رَسولون اَعمال 28 - کتاب مقدس به زبان تالشی شمالی

مالتی جزیرۀ

¹ وختی سلامتی نَه آرَستیمونَه ساحِل، زونِستِمونَه که اَ جزیره نوم مالتَه.

² اَ جزیره آدَمِن بَمون وِر میهروونی نَه رفتار کَردِشونَه. اَوِن اَمَه را آتش روشون آکَردِشونَه، چوم وارِش بَوارستی و هَوا سَرد بَه، و اَمَه گرمی نَه قبول کَردِشونَه.

³ پولس تِلی ایزِم جَمع آکَردِشه و وختی اَ ایزِمی پِنَی آتشی سَر، آتشی آلاوی واسی، ایلَه نَلتی آتشی دیلَه کا اومَه بِرون و دَچیکِستَه پولسی دَسی.

⁴ اَ جَزیره آدَمِن وختی ویندِشونَه که نَلتی پولسی دَسی کا آویزونَه، یَندینَه واتِشونَه: «حَتمن اِم مِرد آدَمَ کِشَه که هَر چَن دَریا کا نِجات پیدا کَردِشه، عِدالت نییَرزه زِنده بومونِه.»

⁵ پولس نَلتی دَرَفَندِشه آتشی دیلَه و اِشتَن هیچیش نِبَه.

⁶ مردم اِنتظار دارین چَیی بَدَن فو آکَرِه یا اِم که ایی دَفعه بَلَکِه و بِمِرِه. امّا وِر منتظر بییَه پَش، وختی ویندِشونَه هیچ آسیبی نِویندِشه، چَوون فیکر عوض آبَه و واتِشونَه اَ ایلَه خِدا اون کا یَه.

⁷ اَ نِزدیکی کا زَمینونی بینَه که جزیره رَئیسی شِن بَه که چَیی نوم پوبلیوس بَه. اَ اَمَه دعوت کَردِشه اِشتَن کَ و سِه روز گَرمی نَه اَمَه کا پذیرایی کَردِشه.

⁸ از قضا، پوبلیوسی دَده مَریض بَه و جِگا کا دَلَکه بَه و تَو و اِسهال داری. پولس شَه چَیی وَر و دعا کَردِشه، چَیی سَری دَس پِنوشَه و اَیی شفا دوشَه.

⁹ اِم اِتِفاقی پَش، بَقیَه ی مَریضِنی که جزیره کا بینَه، بومَین و شفا بَگتین.

¹⁰ اَوِن اَمَه وِر اِحترام نوشونَه، و وختی پیستِمونَه اوآنَه بِشَم، هَر چیی که اِحتیاج داریمون اَمَه را تهیه کَردِشونَه.

پولُس آرَستِه روم

¹¹ سِه مانگی پَش، اَ کشتی‌ ای نَه که زوموستونی را جزیره کا مَندَه بَه، دَریا را رایی بیمونه. اَ کشتی اِسکندریه کا بَه و ”دِ پِیکَری“ نیشونه داری.

¹² اَمَه آرَستیمونَه سیراکوزی شهری را، لنگر دَرَفندِمونَه و سه روز اوآکا مَندیمونَه.

¹³ دومله دریای یَه سفری اِدامه دومونَه و آرَستیمونَه ریگیونی شهر. صَبایی نَه روز، جنوبی یَه وا شروع بَه، و پَشرایی اَمَه آرَستیمونَه پوتیولی شهر.

¹⁴ اوآ کا چَن گِله بِرا اونی ویندِمونَه که اَمَه کا دعوت کَردِشونَه هفت روز اَوون نَه بومونَم. آخِرسَر آرَستیمونَه رومی شهر.

¹⁵ وختی اوآ بِرا اِن دَرَسَشون بَه که اَمَه راه کا ایمونَه، اومینَه تا آپیوسی بازار و ایلَه آوادی که چَیی نوم ’سه میخونه‘ یَه، تا بان چَمَه پیشواز. وختی پولس اَوون ویندِشه خِدا شُکر کَردِشه و چَیی دیل قوّت‌ گِتِشه.

¹⁶ وختی آرَستیمونَه روم، پولسی اِجازَه دوشونَه که ایلَه محافظَه سربازی نَه اِشتَن کَ کا بومونِه.

