رَسولون اَعمال 4 - کتاب مقدس به زبان تالشی شمالی

پطرس و یوحنا، یَهودییون شورا پیشی کا

¹ پطرس و یوحنا حَلا مردمی نَه گف ژَنین که کاهِنِن و معبدی نگهبانون فرماندَه و صَدّوقی فِرقه عُلما، سَر آرَستینَه.

² اَوِن اِمی واسی که رسولِن مردمی تعلیم بَداین و اِعلام بَکَردین که عیسی مَردَه اون دیلَه کا زِنده آبییَه، بَرک عصبانی بینَه.

³ بَس اَوون گِتِشونَه و چوم مَغریب دَم بَه، تا صَبایی نَه روز اَوون زندانی کا غَم هَردِشونَه.

⁴ امّا وِر کَسِن اَوون کا که اَ کلامی دَرَسَشون بَه، ایمان وَردِشونَه و مِردَکِن نِزدیک بِه پینج هَزار نفر بینَه.

⁵ صَبایی نَه روز، قومی پیلَه تَرِن و شیخِن و توراتی معلِمِن، اورشلیمی شهری کا یَندی نَه جمع آبینَه.

⁶ اِم مِجلِسی کا، کاهِن اَعظم حَنّا و قیافا و یوحنا، اِسکندر و کاهِن اَعظمی خانواده گِرد مَندَه بینَه.

⁷ اَوِن پطرس و یوحنا وسطی کا پا داشتِشونَه، اَوون کا دَفَرسِشونَه: «شِمَه چِه قدرت و چِه نومی نَه اِم کاری کَردَرونَه؟»

⁸ دومله پطرس روح القدسی کا پور آبَه، چَوون جَواوی کا واتِشه: «اِی قومی پیلَه تَرِن و شیخِن،

⁹ اَگم اوری اِمی واسی اَمَه بازخواست بَکَردیرون که ایلَه شَلَ مِردی حقی کا چاکی کَردَمونَه، و دَفَرسَه اَ چِنتَه شفا گِتَشه،

¹⁰ بَس شِمَه گِرد و یهودی مردم گِرد، بِزونَه که عیسایِ مسیحِ ناصری نومی نَه یَه که اِم مِرد شِمَه پیشی کا سَق و سلامت مَندَه، هَ کسی نومی نَه که شِمَه، صلیبی سَری کا اَیی کِشتِرونَه امّا خِدا اَیی مَردَه اون دیلَه کا زِنده آکَردِشه.

¹¹ هِم عیسی، هَ سِنگی یَه که شِمَه بَنّا یِن اَیی رَد آکَردِرونَه و حِسَه بینا اَصلی ترین سِنگ بییَه.

¹² چَیی غِیراز هیچکسی دیلَه کا نِجات نییَه، چوم آسِمونی جیری کا دییَر نومی آدَمون آدوعَه بَه نییَه تا بَیی نَه نِجات پِیدا بِکَرَم.»

¹³ وختی اَوِن پطرس و یوحنا جرئتی ویندِشونَه و زونِستِشونَه که بیسواد و معمولی یَه آدَمونی اِستینَه، تعجب کَردِشونَه و زونِستِشونَه که عیسی همراه بینَه.

¹⁴ ولی چوم اَ شفا گِتَه مِرد، پطرس و یوحنا وَری کا مَندَه بَه، اَوِن نِشاستِشونَه چَوون ضِد چیی بوآجِن.

¹⁵ امّا دستور دوشونَه که اَوِن مِجلِسی کا بِشون بِرون و اِشتَن دَمندینه یَندی نَه مشورت کَردِه.

¹⁶ اَوِن یَندی نَه واتِشونَه: «اِم دِ نفری نَه چِه بِکَرَم؟ چوم اورشلیمی مردم گِرد بَزنین ایلَه معجزه چَوون دَسی نَه اَنجام بییَه و اَمَه نیمَشایَم اَیی هاشا بِکَرَم.

¹⁷ ولی تا اِم جریان اِمی کا وِرتَر مردمی دیلَه کا چُو دَلَکه نییَه، بَسی اِم مِردَکون قَدغَن بِکَرَم که دِ عیسی نومی درباره هیچکسی نَه گف مَژَنِن.»

¹⁸ دومله هَنی اَوون دَخوندِشونَه و حُکم کَردِشونَه که هَرگز عیسی نومی موَرِن و تعلیم مَدَن.

