نامَه کُولُسی کلیسا را 1 - کتاب مقدس به زبان تالشی شمالی

¹ پولُسی طرفی کا که خِدا پیستَه نَه مسیحْ عیسی، رسول اِستَه، و چَمَه بِرا، تیموتائوسی طرفی کا،

² مقدّسون و وفادارَه بِرااون را مَسیح کا، که کولُسی شهری کا اینه: فیض و صُلح و سلامتی، خِدا طرفی کا، چَمَه دَده، شِمَه را با.

شُکرکَردِه و دعا

³ اَمَه همیشه که شِمَه را دعا بَکَردیمون، شِمَه واسی، خِدا، چَمَه خِداوند عیسایِ مَسیح دَده شُکر بَکَردیمون،

⁴ چوم که اَمَه شِمَه ایمانی درباره مسیحْ عیسی کا و محبتی که گِردِ مقدّسون را هِستِرونه، دَرَسَمونه.

⁵ که اِمِن اَ اُمیدی کا سَرچشمه بَگتین که آسِمونی کا شِمَه را محفوظ اِستَه. اَ اُمیدی که پیشتری چَیی درباره، حَقیقَتی کلامی کا یعنی اِنجیل، دَرَسَرونه،

⁶ اِنجیلی که شِمَه آرَستَه، هَتَه که دنیا سَرتاسَری کا نی آرَستَه، ثَمره بَدای و وِر آبو، هَتَه که شِمَه دیلَه کا نی، اَ روزی نَه که اَیی دَرَسِرونه و خِدا فیضی حقیقتی کا فَهمِستَرونه، کار کَردَشَه.

⁷ هَتَه که شِمَه اَیی چَمَه عَزیزه همخدمت، اِپافْراسی کا آموتَرونه. اَ که شِمَه طرفی نَه مسیح وفادارَه خادمَه.

⁸ و اَ اَمَه، شِمَه مُحبتی کا که خِدا روح کایَه، خَوَردار کَردِشه.

⁹ اِمی واسی، اَمَه نی اَ روزی نَه که اِمی دَرَسِمونه، شِمَه را دعا کَردِه کا دَس نِپِگتَمونه، بَلکَم هَمیشه خِدا کا پیستِمونَه تا چَیی اِرادَه آزونستِه نَه، هَر حِکمت و روحانی یَه فهمی کا پور بِبییَه؛

¹⁰ تا شِمَه رفتار، خِداوندی شَئنی کا بِبو و بِشایَه اَیی کاملا خوشحال آکَرَه: هَر چاک کاری کا ثمر بواَرَه و خِدا آزونستِه کا رُشد بِکَرَه

¹¹ و تمون قوّتی نَه که چَیی پُرجلال قدرتی کا بومَی، قوّت بِگِرَه تا شادی نَه بَرکَ صبر و تحملی بِدارَه؛

¹² دَده شُکر بوآجَه که شِمَه قابِل کَردِشَه که اَ میراثی دیلَه کا که مقدسِن، نوری دیلَه کا هِستِشونه اَمَه شریک کَردَشَه.

¹³ اَ، اَمَه تاریکی قدرتی کا رهایی دوشَه و ویسا آکَردِشَه اِشتَن عزیزَه زوعَه پاُتشایی دیلَه.

¹⁴ که چَیی دیلَه کا اَمَه رهایی هِستِمونه، یعنی چَمَه گناه اون بَخشِش.

مسیح شخصیت و کار

¹⁵ اَ، خِدایی دیمَه که نییَب ویندِه، اوّلین خِردَن، گِردِ خلقتی کا پیشتر و کَفاتَر.

¹⁶ چوم که گِردِ چییِن چَیی واسطه نَه خَلق بینَه، آسِمونی کا و زمینی سَری کا، اَ چییونی که بَبی ویندِه یا نییَب ویندِه، چِه پاُتشایی تَختِن یا قلمروِن، رئیسِن یا قُدرتِن- گِردِ چییِن، چَیی واسطه نَه و اَییرا خلق بینَه.

¹⁷ اَ گِردِ چییون کا پیشترَه، و گِردِ چییِن چَیی دیلَه کا یَندی نه غَم هَردَه بَبی.

¹⁸ اَ بَدنی را سَرَه، یعنی کلیسا را. اَ شروع و اوّلین نفرَه که مَردَه اون دیلَه کا زِنده آبَه، تا گِردِ چییون کا، اَ سَر بِبو.

¹⁹ چوم خِدا خشنودی گِرد اِمی کا بَه که چَیی دیلَه کا بومونِه،

²⁰ و چَیی واسطه نَه گِردِ چییون اِشتَن نَه آشتی دوشَه، چِه آسِمونی کا و چِه زمینی سَری کا، اِشتَن خونی ویکَردِه نَه صلیبی سَری کا، آشتی دوشَه.

²¹ شِمَه نی ایی موقعی خِدا نَه غریبه بیرونه، و شِمَه فیکری کا چَیی دِشمن، و اِم شِمَه شَرورانۀ کارون کا معلوم بَبی.

²² حِسَه اَ، اِشتَن مرگی واسطه نَه، اِشتَن جِسمانی یَه بدنی کا شِمَه آشتی دوعَشَه، تا شِمَه مقدّس و بی‌عیب و بیدون هیچ سَرکوفتی، بواَرِه خِدا وَر.

²³ بِه شرطی که راس راسی شِمَه ایمانی کا قُرص و پابَرجا بومونه و اَ اِنجیلی اُمیدی کا تَکان مَرَه. اِم هَ اِنجیلی یَه که گِردِ خِلقتی را آسِمونی جیری کا اِعلام بَه، و اَز، پولُس، چَیی خادم بَییمَه.

پولُسی خدمت کلیسا را

²⁴ حِسَه اَ زَجرونی کا که شِمَه واسی کَشِمَه شادیمَه و چَیی بَدنی واسی که کلیسا یَه، اَ چیی که مسیح عَذابون کا کَمَه، چِمن جِسمی کا تَلافی بَکَردیم.

²⁵ که طبق خدمت نظارتی که خِدا بَه مِن دَسپاردِشه، کلیسا خادِم بَه ایمَه، تا خِدا کلامی کامل شِمَه آزونِم،

²⁶ یعنی اَ سِرّی که وِرَه زمانون و نَسلون کا نِین بَه، امّا حِسَه چَیی مقدّسون را آشکار آبییَه.

²⁷ خِدا اِنتَه پیستِشَه که اَوِن آزونِن که اِم سِرّ غیریهودیون دیلَه کا، چِه بَرکَ جلالی هِستِشه. اَ سِرّ اِمَه که مَسیح شِمَه دیلَه کا جلالی اُمیدَه.

²⁸ اَمَه اَیی اِعلام بَکَردیمون، و گِردی هُشدار بَدایمون و گِردی تَمون حکمتی نَه تعلیم بَدایمون، تا گِردی یالَ آدَمون شیوار مَسیح کا، بواَرَم خِدا وَر.

²⁹ اِمی واسی یَه که اَز زَحمت بَکَشتیم و تَمون چِمِن قوّتی نَه چَیی واسطه نَه که چِمِن دیلَه کا قوّتی نَه کار بَکَردی، تَقَّلا بَکَردیم.