پولس رومی کا

¹⁷ سِه روزَه پَش، پولس یَهودییون پیله تَرون دَخوندِشه اِشتَن وَر. وختی جَمع آبینَه، اَوون نَه واتِشه: «اِی بِرا اِن، هَر چَن اَز، چِمِن قومی ضِد یا چَمَه اَجدادی رسم و رسوماتی، ضِد کاری کَردم نِبَه، مِن اورشلیمی کا دستگیر کَردِشونَه و تحویل دوشونَه رومیون.

¹⁸ وختی اَوِن مِن کا بازجویی کَردِشونَه پیستِشونَه مِن آزاد آکَرِن، چوم بَه مِن کا هیچ جُرمی نویندِشونَه که چَیی سِزا مرگ بِبو.

¹⁹ امّا چوم یَهودییِن اِعتراض کَردِشونَه، ناچار بیمَه اِمپِراطوری کا داد خواهی بِکَرِم، البته نِه اِمی واسی که چِمِن قومی کا شکایت کَردَم بِبو.

²⁰ اِمی واسی پیستِمَه شِمَه بِوینِم و شِمَه نَه گَف بِژَنِم، چوم یهودی قومی اَ، اُمیدی واسی یَه که مِن اِم قُول و زنجیری کا دَوَستَشونَه.»

²¹ اَوِن پولُسی نَه واتِشونَه: «اَمَه یهودیه کا اِشتِه درباره هیچ نامه‌ای دریافت کَردَه نیمونَه، و هیچ گِله بِرا اونی کا که اوآکا اومَینه، اِشتِه درباره هیچ بَدَه چیی نِواتِشونَه و خَوَری نِدوشونَه.

²² ولی پیستِمونَه اِشتِه نظری دَرَسَم، چوم بَزنیمون که مردم هَر جِگا کا اِم فِرقه ضِد گَف ژَنِن.»

²³ بَس ایی روز اِنتخاب کَردِشونَه و وِر کَسِن اومینَه پولُسی کَ تا اَیی بِوینِن. اَ صِبی نَه تا شَو، خِدا پاُتشایی درباره اَوون نَه گف ژَنی و تَقَّلا کَردِشه که موسی تورات و پیغمبرون نیویشته اون نَه، عیسی درباره اَوون قانع بِکَرِه.

²⁴ بعضی چَیی گَفون نَه قانع بینَه، امّا اَلباقی ایمان نوَردِشونَه.

²⁵ بَس هَتَه که یَندینَه جرّ و بَحث بَکَردین، اوآنَه شینَه. امّا پیش از اِم که اوآنَه بِشون، پولس اِشتَن آخِرین گفی ژَندِشَه و واتِشه: «روح القدس چِه درست شِمَه اَجدادی نَه گَف ژَندِشَه، اَ موقعی که اِشعَیای پیغمبری واسطه نَه واتِشه که:

²⁶ «”بِش اِم قومی وَر و بوآج، ’حقیقتن شِمَه گوشی نَه دَرَسَه، ولی هَرگز نِفهمَه؛ حقیقتن شِمَه چِمی نَه بَویندیرون، ولی هَرگز دَرک نِکَرَه.‘

²⁷ چوم اِم قومی دیل سِنگ آبَه، چَوون گوشِن سَنگین آبَیینَه، و اِشتَن چِمون دَوَستَشونَه، نَبادا اِشتَن چِمون نَه بِوینن، و اِشتَن گوشون نَه دَرَسِن، و اِشتَن دیلون کا بِفهمِن و آگَردِن و اَز اَوون شَفا بِدَم.“

²⁸ «بَس بِزونَه که خِدا نِجات غیریهودیون وَر ویسا آبَه و اَوِن گوش بَداین!»

²⁹ بعد از اِم که پولس اِمی واتِشه، یَهودییِن هَتَه که یَندینَه بَدجوری جرّ و بَحث بَکَردین اوآنَه شینَه.

³⁰ پولس دِ سال تَمون اِشتَن کَ کا که اِجاره‌ ش کَردَه بَه مَندَه و هَر کسی که بومَی چَیی وَر، قبول بَکَردی.

³¹ پولس خِدا پاُتشایی اِعلام بَکَردی و جُرئتی نَه و بیدون اِم که کسی چَیی پیشی بگِرِه عیسایِ مسیحِ خِداوندی درباره تعلیم بَدای.