نامَه اَفسوسی کلیسارا 3 - کتاب مقدس به زبان تالشی شمالی

اِنجیلی سِر آشکار بَبی

¹ اِمی واسی اَز پولُس، شِمَه غیریهودیون را، مسیحْ عیسی زِندانی ایمَه-

² بیدون شَک شِمَه اِم جریانی درباره دَرَسَرونه که خِدا فیضی نظارت شِمَه خِدمتی واسی بَه مِن آدوعَه بییَه.

³ که چِنتَه اَ سِرّ، مکاشفه نَه بَه مِرا آشکار آبَه، هَتَه که شِمَه را مختصر نیویشتَمَه.

⁴ وختی که اَیی بوخونه، بَشایرون بِفَهمه که از چِنتَه مسیح سِرّی فهمِستِمَه،

⁵ اَ سِرّی که قدیمی یَه نَسلون دیلَه کا، آدَمون زوعَه اون را آشکار آبَه نِبَه، هَتَه که حِسَه روح القدوسی واسطه نَه، چَیی مقدّسَ رسولون و پِیغمبرون را آشکار آبَه.

⁶ اَ سِرّ اِمَه که غیریهودیِن نی مسیح کا و اِنجیلی واسطه نَه، هَم اِرثی نَه و هَ بَدنی اعضا اینه و خِدا وعدۀ کا شریکی نَه.

⁷ اَز، مطابق خِدا فیضی هدیه، اِم اِنجیلی خِدمتکار بَییمَه که چَیی قدرتی اَعمالی واسطه نَه، بَه مِن آدوعَه بییَه.

⁸ هَر چَن که از گِردِ مقدّسون دیلَه کا گِردی کا کَمترینیمَه، اِم فیض بَه مِن آدوعَه بَه تا مسیح بَرکَه گنجون خَوَری غیریهودیون را اِعلام بِکَرِم،

⁹ و گِردی را نیشون بِدَم که خِدا نَخشه چِنتَه انجام بَبی. خِدایی که گِردِ چییِون خلق کَردَشه، اِشتَن اِم سِرّی قدیمی کا، نِین غَم هَردِشَه.

¹⁰ تا کلیسا واسطه نَه، خِدا جور بَه جور حِکمت، رئیسِن و قدرتِن، آسمونی یَه جِگا اون کا آشکار آبو.

¹¹ اِم هَ هدفی بَه که خِدا، صِفته نَه اَیی داری که خِدا اَیی چَمَه خِداوند مسیحْ عیسی کا انجام دوشَه.

¹² اَمَه مسیح کا و بِه واسطه ایمان بِه اَیی، بَشایمون جرئتی نَه و اِطمینانی نَه بِه خِدا نِزدیک آبییَم.

¹³ بَس شِمَه کا خواهیشت بَکَردیم، اَ رَنجونی واسی که شِمَه را کارا کَشِم، دیلسَرد مَبییه، چوم که اَوِن شِمَه اِفتخاری باعیثی نه.

دعا، روحانی یَه قوّتی نَه

¹⁴ اِمی واسی، اَز آسمونی یَه دَده پیشی کا زِنگ ژَنِم

¹⁵ که هَر خانواده‌، آسِمونی کا و زمینی سَر، اَیی کا نوم بَگتین،

¹⁶ که بینا بَر اِشتَنِش جلالِ دولتمندی آدَه شِمَه تا خِدا روح واسطه نَه شِمَه باطِنی کا قوی و نیرومند بِبییَه،

¹⁷ تا ایمانی واسطه نَه، مسیح شِمَه دیلون دیلَه کا بومونِه و محبتی کا بِنَه بِژَنَه، پابَرجا بِبییَه،

¹⁸ تا قوّت بِدارَه که گِردِ مقدسون نَه، مسیح محبتی درازی و وِشایی، عمق و بِلَندی بِفهمَه،

¹⁹ و مسیح محبتی که بَشَری یَه معرفتی کا کَفاتَرَه، آزونَه- تا خِدا تمام کمالَ پُوری کا لِبالِب بِبییَه.

²⁰ حِسَه، جلال بَر خِدایی بِبو که بَشای اَ قدرتی واسطه نَه که چَمَه دیلَه کا کار بَکَردی، بَرک وِرتَر اَ چیی کا که اَمَه خَیال بَکَردیمون یا بِپییَم، عمل بِکَردی،

²¹ کلیسا دیلَه کا و مسیحْ عیسی دیلَه کا، گِردِه نَسلون دیلَه کا، تا اَبَد جلال بَر خِدا بِبو! آمین.