رَسولون اَعمال 3 - کتاب مقدس به زبان تالشی شمالیمادَرزاده شَلی شفا 1 ایی روز پطرس و یوحنا ساعت سِه بعد از ناهار که دعا کَردِه موقَع بَه، کارا بَشین معبدی را. 2 اَ موقع، چَن نفر، ایلَه مِردی کارا بواَردین که مادَرزادی شَل بَه. اَوِن اَ مِردی هَر روز معبدی اَ دروازه ای کناری کا نیشونین که چَیی نوم ’قشنگَ دروازۀ‘ بَه تا مردمی کا که معبدی دیلَه دَشین، صَدَقه ویگِرِه. 3 وختی اَ شَلَ مِرد، پطرس و یوحنا ویندِشه که پیستِشونَه دَشون معبدی دیلَه، اَوون کا صَدَقه پیستِشَه. 4 پطرس و یوحنا اَ شَلَ مِردی زول ژَندِشونَه؛ پطرس اَیی نَه واتِشه: «بَمون دَیِس!» 5 اَ شَلَ مِرد اَوون دَیشتَه و منتظر بَه که اَوِن ایی چیی آدَن بَیی. 6 امّا پطرس اَیی نَه واتِشه: «از نِه نِقره هِستِمَه نِه طِلا، امّا اَ چیی کا که هِستِمه بَه تِن آدَم! عیسایِ مسیحِ ناصری نومی کا پِرِز و راه بِش!» 7 دومله پطرس اَ شَلَ مِردی راستَ دَسی گِتِشه و اَیی چَیی جِگا کا پِرِزاوندِشه. هَ لَحظه شَلَ مِردی پااِن و چَیی زِنگِن قوّت گِتِشونَه 8 اِشتَن جِگا کا وَشتَه و اِشتَن پااون سَر پا مَندَه، راه دَلَکه. دومله هَتَه که وَشتِه واز بَکَردی خِدا شُکر بَکَردی و اَوون نَه دَشه معبدی دیلَه. 9 گِردِ مردم اَیی ویندِشونَه که راه بَشی و خِدا شُکر بَواتی، 10 و زونِستِشونَه اَ، هَ شَلَ مِردی یَه که صَدَقه ویگِتِه را معبدی ’قَشنگَ دروازۀ‘ وَری کا نِشی؛ اَ چیی کا که اَیی را اِتِفاق دَلَکَه بَه، مات و مبهوت بینَه. پطرسی گَفِن سلیمونی اَیوونی کا 11 هَتَه که اَ مِرد پطرس و یوحنا همراه بَشی و اَوون کا جِدا آنِبی، گِردِ جَماعت حَیرون ’سلیمونِ پاُتشا اَیوونی کا‘ چَوون طرفی را ویریتینَه. 12 وختی پطرس اِمی ویندِشه، جَماعتی دَیشتَه و واتِشه: «اِی یهودی مِردَکِن، چیرا اِم کاری کا اِنتَه تعجب کَردِرونَه؟ چیرا بَمون زول ژَندَرونَه، اِنگاری که اَمَه، چَمَه قوّتی نَه و دینداری نَه، کاری کَردِمونَه که اِم مِرد راه بِشو؟ 13 اِبراهیمی خِدا و اِسحاقی خِدا و یعقوبی خِدا، چَمَه اَجدادی خِدا، اِشتَن خادِمی، عیسی جلال دوشَه، هَ کسی که شِمَه اَیی تسلیم کَردِرونَه و پیلاتُسِ فرمانداری ناری کا اَیی هاشا کَردِرونَه، هَرچَن پیلاتُسی تصمیم اِم بَه که عیسی آزاد آکَری. 14 ولی شِمَه اَ قدّوس و صالِحی هاشا کَردِرونَه، و پیستِرونَه چَیی عَوض ایلَه قاتل شِمَه را آزاد آبو. 15 شِمَه، اَ کسی که زندگی سرچشمۀ بَه کِشتِرونَه، امّا خِدا اَیی مَردَه اون دیلَه کا زِنده آکَردِشه و اَمَه چَیی شاهِدونی مونَه، 16 و عیسی نوم و چَیی نومی ایمانی نَه یَه که اِم مِرد قوّت گِتَشَه، اِم مِردی که اَیی بَویندیرون و آزونَه. ایمانی که چَیی نومی واسطه نَه اِم مِردی شِمَه گِردی چِمی پیشی کا کامل شفا دوعَشَه. 17 «و حِسَه اِی بِرا اِن، بَزنیم که شِمَه کار و شِمَه قومی پیله تَرون کار، نادونی کا بَه. 18 ولی خِدا هِم راه نَه اَ چیی که گِردِ پیغمبرون زَوونی نَه پیشگویی کَردَش بَه که چَیی مسیح رنج کَشِه، اَنجام دوشَه. 19 بَس توبه بِکَرَه و آگَردَه خِدا طرف تا شِمَه گناه اِن پاک آبون، 20 تا اَ زمانی آرَستِه که خِداوندی حضوری کا شِمَه را تازَگی با و تا خِدا، مسیحِ موعودی شِمَه را ویسا آکَرِه که پیشتَری اِنتخاب بییَه، یعنی هَ عیسی 21 که آسِمون بَسی اَیی قبول بِکَری تا روزونی که گِردِ چییِن طبق اَ چیی که خِدا قَدیمی کا گِردِ اِشتَن مقدّس پیغمبرون زوونی نَه واتَشه، اِتِفاق دَلَکِن. 22 موسایِ پیغمبر واتَشه: ”خِداوندْخِدا، شِمَه بِرا اون دیلَه کا، چِمِن شیوارَه پیغمبری، شِمَه را ویسا آکَرِه؛ هَر چیی که اَ شِمَه نَه بوآجِه بَسی گوش آکَرَه. 23 هَر کسی که اَ پیغمبری گفون گوش مَدَه، قومی دیلَه کا نابود بَبی.“ 24 «گِردِ پیغمبرِن نی که سموئیلَ پَش اومینَه، گِرد یَکصدا اِم روزون درباره پیشگویی کَردَشونَه. 25 و شِمَه، پیغمبرون خِردَنونی رونَه. اَ عهدی وارثی رونَه که خِدا شِمَه اَجدادی نَه دَوَستِشه. اَ زمانی که اِبراهیمی نَه واتِشه: ”اِشتِه نَسلی واسطه نَه گِردِ مردمی که زمینی سَری کا اینَه بَرَکت بَگتین.“ 26 وختی که خِدا اِشتَن خادم، عیسی اِنتخاب کَردِشه، اوّل اَیی ویسا آکَردِشه شِمَه وَر تا شِمَه هَر کمیله بَرَکت بِدَه، و اِم کاری نَه شِمَه، شِمَه شَرورانَه راه اون کا آگاردِنِه.» |
@ 2024 Korpu Company