون.»

³² اِم ایلَه بَرک یالَ سِرّی یَه- و اِمی که از بَواتیم مسیح و کلیسا درباره یَه.

³³ خُلاصه اِم که، هَر کمیله شِمَه کا نی بَسی اِشتَن ژِنی نَه اِشتَن جانی شیوار خِش بِبو، و ژِنی هَواس نی بَسی جمع بِبو که اِشتَن شو حُرمت اِحترام بِکَرِه.