رَسولون اَعمال 6 - کتاب مقدس به زبان تالشی شمالیهف نفر اِنتخاب بَبین خدمت کَردِه را 1 اَ روزون کا که شاگِردون تعداد وِرتَر بَبی، یهودیونی که چَوون زوون یونانی بَه، یهودیونی کا که چَوون زوون عِبرانی بَه، گیلایَه کَردِشونَه که چَوون ویوَه ژِنَکون روزونَه غذا سهمی دُرست آنِدَن. 2 اَ دونزَه گِلَه رسول، گِردِ شاگِردون دَخوندِشونَه و واتِشونَه: «دُرست نییَه که اَمَه خِدا کلامی موعظه وِل آکَرَم و چَمَه وختی بِنییَم مردمی غَذا آدییَم. 3 بَس اِی بِرا اِن، اِمی واسی شِمَه دیلَه کا هَف نفر که خوش نومی نَه و خِدا روح و حکمتی کا پور بِبون، اِنتخاب بِکَرَه تا اَوون اِم کاری سَری کا بِنییَم. 4 ولی اَمَه چَمَه وختی گِردی بَنایمون دعا کَردِه را و خِدا کلامی خِدمتی را.» 5 گفی که رَسولِن ژَندِشونَه گِردی نظری کا چاک اومَه. اَوِن اِستیفانی اِنتخاب کَردِشونَه. اَ ایلَه مِردی بَه که ایمان و روح القدسی نَه پُور بَه و اِنتَه نی فیلیپُس، پْروخُروس، نیکانور، تیمون، پارمِناس و نیکولائوسی که اَنطاکیه کا یهودی بییَه بَه، اِنتخاب کَردِشونَه. 6 اِم مِردَکون وَردِشونَه رسولون وَر و رسولِن اَوون را دعا کَردِشونَه و چَوون سَر دَس پِنوشونَه و گِردِ اَوون نوشونَه اِم خِدمتی سَری کا. 7 بَس خِدا کلام گِردِ جِگا کا کارا پَخش آبی و شاگِردون تعداد اورشلیمی کا بَرک وِر آبَه و یهودی کاهِنون کا نی، ایلَه یالَ جماعت ایمان وَردِشونَه. اِستیفانی دَستگیر بییِه 8 اِستیفان فیض و قوّتی نَه پور بَه و مردمی دیلَه کا یالَ علامتون و معجزه اونی بَکَردی. 9 دومله چَن نفر ایلَه عبادتگاهی اَعضا کا که چَیی نوم معروف بِه’آزاد بییَه کَسون عبادتگاه‘، بَه، اِستیفانی نَه بَحث بَکَردین. اَوِن قیرَوانی یهودیون کا و اِسکندریه و کیلیکیه و آسیا اَهالی کا بینَه. 10 ولی اَوِن نیمَشاین اَ حکمت و خِدا روح پیشی کا که اِستیفان چَیی واسطه نَه گَف ژَنی، مقاومت بِکَرین. 11 بَس اَوِن چَن نفری خَلوتَکی وادار کَردشونَه تا بوآجِن: «اَمَه دَرَسِمونَه که اِستیفان، موسی پیغمبر و خِدا نَه کُفر بَواتی.» 12 اَوِن، مردم و شیخون و توراتی معلمون، اِستیفانی ضِد پور آکَردِشونَه و اَوِن ویخِتینَه اِستیفانی سَر، اَیی گِتِشونَه و بَردِشونَه شورا وَر. 13 اَوِن چَن گِلَه دوروعَه شاهد نی وَردِشونَه که بَواتین: «اِم آدَم، اِم کاری کا دَس نِپِگِرِه و هَمش مقدّسَ معبد و شریعتی بَدی بَواتی. 14 چوم اَمَه اِشتَن دَرَسِمونَه که بَواتی اِم عیسایِ ناصری اِم جِگا خَراوه بَکَردی و رسم و رسوماتی که موسی اَمَه آدوعَشه، عوض بَکَردی.» 15 هَ موقع، گِردِ کسونی که شورا دیلَه کا نِشت بینَه، اِستیفانی زول ژَندِشونَه و ویندِشونَه که اِستیفانی دیم ایلَه ملائیکَه دیمی شیوار بَه. |
@ 2024 Korpu Company