نامَه کُولُسی کلیسا را 3 - کتاب مقدس به زبان تالشی شمالی

تازه زندگی مسیح دیلَه کا

¹ بَس اَگم شِمَه مَسیح نَه زِنده آبَییرونه، اَ چییونی دومله بِبییَه که کفا کایَه، اوآ که مَسیح خِدا راستَه دَسی وَری کا نِشتَه.

² شِمَه فیکرون چییونی را بِنییَه که کفا کایَه، نِه اَ چییونی سَر که زمینی کایَه.

³ چوم شِمَه مَردیرونه و شِمَه زِندگی مَسیح نَه خِدا دیلَه کا نِینَه.

⁴ وختی مسیح، که شِمَه زندگی یَه، آشکار بِبو، دومله شِمَه نی اَیی نَه جلالی کا آشکار بَبیرون.

⁵ بَس، هَر چیی که شِمَه وجودی کا زَمینی یَه، بِکِشَه، یعنی بی‌عفتی، ناپاکی، هَواهَوس، بَدَه پیستَه اون و طمع که هَ بُت‌پرستی یَه.

⁶ هِمی واسی خِدا غضب نافرمونی زوعَه اون سَر اومَه.

⁷ شِمَه نی قَدیمون اِم راهون بَشیرون، اَ موقعی که اَوون کا زندگی بَکَردیرون.

⁸ امّا حِسَه بَسی گِردِ اِمون بِنییَه کَنار: یعنی خَشم، غضب، بَدخواهی، بُختون و بِدَه گَفِن که شِمَه گَ کا بِرون بومَین.

⁹ یَندی نَه دوروع مَواجَه، چوم شِمَه اَ قَدیمَ آدَمی چَیی کارون نَه شِمَه بَدنی کا بِرون بَروَردَرونه،

¹⁰ و تازَه آدَمی خَلا دَکَردَرونه، که معرفت حقیقی کا هَر لحظه تازَه بَبی تا اِشتَن خالقی شیوار بِبو.

¹¹ اِم تازَه آدَمی کا، یونانی و یَهودی، خَتنه‌ بییَه و خَتنه‌ نِبییَه، بَربَر و سَکایی، نوکر یا آزاد دِ معنی نیشه، بَلکَم مَسیح گِردِ چیی یَه و گِردی دیلَه کایَه.

¹² بَس خِدا اِنتخاب بییَه آدَمون شیوار که مقدّس و عَزیزگِرامی اینه، دیلَسوجی، میهروونی، فروتنی، ملایِم بییِه و صَبری خَلا دَکَرَه.

¹³ یَندی تحمل بِکَرَه و اَگم ایی نفر، ایی نفری کا شکایتی هِستِشه، یَندی بِبَخشه. هَتَه که خِداوند شِمَه بَخشِستَشه، شِمَه نی بَسی یَندی بِبَخشه.

¹⁴ و چِمون گِردی سَری کا مُحبتی خَلا دَکَرَه که گِردِ چییون یَندی نَه ایلَه تمام کمالَ اِتحادی نَه پیوند بَدای.

¹⁵ مسیح صُلح و سلامتی شِمَه دیلون دیلَه کا حاکِم بِبو، که راس راسی ایلَه بَدنی دیلَه کا دعوت بَییرونه. شُکرگزار بِبییَه.

¹⁶ مَسیح کلام، فَت و فراوون شِمَه دیلَه کا بومونِه؛ تَمون حِکمتی نَه یَندی پَند و تعلیم بِدییَه، مزامیر، سرودون و آوازونی نَه که خِدا روح کا یَه، شُکرکَردِه نَه و صِدق دیلی نَه خِدا را بوخونَه.

¹⁷ و هَر کاری که بَکَردیرون، چِه گف ژَندِه کا یا رفتاری کا، گِردی خِداوند عیسی نومی نَه اَنجام بِدییَه، و چَیی واسطه نَه خِدای دَده شُکر بِکَرَه.

ایماندارون رابطه

¹⁸ اِی ژِنَکِن، شِمَه شو اون کا اِطاعت بِکَرَه، هَتَه که خِداوندی شَئنی کایَه.

¹⁹ اِی شو اِن، شِمَه ژِنَکون نَه خِش بِبییَه و اَوون نَه تِندی مَکَرَه.

²⁰ اِی خِردَنِن، شِمَه دَده نَنَه کا هَر کاری کا اِطاعَت بِکَرَه، چوم اِم، خِداوندی خوشحال بَکَردی.

²¹ اِی دَده اِن، شِمَه خِردَنون عصبانی مَکَرَه، نَبادا دیلسَرد آبون.

²² اِی نوکَرِن، هَر چیی کا شِمَه زمینی یَه اَربابون کا اِطاعَت بِکَرَه، نِه فقط اَ موقع که شِمَه دَیِسِن، اَ آدَمونی شیوار که چِمی دومله اینه که مردمی راضی آکَرِن، بَلکَم پاکَه دیلی نَه و خِداوندی تَرسی نَه.

²³ هَر کاری که بَکَردیرون جان و دیلی نَه بِکَرَه، جوری که اِنگاری خِداوَندی را کار بَکَردیرون، نِه مردمی را،

²⁴ چوم بَزنیرون که شِمَه پاداش اِرثی اِستَه که خِداوندی کا ویگِرَه. شِمَه خِداوند مسیح خدمت بَکَردیرون.

²⁵ چوم هَر کسی که بَدی بِکَرِه، اِشتَن بَدَه کاری سِزا بَویندی و فرق نوعِه ای در کار نییَه.