رَسولون اَعمال 26 - کتاب مقدس به زبان تالشی شمالی

پولسی دفاع آگْریپاسی پیشی کا

¹ آگْریپاسِ پاُتشا پولسی نَه واتِشه: «اِجازَه هِستِرَه اِشتَن کا دفاع بِکَری و گف بِژَنی.» اَ موقع پولس اِشتَن دَسی دراز آکَردِشه و اِنتَه شروع کَردِشه اِشتَن کا دفاع کَردِه، واتِشه:

² «اِی آگْریپاسِ پاُتشا، از اِشتَن وِر خَسَه بَخت بَزنیم که اوری اِشتِه پیشی کا مَندیمَه تا گِردِ یَهودیون شکایتی پیشی کا، اِشتَن کا دفاع بِکَرِم.

³ اَلَلخصوص که بَزنیم شِمَه، یهودیون رسم و رسومات و اِختلافاتی نَه که چَوون دیلَه کا یَه کاملاً آشنا ایش. حِسَه، خواهیشت بَکَردیم صبوری نَه چمِن گفون گوش بِدَی.

⁴ «یَهودییِن گِرد، چِمِن زندگی اوّل جَوونی‌ نَه بَزنین، هَ اوّلی نَه که چِمِن قومی دیلَه کا و اورشلیمی کا زندگی بَکَردیم.

⁵ اَوِن قَدیمی نَه بَزنین و اَگم بِپین، بَشاین شهادتی بِدَن که از ایلَه فریسی بیمَه و چَمَه دینی سختگیرترین فِرقه کا پیروی بَکَردیم.

⁶ و اوری اَ، اُمیدی واسی محاکمه بَبیم که خِدا چَمَه اَجدادی وعده دوعَشَه.

⁷ اِم هَ وعده‌ای یَه که چَمَه دونزَه گِله قبیله اُمید دارین که اَیی بِه دَس بواَرِن. اِمی واسی اِشتَن صِدقِ دیلی نَه شَو اَنده روز پرستش بَکَردین تا اَیی آرَسین. اِی پاُتشا، هِم اُمیدی واسی یَه که یَهودییِن مِن متهم بَکَردین.

⁸ چیرا شِمَه را که اییاکا مَندیرونَه، عجیب غریبَه که خِدا مَردَه اون زِنده آکَرِه؟

⁹ «از نی اِعتقاد داریم که بَسی عیسایِ ناصری نومی ضِد هَرکاری که چِمِن دَسی کا بَرای، بِکَرِم و کوتاهی مَکَرِم.

¹⁰ و اِم هَ کاری بَه که اورشلیمی کا بَکَردیم. از سَران کاهِنون کا حق و اِختیار ویگِتِمَه، وِرَه مقدسونی دَرَفَنیم زندانی کا، و وختی مَحکوم بِه مرگ بَبین، چَوون ضِد رأی بَدایم.

¹¹ چِندی کَرَه چَوون مجازات کَردِه را اِم عبادتگاه نَه بَشیم اَ عبادتگاه را و تَقَّلا بَکَردیم اَوون وادار بِکَرِم کُفر بوآجِن. جوری اَوون کا غِیض داریم که حتی تا دورَه شَهرون را نی چَوون دومله بَشیم.

¹² «ایلَه اِم سَفرون کا، اَ حق و اِختیار کاملی نَه که سَران کاهِنون کا ویگِتَم بَه دَمشقی شهری را رایی بیمَه.

¹³ اِی پاُتشا، روزی نیمَه کا، راه دیلَه کا ایی دفَعه ایلَه نوری، آفتاوی نوری کا نی روشَنتر، آسِمونی نَه چِمِن و چِمِن همرا اون دُوری کا دَتاویستَه.

¹⁴ وختی که گِرد بَلَکیمونَه زمینی سَری کا اَز سَسی دَرَسِمه که عِبرانی زَوونی نَه مِنه بَواتی: ”شائول، شائول، چیرا مِن عذاب بَدایش؟ بَه تِرا چَتینَه که مِخون پاسَر بِژَنی، فقط اِشتَن اَذیت بَکَردیش!“

¹⁵ «دَفَرسِمَه: ”خِداوندا، تِه کییش؟“ «خِداوند واتِشه: ”از هَ عیسایی ایمَه که تِه اَیی عذاب بَدایش.

