رَسولون اَعمال 8 - کتاب مقدس به زبان تالشی شمالیسولُس کلیسا اَذیت آزار بَکَردی 1 سولُس، اِستیفانی کِشتِه نَه موافق بَه. اَ روزَه پَش، بَرکَ اَذیت آزاری اورشلیمی کلیسا را شروع بَه، اِنتَه که رسولون غِیراز، گِردِ ایماندارِن، یهودیه ولایت و سامِره منطقه را وِلا آبینَه. 2 چَن گِله خِدا شناسَه مِردَکِنی اِستیفانی جِنازه دَفن کَردِشونَه و اَیی را بَرک یالَه عزاداری گِتشونَه. 3 امّا سولُس، بَدجور غِیضی نَه کلیسا را حمله بَکَردی و کَ بِه کَ گَردی، ژِنَکون و مِردَکون بِرون بَروری و دَرَفَنی زِندانی کا. فیلیپُس سامِره کا 4 اَ ایماندارونی که اذیت آزار بییِه واسی ولا آبَه بینَه، هَر جِگا را که بَشین، خِدا کلامی شادَه خَوَری بَداین. 5 فیلیپُس نی شَه سامِرَه ایلَه شَهرون را و اوآ مردمی را مسیح درباره تعلیم دوشَه. 6 وِرَه جماعتی وختی فیلیپُسی گفون دَرَسِشونَه و مُعجزه اونی که اَنجام بَدای ویندِشونَه، دِقّتی نَه چیونی که بَواتی گوش دوشونَه؛ 7 چوم پلیدَه اَرواح نارَه کَرون و بِلَندَه سَسی نَه، وِر کَسون کا که چَوون گیریفتار بینَه، بِرون بومَین و وِر کَسِن اِفلیجون و شَلون کا، شفا بَگتین. 8 اِمی واسی اَ شهر بَرکَ شادی نَه پور آبَه. جادوگرَه شَمعونی ایمان وَردِه 9 امّا اَ شهری کا ایلَه مِردی زِندگی بَکَردی که چَیی نوم شَمعون بَه، که پیشتَری سامِره مردمی اِشتَن جادوگری نَه مات و مبهوت کَردَش بَه و اِدِعا بَکَردی که یالَه آدَمی یَه. 10 گِرد، روک و یال، چَیی گفون گوش بَداین و بَواتین: «اِم مِرد هَ خِدایی قدرتَه که اَیی نَه ’یالَه قدرت‘ بَواتین.» 11 مردم چَیی گفون گوش بَداین، چوم خَیلی مدّت بَه اِشتَن جادوگری نَه، اَوون مات و مبهوت بَکَردی. 12 ولی وختی مردم، فیلیپُسی پیغومی نَه که خِدا پاُتشایی شادَه خَوَری و عیسایِ مسیح نومی درباره بَه، ایمان وَردِشونَه، گِرد، چِه مِرد و چِه ژِن، غُسل تعمید گِتِشونَه. 13 حتی شمعون نی ایمان وَردِشه و تعمید گِتَه پَش، همیشه فیلیپُسی همراه بَه. و شمعون یالَه علامتون و مُعجزه اونی ویندِه نَه که فیلیپُس اَنجام بَدای وِر مات و مبهوت بَبی. 14 وختی رسولِن اورشلیمی کا خَوَردار بینَه که سامِرَه اَهالی خِدا کلامی قبول کَردَشونَه، پطرس و یوحنا ویسا آکَردِشونَه چَوون وَر. 15 اَ دِ نفر اومینَه سامِرَه و سامِرَه مردمی را دعا کَردِشونَه تا روح القدسی دریافت بِکَرِن، 16 چوم حَلا روح القدس چَوون هیچ گِله سَر نازِل بَه نِبَه، بَلکَم فقط عیسایِ خِداوندی نومی نَه تعمید گِتَشون بَه و وَس. 17 دومله پطرس و یوحنا اِشتَن دَسون، پِنوشونَه چَوون سَر و اَوِن روح القدسی ویگِتِشونَه. 18 وختی شمعون ویندِشه که رسولِن اِشتَن دَسی پِنَن مردمی سَر و اَوِن خِدا روح بَگتین، تِلی پول وَردِشه و 19 رسولون نَه واتِشه: «اِم قدرتی بَه مِن نی آدییَه تا هَر کسی سَر دَس پِنَم، روح القدسی ویگِرِه.» 20 ولی پطرس اَیی نَه واتِشه: «اِشتِه نِقره بَه تِنه نابود بِبو! چوم خَیال کَردَرَه که بَشای خِدا هدیه پولی نَه بِخِری! 21 تِه اِم خدمَتی کا هیچ سهم و نَخشی نیرَه، چوم اِشتِه دیل خِدا نَه روراست نییَه. 22 بَس اِشتِه اِم شِرارتی کا