رَسولون اَعمال 27 - کتاب مقدس به زبان تالشی شمالی

پولس بَشی رومی را

¹ وختی تصمیم گِتِشونَه که دَریا راه نَه بِشَم ایتالیا را، پولس و بعضی دییَر زِندانیون تحویل دوشونَه ایی نفری که چَیی نوم یولیوس بَه و اِمپراطوری گُردانی اَفسرون کا بَه.

² ایلَه کشتی‌ای که اَدرامیتینوسی شهری کا اومَه بَه و بَشی آسیا ایالتی بَندَرون را، اَیی دَنِشتیمونَه و حرکت کَردِمونَه. آریستارخوسِ مقدونی که تَسالونیکی شهری شِن بَه نی چَمَه همراه بَه.

³ صَبایی نَه روز آرَستیمونَه صِیدونی شهری را. یولیوس میهروونی نَه پولسی اِجازه دوشَه بِشو اِشتَن رَفِقون وَر تا چَیی اِحتیاجاتی بَرطرف بِکَرِن.

⁴ اوآنَه هَنی رایی بیمونَه دریا را، ولی برعَکسَه وا وَزی، بَس مجبور بیمونَه راه دَلَکَم قِپرسی اَ طرفی را که وا نِوَزی.

⁵ کیلیکیه و پامفیلیه بَندرون کا دوییَردِه پَش، میرا بندری کا، که لیکیه منطقه کا یَه پیاده آبیمونَه.

⁶ اوآ کا ایلَه رومی یَه اَفسر ایلَه کَشتی‌ای تِلَفتِشه که اِسکندریه شهری کا کارا بَشی ایتالیا را، و اَمَه دَنِشاووندِشَه اَیی کا.

⁷ چَن روز یَواش یَواش پیش شیمونَه و سختی نَه آرَستیمونَه کْنیدُوسی ساحِلی را. چوم بَرعکسَه وا وَزی مجبور بیمونَه که چَمَه مسیری عوض آکَرَم و بِشَم کِرتی جزیره اون را که وا نِوَزی. تا سالمونی شهری را پیش شیمونَه.

⁸ ساحِلی کناری کا سختی نَه دَوییَردیمونَه و آرَستیمونَه جِگایی که چَیی نوم ’قشنگَ بندرون‘ بَه و لاسائیَه شهری نِزدیکی کا بَه.

⁹ چوم که وِر وخت تَلَف بییَه بَه و حتی اَ روزونی که روزه گِرین نی دَوییَرده بینَه، دِ حِسَه دریایی یَه سفر خَطَرناک بَه، اِمی واسی پولس اَوون نصیحت کَردِشه، واتِشه:

¹⁰ «آقایِن، بَشایم بِوینِم که پُور خطر سفری دارَم و نِه فقط وِرَه ضَرری کشتی و چَیی باری گِنِه، بَلکَم چَمَه جان نی آسیب بَویندی.»

¹¹ امّا رومی یَه اَفسر، ناخدا گفون و کَشتی صاحابی گفون وِرتَر اَهمیت بَدای تا پولسی گَفون.

¹² چوم اَ بندر زوموستونی گُذَروندِه را مِناسِب نِبَه، چَوون وِرتَرینون تصمیم اِم بَه که سَفری ادامه بِدییَم، اِم اُمیدی نَه که آرَستَم فینیکسی بندر و زوموستونی را اوآ کا بومونَم. اِم بندر کْرتی کا بَه و هَم جنوب غربی طرفی را و هَم شمال غربی طرفی را بَه.

دَریا کِلاک

¹³ وختی جنوبی وا یَواش یَواش وَزَه، اَوِن خَیال کَردشونَه آرَستینَه اِشتَن مقصد؛ بَس کَشتی لَنگری دَرونتِشونَه و کْرِتی ساحِلی را پیش شینَه.

¹⁴ امّا چیی دَوییَرده نِبَه که وِرَه تِندَه وایی، که معروف بِه شمال شرقی یَه وا بَه، جزیره طرفی نَه چَمَه طرفی را وَزی.

¹⁵ کَشتی کِلاکی گیریفتار بَه و نِشاستِشه اَ وا خَلافی را پیش بِشو؛ اِمی واسی، اِشتَن دَسپَردِمونَه وا دَس و اَیی نَه شیمونَه.

¹⁶ ایلَه روکه جزیره‌ای پِشتی کا که چَیی نوم کُودا بَه پناه گِتِمونَه و هَزار زَحمتی نَه شاستِمونَه آرَستَم اَ روکَه لوتکایی وَر که کَشتی پِشتی کا بَه تا اَیی پِگِرَم.

¹⁷ وختی مَلَوانِن لوتکا وَردِشونَه کَشتی عَرشۀ سَر، لافِندون کمکی نَه، کَشتی دُوری محکم دَوَستِشونَه تا کشتی وِلا آمَبو، و از تَرس اِم که نَبادا کَشتی سیرتیسی فورشی دیلَه کا ویشو، لَنگر دَرَفَندِشونَه و کشتی وا مسیری کا وِل آکَردِشونَه.

¹⁸ چوم کِلاک بَدجور اَمَه ضربه ژَنی، صَبایی نَه روز مَجبور بینَه کَشتی باری دَریا دیلَه کا ویکَرِن.

¹⁹ سوّمین روز، اِشتَن دَسون نَه کَشتی اَساسی دَرَفَندِشونَه دَریا دیلَه کا.

²⁰ روزِن هَتَه دَوییَرین و اَمَه آفتاو و ستاره اون رنگی نی نِوینیمون و کِلاک نی نِنِشی، اِنتَه که اَمَه گِرد، هیچ اُمیدی نجاتی را نِداریمون.