¹⁶ پِرِز و اِشتِه پا سَری کا پا بومون. اَز اِمی واسی بَه تِن ظاهر آبیمَه تا تِه، چِمِن خادم و چِمِن شاهد بِکَرِم، تا اَ چیی را که اَیی کا مِن ویندَرَه و اَ چیی را که اَیی کا بَه تِن ظاهر بَبیم، شهادتی بِدَی.

¹⁷ اَز، تِه، اِشتِه قومی دَسی کا و غیریهودیونی دَسی کا که تِه ویسا آکَرِم چَوون وَر، نجات بَدایم

¹⁸ تا چَوون چِمون آکَری، جوری که تاریکی کا نوری را، و شیطانی قدرتی کا آگَردِن خِدا طرف، تا چَوون گناه اِن بَخشِسته بِبون، و اَ ایمانی واسی که بَه مِن هِستِشونَه، کسونی دیلَه کا که مقدّس بَیینه، جِگا بِدارِن.“

¹⁹ « بَس اِی آگْریپاسِ پاُتشا، اَ موقع از، اَ آسِمونی یَه رویایی کا که ویندِمَه، سَرپیچی نِکَردِمَه.

²⁰ بَلکَم اوّل دَمِشقیون دیلَه کا، دومله اورشلیمی کا و گِردِ یهودیه ولایتی کا، و هِنتَه نی غیریهودیون دیلَه کا نی دَمندیمه اِم پیغومی اِعلام کَردِه که بَسی توبه بِکَرِن و آگَردِن خِدا طرف و اِشتَن رفتاری نَه نیشون بِدَن که توبَه شون کَردَه.

²¹ اِمی واسی بَه که یَهودی اِن، معبدی کا مِن دَستگیر کَردِشونَه و پیستِشونَه مِن بِکِشن.

²² تا اوری نَه روز خِدا مِن کمک کَردَشه و حِسَه اییا کا مَندَه ایمَه و گِردی را، روکی کا گِتَه تا یالی را، شهادتی بَدایم. چیی که بَواتیم چیی نییَه اَ چیی غِیراز که پِیغمبرون و موسی واتِشونَه که بَسی اِتِفاق دَلَکِه که:

²³ مسیح بَسی رَنج بِکَشه و اَوّلین کسی بِبو که مَردَه اون دیلَه کا زِندَه آبو، تا هَم اِم قومی را و هَم دییَر قومون را، نوری اِعلام بِکَرِه.»

²⁴ وختی پولس اِم گَفون نَه اِشتَن کا دفاع بَکَردی، فِستوس خِلِع ژَندِشَه: «پولس، تِه اِشتِه عقلی از دَس دوعَه رَه! وِرَه زونِستِه، تِه تور آکَردَشَه.»

²⁵ ولی پولس جَواو دوشَه: «از تور نیمَه، عالیجناب فِستوس، بَلکَم عقلی نَه عین حقیقتی بَواتیم.

²⁶ چوم که پاُتشا اِشتَن اِم چییون کا خَوَر دارِه و اَز نی جرئتی نَه اَوون نَه گَف ژَنِم، چوم که مطمئنیمه گِردِ اِم چییِن اَیی کا نِین نییَه، چوم هیچیی نِبَه که خَلوَتکی اِتِفاق دَلَکَه بِبو.

²⁷ اِی آگْریپاسِ پاُتشا، تِه پیغمبرون اِعتقاد داری؟ بَزنیم که داری.»

²⁸ آگْریپاس، پولسی نَه واتِشه: «هِندی زود پیستِره مِن قانع بِکَری که مسیحی بِبوم؟»

²⁹ پولس جَواو دوشَه: «خِدا کا پیستِمَه که عَری یا زود، نِه فقط شِمَه، بَلکَم گِرد کَسونی که اوری چِمِن گفی دَرَسِن، چِمِن شیوار بِبون، البته نِه قُول و زِنجیری دیلَه کا!»

³⁰ اَ موقع پاُتشا پِرِشته و چَیی پَش فرماندار و بِرنیکی و بقیۀ مِجلسی اِن نی پِرِشتینَه،

³¹ و وختی گف ژَندِه ژَندِه بَشین بِرون، یَندینَه بَواتین: «اِم مِرد کاری کَردَه نیشه که چَیی سِزا مرگ یا زندان بِبو.»

³² آگْریپاس، فِستوسی نَه واتِشه: «اَگم اِم مِرد، پیستَش نِبَه که اِم مسئله اِمپراطوری محکمه دیلَه کا رسیدگی بِبو، بَبی که اَیی حِسَه آزاد آکَردِه.»