¹⁹ امّا پطرس و یوحنا جَواو دوشونَه: «شِمَه اِشتَن داوری بِکَرَه، کَمیله خِدا نظَری کا درستَه، شِمَه کا اِطاعت کَردِه یا خِدا کا اِطاعت کَردِه؟

²⁰ چوم اَمَه نیمَشایَم اَ چیی که ویندَمونَه و دَرَسَمونَه، مَواجَم.»

²¹ شورا اَعضا، بعد از اِم که پطرس و یوحنا وِر تهدید کَردِشونَه اَوون وِل آکَردِشونَه، چوم مردمی واسی رایی نِتلَفتِشونَه که اَوون مجازات بِکَرِن. چوم که گِردِ مردم، چییونی واسی که اِتِفاق دَلَکه بَه، خِدا ستایش بَکَردین.

²² چوم اَ شَلَ مِردی که معجزه‌ نَه شفا گِتَش بَه، چِل سالی کا نی وِرتَر سیند داری.

ایماندارِن پطرس و یوحنا را دعا بَکَردین

²³ پطرس و یوحنا آزاد آبییِه پَش آگَردِستینَه اِشتَن رَفِقون وَر و اَ چیی که سَران کاهِنِن و شیخِن اَوون نَه واتَشون بَه، چَوون را واتِشونَه.

²⁴ وختی ایماندارِن اِمی دَرَسِشونَه، یَکصدا خِدا دَرگاه کا دعا کَردِشونَه، واتِشونَه: «اِی خِداوندی که گِردِ چییون حاکِمیش، اِی خِدایی که آسِمون و زمین و دریا و هَر چیی که چَوون دیلَه کا یَه خلق کَردَره،

²⁵ تِه اِشتَن روح القدسی واسطه نَه چَمَه جَّد، اِشتِه خادِم داوود پاُتشا زَوونی نه واتِرَه که: «”چِه چیی واسی قومِن شورش بَکَردین و مَردمِن بیخودی توطئه بَکَردین؟

²⁶ زمینی پاُتشایِن هَمدَس بَبین و فرمانرَوا اِن یَندی نَه جمع آبون، خِداوندی ضِد و چَیی مسیح ضِد.“

²⁷ راس راسی که هِم شهری کا، هیرودیسِ حاکِم و پُنتیوس پیلاتُس، غیریهودیون و یهودیون نَه، اِشتِه مقدّسَ خادِم، عیسی ضِد که اَیی مَسح کَردِرَه، هَمدَس بینَه،

²⁸ تا اَ چییونی اَنجام بِدَن که اِشتِه دَس و اِشتِه اِرادَه، پیشتری مُعیَن کَردَش بَه.

²⁹ حِسَه، اِی خِداوند، چَوون تهدیدون دَرَس و اِشتِه خادِمون لطف بِکَه تا گِردِ اِشتَن دیل و جرئتی نَه اِشتِه کلامی بوآجِن،

³⁰ و اِشتِه دَسی نی شفا دوعِه را دِراز آکَه و اِشتِه مقدّسَ خادِم، عیسی نومی کا، علامت و مُعجزه اون اَنجام بِدَه.»

³¹ چَوون دعا کَردِه پَش، جِگایی که اَیی کا جمع آبَه بینَه لَرزِستَه و گِرد روح القدسی کا پُور آبینَه، و خِدا کلامی دیل و جرئتی نَه بَواتین.

ایماندارِن یَندی مال و مَنالی کا شَریک بَبین

³² گِردِ ایماندارِن یَکدیل و یَک جان بینَه و هیچکس چیی اِشتَن مال و مَنالی کا اِشتَن شِن نیمَزنی، بَلکَم گِردِ چیون کا یَندی نَه شریک بینَه.

³³ رَسولِن بَرکَ قوّتی نَه، عیسایِ خِداوندی زِنده آبییِه درباره شهادتی بَداین و خِدا بَرکَ فیض، چَوون گِردی سَری کا بَه.

³⁴ هیچکس چَوون دیلَه کا مُحتاج نِبه، چوم هَر کسی زَمین یا کَ ایشی اِستبَه، خِرَشی و چَیی پولی

³⁵ رسولون پیشی کا بَنای، تا هَر کسی اِحتیاجاتی قَدَر گِردی میانه کا تقسیم بِبو.

³⁶ یوسف نی که لاوی قبیله کا و قِپرِسی بَه، رسولِن اَیی بَرنابا لقب دوعَشون بَه، که چَیی معنی ’تشویقی زوعَه‘ یَه.

³⁷ بَرنابا زمینی که داری، خِرَتِشه و چَیی پولی وَردِشه، رسولون پیشی کا نوشَه.