رَسولون اَعمال 5 - کتاب مقدس به زبان تالشی شمالیحَنانیا و سَفیرَه 1 امّا ایی نفر که چَیی نوم حَنانیا بَه اِشتَن ژِنی همراه که چَیی نوم سَفیره بَه، ایی تیکه زمینی خِرَتِشه. 2 حَنانیا تِلی اَ زمینی پولی کا، که چَیی ژِن خَوَر داری جِگا دوشَه و پولی بقیه وَردِشه، رسولون پیشی کا نوشه. 3 امّا پطرس اَیی نَه واتِشه: «حَنانیا، چیرا هَشتِرَه شیطان اِشتِه دیلی اِنتَه پُور آکَرِه که روح القدسی نَه دوروع بوآجی و تِلی اَ زَمینی پولی کا بَه تِرا پِگِری؟ 4 مَگم چَیی خِرَته پیش اِشتِه شِن نِبَه؟ مَگم چَیی خِرَته پَش نی اَ پولی اِختیار اِشتِه دَسی کا نِبَه؟ چِه چی باعیث بَه که تِه اِشتِه دیلی کا اِنتَه رَه نییَتی بِکَری؟ تِه نِه اِنسانی نَه، بَلکَم خِدا نَه دوروع واتَرَه!» 5 وختی حَنانیا اِم گَفون دَرَسِشَه، بَلَکَه زمینی کا و اَلبَحَل جان دوشَه! گِردِ کَسونی که اِمی دَرَسِشونَه بَرک تَرسی نَه. 6 اَ موقع جَوونِن اومینَه نار و اَیی کَفَنی کا دَپیچستِشونَه و بَردِشونَه بِرون، دَفن کَردِشونَه. 7 سِه ساعتی پَش، حَنانیا ژِن که اِم ماجرا کا بی خَوَر بَه، اومَه دیلَه. 8 پطرس اَیی کا دَفَرسِشه: «مِنه بوآج که زمینی هِم قیمت خِرَتَرونَه؟» سَفیرَه جَواو دوشَه: «ها، هِم قیمت.» 9 پطرس اَیی نَه واتِشه: «چیرا یَندی نَه هَم دَس بَیرونَه تا خِداوندی روح آزمایش بِکَرَه؟ کسونی که اِشتِه شو دَفن کَردِشونَه حِسَه بَری وَری کا مَندینَه و تِه نی بَبَردین بِرون.» 10 هَ لَحظه، سَفیرَه نی پطرسی پا اون وَری کا بَلَکَه و اَ نی جان دوشَه. وختی جَوونِن دَشینَه دیلَه، ویندِشونَه که سَفیره نی مَردَه. بَس اَیی نی بَردِشونَه بِرون، و چَیی شو وَری کا دَفن کَردِشونَه. 11 دومله بَرکَ تَرسی گِردِ کلیسا و گِردِ کسونی که اِمی دَرَسِشونَه، گِتِشه. روسولون علامت و معجزه اِن 12 رسولِن همیشه مردمی دیلَه کا وِرَه علامت و معجزه اونی بَکَردین و ایماندارِن گِرد یَکدیل سُلیمونِ پاُتشا اَیوونی کا جَمع آبین. 13 امّا بقیه جرئت نِکَرین چَوون مُلحق بِبون، هَر چَن گِردِ مردم اَوون وِر اِحترام بَناین. 14 وِرَه مِردَکِن و ژِنَکِنی بِه خِداوند ایمان بواَردین و چَوون جمعی کا مُلحق بَبین، 15 اِنتَه که حتی مریضون بواَردین شهری مَیدونی کا و اَوون تختون و دوشَکون سَری کا خِساوونین تا وختی پطرس اوآ کا دَوییَره، لااَقَل چَیی سا، چَوون بعضی سَر دَلَکِه و اَوِن شفا بِگِرِن. 16 مردم نی دَسته دَسته اورشلیمی دور و اَطرافی شَهرون کا بومَین و مریضون و کسونی که پَلیدَه روحون گیریفتار بینَه، بواَردین، و گِرد شفا بَگتین. رسولِن بازداشت بینَه و دومله آزاد آبینَه 17 امّا کاهِن اَعظم و گِردِ کسونی که چَیی همراه بینَه یعنی صَدّوقی فِرقَه، حسودی کا دَس بِه کار بینَه 18 و رسولون گِتِشونَه، دَرَفَندِشونَه اَ زندانی دیلَه کا که همه جورَه آدَم اوآکا اِستبَه. 19 ولی شَوی را، خِداوندی ایلَه مَلائیکه زندانی بَرون آکَردِشه و اَوون بِرون وَردِشه 20 و واتِشه: «بِشَه و معبدی کا بومونَه و اِم زندگی بَخشَه پیغومی کامل مردمی را بوآجَه.» 21 بَس صِبی سَر طبق چیی که اَوون نَه واتَه بییَه بَه شینَه معبدی دیلَه و دَمندینَه مردمی تعلیم دوعِه. وختی کاهِن اَعظم و چَیی هَمراه اِن اومینَه، گِردِ شورا اَهالی و گِردِ یهودی مَشایخون دَخوندِشونَه و چَن نفر ویسا آکَردِشونَه تا رسولون زندانی کا بواَرِن. 22 ولی وختی مأمورِن اومینَه، زندانی دیلَه کا رسولون پیدا نِکَردِشونَه. بَس اَوِن آگَردِستینَه و خَوَر وَردِشونَه که: 23 «اَمَه ویندِمونَه که زندانی بَرِن محکم دَوَستَه بینَه. نگهبانِن نی بَرون پیشی کا مَندَه بینَه. ولی وختی بَرون آکَردِمونَه، هیچکسی زندانی کا نِویندِمونَه.» 24 وختی معبدی نگهبانون فرمانده و سَران کاهِنِن اِم خَوَری دَرَسِشونَه هاج و واج مَندینه و فیکر بَکَردین که: «اِم کاری آخِرعاقِبت چِه بَبی؟» 