نامَه کُولُسی کلیسا را 4 - کتاب مقدس به زبان تالشی شمالی

¹ اِی اَربابِن، شِمَه نوکرون نَه عدل و اِنصافی نَه رَفتار بِکَرَه، چوم بَزنیرون شِمَه نی آسِمونی کا اَربابی هِستِرونه.

² همیشه دعا کا پابَرجا بِبییَه، شُکرکَردِه نَه، دعا کا شِمَه هَواس جمع بِبو.

³ هَمزمان اَمَه را نی دعا بِکَرَه، تا خِدا، کلامی را اَمَه را ایلَه بَری آکَرِه تا بِشایَم مَسیح سِرّی اِعلام بِکَرَم. اَ سِرّی که از چَیی واسی حِسَه زیندانی کا ایمَه.

⁴ دعا بِکَرَه که بِشام هَتَه که چاکَه اَیی واضِح اِعلام بِکَرِم.

⁵ کلیسا بِرونی مردمی نَه حکیمونه رَفتار بِکَرَه و هَر فُرصَتی کا چاک اِستفادَه بِکَرَه.

⁶ شِمَه گفِن هَمیشه فیضی نَه پُور و سَنجیده بِبون، تا بِزونَه هَر کَسی جَواوی چِنتَه بِدییَه.

آخِرین سَلامِن

⁷ تیخیکوس چِمِن اَحوالاتی شِمَه را کامل بَواتی. اَ عَزیزَه بِرا، وَفادارَه خادم و خِداوندی کا چِمِن هَمخدمتَه.

⁸ اَیی ویسا آکَرِم شِمَه وَر تا چَمَه اَحوالاتی کا خَوردار بِبییَه، تا شِمَه دیلگرم آکَرِه.

⁹ اَ، اونیسیموسی همراه، چَمَه وَفادار و عَزیزَه بِرا که شِمَه اِشتَن کایَه، بومَی شِمَه وَر. اَوِن شِمَه هَر چیی کا که اییا کا اِتفاق دَلَکِه خَوردار بَکَردین.

¹⁰ آریستارخوس که مِنه زندانی کا اِستَه، شِمَه را سلام آرِساوونه؛ اِنتَه نی مَرقُس، بَرنابا عمو زوعَه، که پیشتری، دربارَه چَیی شِمَه سفارش کَردِمه که هَر موقع با شِمَه وَر، گَرمینه اَیی قبول بِکَرَه.

¹¹ عیسی نی که اَیی نَه یوستوس نی بَواتین، شِمَه را سلام آرِساوونه. چِمِن همکارون دیلَه کا، خِدا پاُتشایی کاری کا، فقط اِم چَن گِله مِرد خَتنه بَه ایینه، و اَوِن چِمِن تَسلی باعیث بَیینه.

¹² اِپافْراس که ایلَه شِمَه کا و مسیحْ عیسی خادِمَه، شِمَه را سلام آرِساوونِه. اَ خِدا کا پیستِشَه که شِمَه یالَ آدَمون و خاطر جمعون شیوار پابَرجابومونه، و خِدا اِرادَه کاملا اِطاعت بِکَرَه.

¹³ اَز شاهِدیمَه که اَ شِمَه واسی و کسونی واسی که لائودیکیه کا و هیراپولیسی کا مَندینه، چَدَه بَرک زَحمت کَشِشَه.

¹⁴ لوقا، عَزیزگِرامی یَه دکتر و اِنتَه نی دیماس، شِمَه را سلام آرِساووندِشونه.

¹⁵ چَمَه بِرااون و خالا اون را لائودیکیه کا و اِنتَه نی نیمفا را و کلیسایی که اِم بانو کَ کا بَر پا بَبی، سلام آرِساوونَه.

¹⁶ و وختی که اِم نامه شِمَه دیلَه کا خَنده بَه، لائودیکیه کلیسا کا نی خَنده بِبو، شِمَه نی چِمِن نامه که لائودیکیه را نیویشتمَه بوخونَه.

¹⁷ و آرخیپوسی نَه بوآجَه: «اِشتِه هَواس بِبو تا خدمتی که خِداوندی کا ویگِتَرَه، کامِل اَنجام بِدَی.»

¹⁸ اَز، پولس، اِم سلامی چِمِن دَسی نَه بَنیویشتیم. چِمِن زَنجیرون اِم زیندانی کا ویر بواَرَه. فیض شِمَه نَه بِبو.