رَسولون اَعمال 9 - کتاب مقدس به زبان تالشی شمالیسولُسی ایمان وَرده 1 ولی سولُس که هِی خِداوندی شاگِردون تهدید کَردِه و چَوون کِشتِه اِدامه بَدای، شَه کاهِن اَعظمی وَر 2 و اَیی کا نامه اونی پیستِشَه دَمشقی عبادتگاه اون را تا کسونی که عیسی پِیرو بینَه و اَوون نَه اَهل طریقت بَواتین، چِه ژِن و چِه مِرد، دَستگیر بِکَرِه و بواَرِه اورشلیم. 3 راه دیلَه کا، وختی سولُس دَمشقی نِزدیک آبی، ایی دفعه ایلَه نوری آسِمونی نَه اومَه و چَیی دُوری گِتِشه 4 سولُس زمینی سَری کا بَلَکَه، ایلَه سَسی دَرَسِشَه که اَیی نَه بَواتی: «شائول، شائول، چیرا مِن اَذیت آزار بَکَردیش؟» 5 سولُس واتِشه: «خِداوندا، تِه کی ایش؟» جَواو دوشَه: «اَز هَ، عیسایی ایمَه که تِه اَیی اَذیت آزار بَکَردیش. 6 حِسَه، پِرِز و بِش شهری را. اوآ کا بَه تِنه واتَه بَبی که بَسی چِه بِکَری.» 7 سولُسی هَمسفرون زوون قِفل بییَه بَه و مَندبینَه؛ اَوِن سَسی دَرَسین، ولی هیچکسی نِوینین. 8 سولُس زمینی کا پِرِشته، هَر چَن که چَیی چِمِن باز بینَه امّا نیمَشای چیی بِوینی؛ بَس چَیی دَسی گِتِشونَه و اَیی بَردِشونَه دَمِشق. 9 سولُس سِه روز کور بَه و چیی نییَری و نِنجی. 10 دَمِشقی کا عیسی ایلَه شاگِردون کا زِندگی بَکَردی که چَیی نوم حَنانیا بَه. خِداوند رویا کا بَیی نَه واتِشه: «حَنانیا!» حَنانیا جَواو دوشَه: «گوش بِه فرمانیمَه، اییاکا ایمَه.» 11 خِداوند، حَنانیا نَه واتِشه: «پِرِز و بِش ایلَه کوچه‌ای را که چَیی نوم ’راستَه‘، بِش و یهودا کَ کا سولُسِ تارسوسی سُراغی بِگِه. شائول کارا دعا بَکَردی 12 و رویا کا ایلَه مِردی ویندَشَه، که چَیی نوم حَنانیا یَه، که بومَی و چَیی سَر دَس پِنه تا اَ هَنی بِوینِه.» 13 امّا حَنانیا جَواو دوشَه: «خِداوندا، وِر کَسون کا اِم مِردی درباره دَرَسَمَه که اِشتِه مقدسون اورشلیمی کا اَذیت آزار کَردَشه. 14 و اییاکا نی سَران کاهِنون کا اِم اِختیاری اِستِشه تا هَر کسی که اِشتِه نومی بَواتی دستیگر بِکَرِه.» 15 ولی خِداوند حَنانیا نَه واتِشه: «بِش، چوم که اِم مِرد وسیله ای یَه که از اَیی انتخاب کَردَمه تا چِمِن نومی، غیریهودیون و چَوون پاُتشااون و یهودی مردمی را اِعلام بِکَرِه. 16 چوم که اَز بَیی نیشون بَدایم که چِمِن نومی واسی چِه عذابی بَسی بِکَشه.» 17 بَس حَنانیا راه دَلَکه و شَه اَ کَ دیلَه. اِشتَن دَسون پِنوشه چَیی سَری کا، واتِشه: «شائول، بِرا، خِداوند یعنی هَ عیسی که وختی کارا بومَیش اییا، راه کا بَه تِن ظاهر آبَه، مِن ویسا آکَردَشَه تا هَنی اِشتِه بینایی بِه دَس بواَری و روح القدسی کا پور آبی.» 18 هَ لَحظه ایی چیی ایلَه پولَکی شیوار شائولی چِمون کا بَلکَه و اَ هَنی شاستِشه بِوینه و پِرِشتَه غسل تعمید گِتِشه. 19 دومله غذا هَردِشه و اِشتَن قوّتی بِه دَس وَردِشه. شائول چَن روز شاگِردون نَه دَمِشقی کا مَند بَه. شائول چَن روز شاگِردون نَه دَمِشقی کا مَند بِه 20 اَ، اَلبَحَل عبادتگاه اون کا دَمندَه اِم پَیغومی اِعلام کَردِه که عیسی خِدا زوعَه یَه. 21 هَر کسی چَیی پیغومی دَرَسی مات و مبهوت بَبی و بَواتی: «مَگم اِم هَ کسی نییَه که اورشلیمی کا کسونی دیلَه کا که عیسی نومی اِشتَن زوونی سَر بواَردین آشوب بِه پا بَکَردی. مَگم اِمی واسی اومَه نییَه اییا که اَوون دَستگیر بِکَرِه و بِبَرِه سَران کاهِنون وَر؟» 