25 اِم موقع، ایی نفر اومَه و واتِشه: «دَیِسه: کسونی که شِمَه اَوون دَرَفَندَرون بَه زندانی کا، حِسَه معبدی دیلَه کا مَندینَه و مردمی تعلیم بَداین.» 26 دومله معبدی نگهبانون فرمانده، مأمورون نَه شینَه و رسولون وَردِشونَه، امّا نِه زورکی، چوم تَرسین مردم اَوون سِنگسار بِکَرِن. 27 وختی رسولون وَردِشونَه، اَوون شورا پیشی کا پا داشتِشونَه. اَ موقع کاهِن اَعظم اَوون کا دَفَرسِشه، واتِشه: 28 «اَمَه شِمَه بَرک قَدغَن کَردَمون بَه که دِ اِم نومِی نَه تعلیم مَدییَه، ولی شِمَه اورشلیمی شهری شِمَه تعلیمون نَه پُور آکَردَرونَه و پیستِرونَه اِم مِردی خونی چَمَه گَردَن دَرَفَنه.» 29 ولی پطرس و دییَر رسولِن جَواو دوشونَه: «اَمَه بَسی خِدا کا اِطاعت بِکَرَم، نِه اِنسانی کا. 30 چَمَه اَجدادون خِدا، هَ عیسایی که شِمَه صلیبی سَری کا اَیی کِشتِرونَه، مَردَه اون دیلَه کا زِنده آکَردِشه 31 و خِدا اَیی بَردِشه کَفا اِشتَن راستَ دَسی وَر، و رهبر و نجات دهنده کَردِشه و فُرصت دوشَه تا یهودی مردم توبه بِکَرِن و چَوون گناه اِن بَخشِسته بِبون. 32 و اَمَه اِم چییون شاهدی مونَه، هَتَه که روح القدس نی شاهِدَه، هَ روحی که خِدا اَیی کسونی عَطا کَردَشه که چَیی مطیعی اینَه.» 33 وختی شورا اَعضا اِم گَفون دَرَسِشونَه اِنتَه عصبانی آبینَه که پیستِشونَه اَوون بِکِشین. 34 امّا ایی نفر فریسی فِرقه عُلما کا، که چَیی نوم گامالائیل بَه و شَریعتی معلم بَه و گِردِ مردم اَیی اِحترام بَناین، مِجلِسی کا پا مَندَه و دَستور دوشَه چَن لحظه رسولون بِبَرِن بِرون، 35 و اَوون نَه واتِشه: «اِی یهودییِن، شِمَه هَواس جَمع بِبو که پیستِرونَه اِمون نَه چِه بِکَرَه. 36 چوم چِندی وخت پیش، ایلَه مِردی که چَیی نوم تِئوداس بَه پِرِشتَه که اِدِعا بَکَردی اِشتَرا کسی یَه، و تقریبا چهارصد نفر نی اِشتَن دور و وَری کا جمع آکَردِشه. ولی اَیی کِشتِشونَه و چَیی دار و دَسته نی گِرد تار‌و‌مار بینَه. 37 چَیی پَش، جَلیلی یَه یهودا، سَرشماری موقع شورش کَردِشه و ایی دَسته نی اِشتَن دومله بَردِشه. امّا اَ نی از بِین شَه و چَیی دار و دسته نی وِلا آبینَه. 38 بَس اِم مسئله درباره نی شِمَه سفارش بَکَردیم که اِم آدَمون کا دَس پِگِرَه و اَوون چَوون حال بِنییَه. چوم اَگم چَوون قَصد و نیّت اِنسانی بِبو، جِگایی آنِرَستِه. 39 امّا اَگم خِدا کا بِبو، نیمَشایه چَوون پیشی بِگِرَه، چوم اِنتَه خِدا نَه جنگ بَکَردیرون!» 40 بَس اَوِن گامالائیلی نصیحتی گوش دوشونَه و رسولون دَخوندِشه، اَوون شِلاق ژَندِشونَه و قَدغَن کَردِشونَه که دِ عیسی نومی کا گَفی مَواجِن، اَ موقع اِجازه دوشونَه رسولِن بِشون. 41 بَس رسولِن شورا اَعضا وَری کا شینَه بِرون و چوم اَوِن لایق بینَه که عیسی نومی واسی بی حرمتی بِوینِن، خوشحال بینَه. 42 و اَوِن هَر روز چِه معبدی کا و چِه کَ اون کا، اِم تعلیم و بِشارتی کا دَس نِپِگِتشونَه که مسیح موعود، هِم عیسی یَه. |
@ 2024 Korpu Company