²¹ چوم که خَیلی وخت بَه که غذا هَردَشون نِبه، پولس چَوون دیلَه کا پا مَندَه و واتِشه: «آقایِن، شِمَه بَسی چِمِن گَفی گوش بِدَریرون و کْرتی نَه مَشه تا اِم همه ضَرر و زیان مَوینَه.

²² حِسَه نی شِمَه تشویق بَکَردیم که شِمَه دیل قُرص بِبو، چوم شِمَه هیچ گِله جانی ضَرری آنِرَستِه؛ فَقَط کشتی از بِین بَشی.

²³ چوم که زیرَه شَو خِدا ایلَه ملائیکه، خِدایی که از چَیی شِنیمَه و اَیی خِدمت بَکَردیم، چِمِن وَری کا مَندَه

²⁴ و واتِشه: ”پولس، مَترس. تِه بَسی محاکمه را اِمپراطوری پیشی کا حاضِر بِبی، و مطمئن بِبَش که خِدا گِرد اِشتِه هَمسَفرون جانی نی بَه تِن بَبَخشِستی.“

²⁵ بَس اِی مِردَکِن، شِمَه دیل قُرص بِبو، چوم بِه خدا ایمان دارِم که هَتَه که مِنه واتَشه، دقیقاً هَتَه بَبی.

²⁶ امّا چَمَه کشتی بَسی ایلَه جزیره‌ای کا تِوِلی کا بِنِشه.»

²⁷ چهاردهمین شَوی کا، حَلا آدریاتیکی دریا کا وا اَمَه اِم طَرف اَ طَرفی را بَبَردی که نِصب شَوی نِزدیکی، مَلوانِن گمون کَردِشونَه که کارا خِشکی نِزدیک آبون.

²⁸ بَس آوی عمقی اندازه گِتِشونَه و فهمِستشونَه که آوی عمق چهل مِترَه. تِلی پَش، هَنی آوی عمقی اندازه گِتِشونَه و ویندِشونَه سی مِترَه.

²⁹ و چوم تَرسین که صخره‌ اون کا بِگِنَم، چار گِله لنگر کَشتی پِشتی کا دَرَفندِشونَه، و دعا بَکَردین که هَر چِه زودتر روز آبو.

³⁰ مَلوانِن پیستِشونَه کشتی کا دَوَزین. بَس اَ روکَه لوتکا دَرَفَندِشونَه دریا دیلَه کا، بِه اِم بهونه که پیستِشونَه چَن گِله لنگر کشتی سینه کا دَرَفَنِن دریا دیلَه.

³¹ پولس، اَ، اَفسر و سَربازون نَه واتِشه: «اَگم اِم مِردَکِن کشتی کا مَمونِن، نیمَشایَه نِجات پَیدا بِکَرِه.»

³² دومله سَربازِن اَ لافِندونی که روکَه لوتکا اَوون نَه دَوَسته بَه، دَوِردِشونَه و لوتکا وِل آکَردِشونَه.

³³ تِلی آفتاوی پِرمَه پیش، پولس گِردی تشویق کَردِشه که چیی بَرِن. واتِشه: «اوری چهارده روزَه که چِم بِرا ایرونَه و چیی هَردَرون نییَه، بی‌غذا مَندیرونَه.

³⁴ بَس خواهیشت بَکَردیم غَذا بَرَه، چوم شِمَه قوّت بَدای. چوم که ایلَه تار مو نی شِمَه هیچ گِله سَری کا کم نییَب.»

³⁵ وختی پولس اِمی واتِشه، نون پِگِتشه و گِردی پیشی کا خِدا شُکور کَردِشه و نونی پَله کَردِشه، دَمَندینَه بِه هَردِه.

³⁶ دومله گِرد دیلگرم بینَه و غَذا هَردِشونَه.

³⁷ کشتی دیلَه کا، اَمَه گِرد دویست و هفتاد و شیش نفر بیمونَه.

³⁸ اَوِن وختی غذا هَردِشونَه و سیر آبینَه، بقیۀ غَله دَرَفَندِشونَه دریا دیلَه کا و کَشتی سبک آکَردِشونَه.

³⁹ وختی روز آبَه، خِشکی آنِزونیشونَه، امّا ایلَه روکَه خَلیجی که ساحِلی فورشی نَه پُور بَه، ویندِشونَه. بَس پیستِشونَه که اَگم بِبو اوآکا کَشتی تِوِلی سَر بِنِشونِن.

⁴⁰ بَس لَنگرون لافِندون دَوِردِشونَه و اَوون دَریا دیلَه کا وِل آکَردِشونَه و اَ لافِندونی که سُکانی غَم هَرین نی آکَردِشونَه. دومله، کشتی سینه بادبانی وا مسیری کا کَفا کَشِشونَه و شینَه ساحِلی طرفی را.

⁴¹ امّا کشتی آوی جیری ایلَه کولون کا گِنَه و تِوِلی کا نِشتَه. کشتی سینه ثابِت و بی‌حرکت مَندَه، امّا کشتی پِشت، دریا موجون ضربه اون واسی چَکَه.

⁴² سَربازِن پیستِشونَه زِندونیون بِکِشِن نَبادا کسی شنا کَرون دَوَزِه.

⁴³ امّا اَ رومی یَه اَفسر که پیستِشَه پولسی جانی نِجات بِدَه، چَوون پیشی گِتِشه و دَستور دوشَه اوّل کَسونی که بَشاین شنا بِکَرِن، اِشتَن دَرَفنِن دریا دیلَه کا، و آرِساوونِن خِشکی را.

⁴⁴ بقیه نی بَسی اَلوارون یا کشتی چویَه تیکه اون نَه، اِشتَن آرِساوونِن خِشکی را. اِنتَه گِرد سلامتی نَه آرَستینَه خِشکی.