توبه بِکَه و خِداوندی کا درخواست بِکَه تا بَلکَم اِشتِه دیلی اِم فِکر بَخشِسته بِبو؛ 23 چوم بَویندیم که اِشتِه وجود تِلی و گناه اَسیرَه.» 24 شمعون واتِشه: «شِمَه بَه مِرا خِداوندی وَری کا دعا بِکَرَه تا اَ چی که واتِرونَه چِمِن سَر ما.» 25 پطرس و یوحنا بعد از اِم که شهادتی دوشونَه و خِداوندی کلامی اِعلام کَردِشونَه، آگَردِستینَه اورشلیمی را و راه دیلَه کا سامِرَه وِرَه دِه اون کا اِنجیلی شادَه خَوَری اِعلام کَردِشونَه. فیلیپُس و درباری خواجه 26 اَ موقع خِداوندی ایلَه مَلائیکه فیلیپُسی نَه واتِشه: «پِرِز و بِش جنوبی طرف، اَ رایی که اورشلیمی نَه بَشی غَزه را. اَ راه ویاوونی دیلَه نَه یَه.» 27 فیلیپُس پِرِشته و رایی بَه. راه دیلَه کا ایلَه خواجه مِردی بَه که حَبَشه شِن بَه. اَ، حَبَشه ملکه ایلَه درباریون کا بَه که چَیی نوم ’کَنداکِه‘ بَه و ملکه خزانه دار بَه. اَ خواجه مِرد اومَه بَه اورشلیم تا خِدا پرستش بِکَری. 28 حِسَه کارا آگَردی و اِشتَن اَرابَه دیلَه کا نِشت بَه و اِشعَیای پیغمبری کتابی بَخَندی. 29 اَ موقع خِدا روح فیلیپُسی نَه واتِشه: «بِش نِزدیک و اَ اَرابَه نَه هَمراه بِبو.» 30 بَس فیلیپُس ویریته اَرابَه طرف و دَرَسِشَه که درباری خواجه اِشعَیای پیغمبری کِتابی بَخَندی. اَیی نَه واتِشه: «اَ چی که بَخَندیش، فَهمی؟» 31 درباری خواجه واتِشه: «چِنتَه بَشایم بِفَهمِم، اَگَم کسی مِن راهنمایی مَکَرِه؟» بَس فیلیپُسی کا خواهیشت کَردِشه دَنِشِه اَرابَه کا و چَیی وَری کا بِنِشه. 32 خواجه، مقدّس نیویشتَه اون اِم بَخشی کارا بَخَندی که بَواتی: «دُرست، ایلَه گوسَندی شیوار که اَیی کارا بَبردین تا سَر آبِرِن، و ایلَه وَرَه ایی شیوار که اِشتَن پَشم چینون وَری کا ساکیته، اَ، هَته اِشتَن گَ آنِکَردِشه. 33 چَیی حقیر بییِه موقع عِدالت اَیی کا دریغ بَه؛ کی بَشای چَیی نسلی درباره گف بِژَنِه؟ چوم چَیی زندگی زَمینی سَری کا اَیی کا ویگِته بَه.» 34 خواجه، فیلیپُسی نَه واتِشه: «خواهِیشت بَکَردیم مِنه بوآج که پیغمبر اییا کا چیکی درباره گَف بَژی، اِشتَن درباره یا ایی نفر دییَری درباره؟» 35 دومله فیلیپُس دَمندَه گَف ژَندِه و مقدّس نیویشتَه اون هَ بَخشی نَه شروع کَردِشه، عیسی درباره شادَه خَوَر دوشَه. 36 هَتَه که راه کا پیش بَشین، آرَستینَه جِگایی که آو اِستبَه. خواجه واتِشه: «دَیِس، اییا کا آو اِستَه! حِسَه چِه بَشای چِمِن پیشی بِگِرِه تا غسل تعمید مَگِرِم؟» 37 فیلیپُس واتِشه: «اَگم صِدقِ دیلی نَه ایمان وَردَرَه، هیچی اِشتِه پیشی نِگِرِه.» خواجه واتِشه: «ایمان هِستِمَه که عیسایِ مسیح خِدا زوعَه یَه.» 38 خواجه دَستور دوشَه اَرابه غَم بَرِن، و فیلیپُس و خواجه هَر دِ نفر دَشینَه آوی دیلَه و فیلیپُس اَیی تعمید دوشَه. 39 وختی آوی کا بِرون اومینَه، ایی دفعه خِداوندی روح فیلیپُسی پِگِتِشه و بَردِشه و خواجه دِ اَیی نِویندِشه، وَ شادی نَه اِشتَن راه شَه. 40 امّا فیلیپُس اِشتَن، اَشدودی منطقه دیلَه کا ویندِشَه. اَ گِردِ اَ منطقه شهرون دیلَه کا گَردی و اِنجیلی شادَه خَوَری بَدای، تا آرَستَه قیصریه شهری را. |
@ 2024 Korpu Company