نامَه کُولُسی کلیسا را 2 - کتاب مقدس به زبان تالشی شمالی

¹ پیستِمَه بِزونَه که شِمَه واسی و کَسونی واسی که لائودیکیه کا اِستینه، و گِردِ کسونی را که مِن ویندَه نیشونَه، چِنتَه تَقّلا بَکَردیم،

² تا دیلگرم بِبون، و هَتَه که مُحبتی کا یَندی نَه متحدی نَه و اَ کاملَ اِطمینان و بی حد و اندازه پُوری کا، که فهمی کا بِه دَس بومَی بهره بِبَرَه و هِم راه کا، خِدا سِرّی، یعنی مَسیح آزونِن،

³ چَیی دیلَه کایَه که تَمون حکمت و دانایی گنجِن نِینَه.

⁴ اِمی بَواتیم تا هیچکس اَ دلیلونی نَه که قانع بَکَردی، شِمَه گول مَژَنه.

⁵ چوم هَر چَن جِسمَن شِمَه وَری کا نیمَه، امّا روح کا شِمَه نَه ایمَه و شِمَه نظم و قُرصَ ایمانی که بِه مسیح هِستِرونه بَویندیم، شادیمَه.

مسیح دیلَه کا زِنده

⁶ بَس هَتَه که مسیحْ عیسایِ خِداوَندی قبول کَردَرونه، اَیی کا زِندگی بِکَرَه؛

⁷ اَیی کا بِنَه بِگِرِه و رُشد بِکَرَه، و ایمانی کا پابَرجا بِبییَه، و هَتَه که آموتَرونه، شُکر کَردِه کا لِبالِب بِبییَه.

⁸ شِمَه هَواس جمع بِبو تا، هیچکس شِمَه فَلسفَه و پوچَ حُقّه نَه گیریفتار مَکَرِه، که نِه مَسیح سَری کا، بَلکَم آدَمون دَب و اِم دنیا اُصولی سَری کا پابَرجایَه.

⁹ چوم ذات الهی پُوری گِرد جسمی شیوار مَسیح دیلَه کایَه،

¹⁰ و شِمَه مسیح دیلَه کا، که گِردِ رئیسون و قدرتون را سَرَه، پُور آبَییرونه.

¹¹ و مسیح کا خَتنَه نی بَییرونه، خَتنَه‌ای که دَسی نَه اَنجام بَه نییَه، بَلکَم جِسمانی یَه بَدنی بِرون وَردِه نه، مسیح واسطه نَه خَتنه اَنجام بَه،

¹² شِمَه اَیی نَه غُسل تعمیدی کا، دَفن بیرونه و ایمانی طریقی نَه که خِدا قوّتی نَه عمل بَکَردی، که مسیح مَردَه اون دیلَه کا زِنده آکَردِشه، اَیینه زِنده آبیرونَه.

¹³ و خِدا، شِمَه که شِمَه گناه اون و شِمَه خَتنَه نِبییَه جِسمی دیلَه کا مَردَه بیرونه، مَسیح نَه زِندَه آکَردِشه. اَ چَمَه خَطا اون گِردی بَخشِستِشه،

¹⁴ و اَ قَرضون سَنَدی که قانونون واسطه نَه چَمَه ضِد نیویشتَه بییَه بَه باطل آکَردِشه، صلیبی سَری کا مِخه کو کَردِشه و از بِین بَردِشَه.

¹⁵ اَ، رئیسون و قدرتون سِلاحون ویگِتِشه، و صلیبی نَه، اَوون اَفجور بَه و اَوون گِردی پیشی کا رِسوا کَردِشَه.

¹⁶ بَس مَرزَه کسی اَ چیی درباره که هَرَه و هِنجَه، یا عید و تازَه مانگ و یَهودییون مقدّس شنبه روزی درباره، شِمَه قضاوت بِکَرِه.

¹⁷ اِمِن اَ چییونی سا اینَه که بومَی، امّا چَوون اَصل مَسیح شِنَه.

¹⁸ مَرزَه کسی شِمَه محروم بِکَرِه اِم اِصراری نَه که بَدنی بَسی چاک غَم هَردِه و ملائیکه اون پرستش کَردِه. اِنتَه رَه آدَمی فقط اِشتَن خَیالاتی تَکیه بَکَردی و بی اِمکه دلیلی بِدارِه اِشتَن پوچَ فیکرون نَه مغرور بَبی.

¹⁹ اِنتَه رَه آدَم دِ سَری وَصل نییَه، اَ سَری که تمون بَدَن اَیی نَه جان بَگَتی و مفصَلون و بَندون واسطه نَه یَندی نَه غَم هَردَه بَبی و هَتَه که خِدا پیستِشَه رُشد بَکَردی.

²⁰ اَگم شِمَه مَسیح نَه نسبت بِه دنیا اُصول مَردَه‌ ایرونَه، چیرا کَسونی شیوار که حَلا اِم دنیا شِنی نَه، چَیی قانونون اَنجام بَداریرون، اَ قانونونی که بَواتی:

²¹ «اِمی دَس مَژَن! اَیی لِو مَژَن و اَیی دَس مَپِنه!»؟

²² اِمِن گِرد اَ چیونی دربارَه یَه که مصرف کَردِه نَه از بِین بَشین، و آدَمی دستورون و تعلیمی سَر بینا بَیینَه.

²³ هَر چَن که اِشتَن وَج آکَردَه دینی کا و بَدنی ریاضت و بَدنی سختگیری کا گف ژَنَه، حکیمونه بِه نظر بومَی، امّا اِمِن اِمی واسی که هَواهَوسی پیشی بِگِرِن، هیچ کاری چَوون دَسی کا بَر نا.