نامَه اَفسوسی کلیسارا 2 - کتاب مقدس به زبان تالشی شمالی

فیضی نَه ایمانی واسطه نَه

¹ شِمَه، شِمَه خَطا اون و گِناه اون دیلَه کا مَردَه بیرونه،

² و زمانی چَوون دیلَه کا زِندگی بَکَردیرون، اَ موقع که اِم دنیا راه اون کا و قدرت هوا رئیسی کا یعنی اِبلیسی کا اِطاعت بَکَردیرون، هَ روحی کا که حِسَه نی نافرمونی خِردَنون کا کار بَکَردی.

³ اَمَه نی گِرد ایی زمانی چَوون دیلَه کا چَمَه جِسمی هَواهوسی دیلَه کا زِندگی بَکَردیمون، و چَمَه جِسمی فیکرون و پیستَه اون اَنجام بَدایمون؛ و بقیه آدَمون شیوار، بینا بِه چَمَه ذات، خِدا غَضَبی محکوم بیمونه.

⁴ امّا خِدایی که چَیی رَحم بَرک وِرَه، اِشتَن بَرکَ محبتی واسی اَمَه نَه خِش بَه،

⁵ حتی وختی که چَمَه خَطااون دیلَه کا مَردَه بیمونَه، اَمَه مسیح نَه زِنده آکَردِشه- شِمَه فیضی راه نَه نجات پیدا کَردَرونه-

⁶ و خِدا اَمَه مسیح نَه زِنده آکَردِشه و آسِمونی یَه جِگا اون کا مسیحْ عیسی نَه نیشوندِشه،

⁷ تا اَ زمانونی کا که بومَی، اَ اِشتَن بَرکَ فیضی، اِشتَن میهروونی واسطه نَه نسبت بِه اَمَه مسیح عیسی کا نیشون بِدَه.

⁸ چوم فیضی نَه و ایمانی واسطه نَه نجات پیدا کَردَرونه. و اِم شِمَه کا نییَه؛ بَلکَم خِدا هدیه یَه،

⁹ و اِم، کارون نتیجه نییَه، تا هیچکَس مَشا اِشتَن را افتخار بِکَرِه.

¹⁰ چوم اَمَه خِدا دَسی کاریمونه، و مسیحْ عیسی کا خلق بَیمونه تا چاکَه کارون اَنجام بِدییَم، اَ کارونی که خِدا پیشتَری کا آمادَه آکَردِشه تا چَوون دیلَه کا قدم پِگِرَم.

مسیح دیلَه کا یَکی بییِه

¹¹ بَس ویر بواَرَه که ایی موقعی شِمَه غیر یهودیون ’خَتنَه نِبییَه‘ دَخونین، و اِشتَن ’خَتنَه بییَه‘ بَزنین- در حالی‌ که چَوون خَتنَۀ، ایلَه کار جِسمانی یَه که آدَمی دَسی نَه اَنجام بییَه بَه-

¹² و ویر بواَرَه که اَ موقع مسیح کا جِدا بیرونه و قوم اِسرائیلی کا حِساب نِبیرون و نسبت بِه عَهدون وعدَه، غریب بیرونَه، و نا اُمید و بی‌خِدا اِم دنیا کا زِندگی بَکَردیرون.

¹³ امّا حِسَه مسیحْ عیسی کا، شِمَه که زمانی دور بیرونه، مسیح خونی واسطه نَه نِزدیک اومیرونه.

¹⁴ چوم که مسیح اِشتَن چَمَه صُلح و سلامتی یَه، اَ که اَمَه هَر دِ گِله، یعنی یهود و غیریهودی ایلَه وَج آکَردِشه و اِشتَن بَدنی کا جدایی یَه حَصاری که دِشمَنی باعیث بَه، ویکَردَشه،

¹⁵ رسم و رسوماتی که شریعتی اَحکامی دیلَه کا بَه باطل آکَردِشه، تا اِشتَن دیلَه کا اَ دِ گِله عوض، ایلَه تازه آدمی بِه وجود بواَرِه، تا صُلح و سلامتی برقرار بِکَرِه،

¹⁶ و هر دِ گِله ایلَه بدنی کا خِدا نَه آشتی بِدَه، اِشتَن صلیبی واسطه نَه که چَیی سَری کا، دِشمَنی کِشتِشه.

¹⁷ اَ اومَه و صُلح و سلامتی خوشَ خَوَری شِمَه را که دور بیرونه و کسونی را که نِزدیک بینَه، اِعلام کَردِشه.

¹⁸ چوم چَیی واسطه نَه، اَمَه هر دِ گله، ایلَه روح دیلَه کا آسِمونی یَه دَده دَسترسی هِستِمونه.

¹⁹ بَس دِ شِمَه غریبَه و اَجنبی نیرونه، بَلکَم مقدّسون نَه هموطن و خِدا خانواده اَعضا کا ایرونه؛

²⁰ شِمَه اَ عِمارتی سَری کا که رسولِن و پِیغمبرِن چَیی پاکار بینَه بینا بیرونه،که مسیحْ عیسی اِشتَن اَ بینا، اَصلی یَه سِنگَه.

²¹ مسیح کا گِردِه اِم بینا یَندی نَه وصل بَبین، و ایلَه مقدّسَ معبد خِداوندی کا بَرپا بَبی.

²² و شِمَه نی یَندی نَه مسیح کا بینا بَبیرون تا ایلَه کَ بِبییَه که خِدا اِشتَن روح واسطه نَه چَیی دیلَه کا بَمَندی.