22 ولی شائول روز بَه روز وِرتَر قوّت بَگتی و دَمِشقی یهودیون را دلیلونی بواَردی و ثابت بَکَردی که عیسی، هَ مسیح موعودَه. 23 وِرَه روزون دَوییَرده پَش، یَهودیِن نَخشه کَشِشونَه که شائولی بِکِشِن. 24 امّا شائول چَوون نَخشه کا خَوَر دار بَه. اَوِن شَواَنده روز شهری دروازه اون کا کیشیک بَداین تا شائولی بِکِشِن. 25 ولی شائولی شاگِردِن شَوونَه اَیی ایلَه زَنبیلی دیلَه کا نوشونَه، شهری حصاری شِکافی کا اَیی ویسا آکَردِشونَه جیری را. 26 وختی شائول آرَستَه اورشلیم، پیستِشَه شاگِردون مُلحق بِبو، امّا گِرد اَیی کا تَرسین، چوم باوَر نِکَرین که اَ راس راسی عیسی شاگِرد بییَه بِبو. 27 امّا بَرنابا، شائولی پِگِتِشه وَردِشه رَسولون وَر، و واتِشه که چِنتَه دَمِشقی راه کا خِداوَندی ویندَشه و خِداوند چِنتَه شائولی نَه گَف ژَندَشه و اَ چِنتَه دَمِشقی کا جرئتی نَه عیسی نومی نَه تعلیم دوعَشَه. 28 بَس شائول چَوون وَری کا مَندَه و اورشلیمی کا آزاد دَوییَر آوییَر بَکَردی و جرئتی نَه خِداوندی نومی نَه تعلیم بَدای. 29 اَ یهودیونی نَه که چَوون زوون یونانی بَه، گَف ژَنی و بَحث بَکَردی، ولی چَوون نیّت اِم بَه که شائولی بِکِشِن. 30 وختی بِرا اِن اِم ماجرا کا خَوَر دار بینَه، شائولی بَردِشونَه قیصریه شهری را و اوآکا اَیی رایی کَردِشونَه تارسوسی شهری را. 31 اِنتَه کلیسا، گِردِ یهودیه، جَلیل و سامِرَه کا آرامش گِتِشه و قوّت بَگتی. ایماندارِن خِداوندی ترسی کا زندگی بَکَردین و روح القدسی تشویقی نَه هَر روز چَوون تعداد وِر بَبی. اینیاسی شفا 32 پطرس که گِردِ اَ نواحی کا بَگَردِستی، شَه لُدَّه شهری را تا مقدسونی که اوآکا زندگی بَکَردین بِوینِه. 33 اوآ کا ایی نفری ویندِشه که چَیی نوم اینیاس بَه و هَشت سال ایفلیج و زَمینگیر بَه. 34 پطرس اَیی نَه واتِشه: «اینیاس، عیسایِ مسیح تِه شفا بَدای. پِرِز و اِشتِه جِگا جمع آکَه!» اَ، اَلبحَل پِرِشتَه. 35 گِردِ لُدَّه و شارونی مردم اَیی ویندِشونَه و خِداوندی ایمان وَردِشونَه. 36 یافا شهری کا ایلَه شاگِردی زندگی بَکَردی که چَیی نوم طابیتا بَه. یونانیون زوونی کا طابیتا نَه دورکاس بَواتین که چَیی معنی پِرزَه یَه. اِم ژِن اِشتَن، چاکَ کارون را وقف کَردَش بَه و فقیر فُقرا کمک بَکَردی. 37 هَ روزون کا طابیتا مریض آبَه و مَردَه. بَس چَیی جَنازه شوشتِشونَه و ایلَه بالاخونه ای کا نوشونَه. 38 چوم لُدَّه، یافا نِزدیکی کا بَه، وختی شاگِردِن خَوَر دار بینَه که پطرس لُدَّه کایَه، دِ نَفَری ویسا آکَردِشونَه چَیی وَر و واتِشونَه: خواهیشت بَکَردیمون «اَلبَحَل بِری چَمَه وَر.» 39 پطرس پِرِشته و چَوون هَمراه شَه. وختی آرَستَه اوآ، اَیی بَردِشونَه بالا خونه را. ویوه ژِنکِن گِرد چَیی دُوری کا جمع آبَه بینَه، داد بَکَردین و خَلا اونی که دورکاس اِشتَن زِندَه بییِه موقع چَوون را دوتَش بَه، پطرسی نِشون بَداین. 40 ولی پطرس گِردی اتاقی کا بِرون بَرکَردِشه و زِنگ ژَندِشَه، دعا کَردِشه. دومله آگَردِستَه جَنازه دَیشتَه و واتِشه: «اِی طابیتا، پِرِز!» طابیتا اِشتَن چِمون آکَردِشه و وختی پطرسی ویندِشَه نِشتَه. 41 پطرس چَیی دَسی گِتِشه و اَیی پِرِزاووندِشه. اَ موقع ویوه ژِنکون و مقدسون دَخوندِشه و طابیتا زِنده اَوون تحویل دوشَه. 42 اِم خَور گِردِ یافا کا دَپیچِسته و وِر کَسِن خِداوندی ایمان وَردِشونَه. 43 پطرس نی وِرَه روزونی یافا کا، ایلَه دَبّاغی وَری کا مَندَه که چَیی نوم شمعون بَه. |
@ 2024 Korpu Company