نامَه اَفسوسی کلیسارا 4 - کتاب مقدس به زبان تالشی شمالیایلَه بییِه مسیح بَدنی دیلَه کا 1 بَس از که خِداوندی واسی زِندانی کا ایمَه، خواهیشت بَکَردیم که شِمَه اَ دَعوتی شئنی کا که شِمَه کا بییَه، رفتار بِکَرِه، 2 فروتنی و ملایمت کاملی نَه؛ و صبر و محبتی نَه یَندی تحمل بِکَرَه. 3 تَقَّلا بِکَرَه تا اَ ایلَه بییِه ای که خِدا روح کا یَه، صُلح و سلامتی کا غَم بَرَه. 4 هَتَه که ایلَه بَدن و ایلَه روح اِستَه، خِدا نی هَ موقع که شِمَه دعوت کَردِشَه ایلَه اُمید شِمَه آدوشَه 5 ایلَه خِداوند، ایلَه ایمان، ایلَه تعمید؛ 6 ایلَه خِدا و گِردی دَده که گِردی کا کفاتَرَه، گِردی دیلَه کا کار بَکَردی و گِردی دیلَه کایَه. 7 امّا هَر کمیله اَمَه را مسیح بَخشِشی قَدَر، فیض بَخشِستَه بییَه. 8 اِمی واسی مزموری کیتاب بَواتی که: «وختی که اَ عَرش بَرینی را شَه کَفا، ایی قَشون اَسیرون کا اِشتَن دومله بَردِشه، و اَ هدیه اون آدوشَه مَردمی.» 9 اِم گفی معنی که ’شَه کفا‘، چَه، اِمی غِیراز که زمینی پست تَرین جِگااون را جیر اومَه بَه؟ 10 اَ که اومَه جیر، هَ کسی یَه که گِردِ آسِمونون کا وِرتَر کفاتَر شَه، تا گِردِ چییون اِشتَن حضوری نَه پور آکَرِه. 11 و اَ بَه که رسولون آدوشَه، پیغمبرون، مبَشرون، شوونَه اون و معلّمون آدوشَه، 12 تا مقدّسون خِدمتی کاری را حاضیر آکَرِن، مسیح بَدنی بینا کَردِه واسی، 13 تا وختی که گِرد ایمانی کا ایلَه بِبییَم و هَتَه نی خِدا زوعَه آزونِستِه کا ایلَه بِبییَم و اِنتَه ایلَه کامِلَ اِنسانی قَدَر یال بِبییَم، تا آرَستَم مسیح بِلَندَه قامتی قَدَر. 14 بَس دِ خِردَنون شیوار نِبییَم که موجون نَه هَر طرفی را فِر آدوعَه بِبییَم و جور بَه جور تَعلیمون وا نَه و آدَمون مَکر و حیلَّۀ نَه اَ نخشه اونی کا که گمراهی را بَکَشتین، اَمَه اِم طرف و اَ طرفی را بِبَرِه. 15 بَلکَم حقیقتی واتِه محبتی نَه، هَر لحاظی کا چَیی قَدَر که سَر اِستَه، یعنی مسیح، رُشد بَکَردیمون. 16 چَیی دیلَه کایَه که گِردِ بَدَن، هَر مفصلی نَه که اَیی مربوطهَ چِفت و بَست بَبین و دَچیکِن، تا هَر عضوی درست کار بِکَرِه، بَدَن رُشد بَکَردی و اِشتَن محبتی کا بینا بَکَردی. تازَه زِندگی 17 حِسَه اِمی بَواتیم و خِداوندی کا هَنی بَواتیم که شِمَه رفتار دِ نَبی اَ قومونی شیوار بِبو که خِدا آنِزونِن، که اِشتَن بیخودَه فیکرون نَه رفتار بَکَردین. 18 چَوون عقل تاریک آبییَه، و نادونی واسی که چَوون دیل سِنگی نتیجه یَه، خِدا زِندگی کا دور آبَه اینه. 19 اَوِن دیل سِنگ آبَه اینه، اِشتَن دَسپَردَشونه هَرزگی دَس، اِنتَه که طمع نَه دَس بِه هَر جورَه ناپاکی ژَنِن. 20 امّا شِمَه اِنتَه مسیح آموتَه نیرونه، 21 البته اَگم گمون بِکَرَم که چَیی درباره دَرَسَرونَه و عِین اَ حقیقتی که عیسی کایَه، تعلیم گِتِرونَه. 22 تا شِمَه قدیمَه زِندگی رَوِشی یعنی اَ قدیمَه آدَمی که دوروعَه پیستَه اون واسطه نَه فاسِد بَه، شِمَه بَدَنی کا بَرورَه. 23 و روح کا شِمَه فیکر تازه آبو، 24 و تازه آدَمی شِمَه بَدَنی کا دَکَرَه، که صالحی و قدّوسیت حقیقی کا، خِدا شیوار خَلق بییَه بِبو. 25 بَس، دوروع واتِه بِنییَه کَنار، هَر کمیله شِمَه خَمسوعه نَه، راستی نَه گف بِژَنَه، چوم که اَمَه گِرد، یَندی نَه ایلَه اَعضا ایمونَه. 26 «عصبانی بِبییَه، امّا گناه مَکَرَه» مَرزَه شِمَه روز تَمون آبو و حَلا شِمَه عصبانی بِبییَه، 27 و اِبلیسی مُهلت مَدییَه. 28 دِزد دِ دِزدی مَکَرِه، بَلکم زحمت بِکَشِه، و اِشتَن دَسون نَه صِداقتی نَه کار بِکَرِه، تا بِشا نیازمَندون نی ایی چیی آدَه. 29 شِمَه گَ بَدَه گَفی را آمَبو، بَلکَم شِمَه گفِن گِرد دییَرون بینا کردِه را بِه کار با و نیازی بَرآورده بِکَرِه، و کسونی را که دَرَسِن فیض بِدارِه. 30 خِدا قدوسَ روح که اَیی نَه آزادی روزی را مُهر بَه ایرونه، ناراحت آمَکَرَه. 31 هَر جورَه تِلی، خشم، عصبانیت، خَرا خِلِع، بُختون و هَر جورَه بَدخواهی اِشتَن کا دور آکَرَه. 32 یَندی نَه میهرَوون و دیلَسوج بِبییَه و هَتَه که خِدا شِمَه مسیح کا بَخشِستَشه، شِمَه نی یَندی بِبَخشه. |
@ 2024 Korpu Company