رَسولون اَعمال 25 - کتاب مقدس به زبان تالشی شمالیپولسی محاکمه فِستوسی پیشی کا 1 سه روز بعد از اِم که فِستوسِ فرماندار شَه اِشتَن ولایت، قیصریَه شهری نَه شَه اورشلیمی را. 2 اوآ کا سَران کاهِنِن و یَهودی قومی پیله تَرِن چَیی پیشی کا حاضر آبینَه و اِشتَن شکایتون پولسی ضِد واتِشونَه، 3 اَوِن ایی پا سَری کا مَندینَه و فِستوسی کا پیستِشونَه چَوون سَری مِنّت بِنَه، پولسی ویسا آکَرِه اورشلیم، چوم اَوِن جِخِتَه بینَه تا راه دیلَه کا پولسی بِکِشِن. 4 امّا فِستوسِ فرماندار چَوون جَواوی کا واتِشه: «پولس قیصریَه زندانی کا بازداشتَه و اَز اِشتَن پیستِمه هِم زودیون بِشوم اوآ. 5 فِستوس واتِشه: بَس کَسونی که شِمَه دیلَه کا رَهبری نَه، بَشاین چِمِن هَمراه بان تا اَگم اِم مِرد خَطایی کَردَش بِبو، اِشتَن شکایتی چَیی ضِد بوآجِن.» 6 هَشتِ دَه روزَه پَش که فِستوس اَوون نَه بَه، آگَردِستَه قیصریه را. و صَبایی نَه روز، محکمه تشکیل دوشَه و دستور دوشَه پولسی بواَرِن. 7 وختی پولس اومَه دیلَه، یهودیونی که اورشلیمی کا اومَه بینَه، چَیی دُوری کا جمع آبینَه و بَرکَ اِتهامونی اَیی ژَندِشونَه، امّا نِشاستِشونَه اَ اِتهامون ثابِت بِکَرِن. 8 دومله، پولس اِشتَن کا دفاع کَردِشه، واتِشه: «اَز نِه یهودی شریعتی ضِد خَطایی کَردَمَه، نِه معبدی ضِد و نِه اِمپراطوری ضِد.» 9 امّا فِستوسِ فرماندار که پیستِش بَه یَهودیون سَر مِنَّت بِنَه، پولسی نَه واتِشه: «پیستِره بِشی اورشلیم تا اوآ کا اِم اِتهامون واسی چِمِن پیشی کا محاکمه بِبی؟» 10 پولس جَواو دوشَه: «حِسَه نی از اِمپراطوری مَحکمَه کا مَندیمَه که بَسی چَیی دیلَه کا محاکمه بِبوم. شِمَه اِشتَن چاک بَزنیرون که اَز نِسبت بِه یَهودیون هیچ خطایی کَردَه نیمَه. 11 بَس اَگم خَطایی کَردَمَه یا کاری کَردَمَه که مرگی مُستحق بِبوم، مَردِه کا تَرسی نیمَه. امّا اَگم بُختونونی که اِمِن بَه مِن ژنِن، بیخودی اینَه هیچکس نیمَشا مِن آدَه چَوون دَس. از پیستِمَه اِم مسئله اِمپراطوری محکمه دیلَه کا رسیدگی بِبو.» 12 فِستوس، اِشتَن شورا اَعضا نَه مشورت کَردِه پَش واتِشه: «پیستِرَه اِشتِه مسئله، اِمپراطوری محکمه دیلَه کا رسیدگی بِبو؟ بَس بَشیش اِمپراطوری وَر!» پولُس، آگْریپاسی پیشی کا 13 چَن روزی دَوییَردِه پَش، آگْریپاسِ پاُتشا و بِرنیکی، اومینَه قیصریَه تا فِستوسی نَه خَش آمیش بوآجِن. 14 اَوِن وِرَه روزونی اوآ کا بَمَندین. فِستوس، پولسی ماجرا، پاُتشا را تعریف کَردِشه و واتِشه: «اییا کا ایلَه مِردی اِستَه که فِلیکْس اَیی زندانی کا غَم هَردَشه. 15 وختی اورشلیمی کا بیمَه، سَران کاهِنِن و یهودی مشایخ، اَیی بُوختونونی ژَندِشونَه و پیستِشونَه اَ محکوم بِبو. 16 «از چَوون جَواوی کا واتِمَه که رومیون را دَب نییَه پیش از اِمکه ایلَه متهم اِشتَن شاکیون نَه دیمادیس بِبو و بِشا اِتهامون واسی اِشتَن کا دفاع بِکَرِه، اَیی تسلیم بِکَرِن. 17 بَس وختی اَوِن اومینَه اییا، از مَعطَل نِکَردِمه بَلکَم صَبایی نَه روز، محکمه بَر پا کَردِمه و دَستور دومَه پولسی بواَرِن چِمِن وَر. 18 وختی پولسی شاکی اِن پِرِشتینَه تا گَف بِژَنِن، هیچ گِله اَ بَدَه کارونی را که اَز اِنتظار داریم، اَیی محکوم نِکَردِشونَه. 19 بَلکَم اِشتَنِش دینی واسی و عیسی نومی واسی که مَردَه امّا پولس اِدعا بَکَردی که زِنده یَه، اَیی نَه جرّ و بَحث کَردِشونَه. 20 اَز که نیمَزنیم چِنتَه بَسی اِنتَه رَه مسئله اون بَررِسی بِکَرِم، پولسی کا دَفَرسِمَه که پیستِشَه بِشو اورشلیم تا اوآ کا اِم اِتهامون واسی محاکمه بِبو. 21 ولی وختی پولس پیستِشَه که زندانی کا بومونِه و چَیی مسئله اِمپراطوری محکمه دیلَه کا رسیدگی بِبو، دَستور دومَه اَیی نییا بِدارِن، تا روزی که بِشام اَیی ویسا آکَرِم اِمپراطوری وَر.» 22 دومله آگْریپاس، فِستوسی نَه واتِشه: «پیستِمَه اِشتَن چَیی گَفون دَرَسِم.» فِستوس واتِشه: «صَبا دَرَسَه.» 23 بَس صَبایی نَه روز، آگْریپاس و بِرنیکی بَرکَ دَبدَبه ای نَه اومینَه و نظامی یَه فرمانده اون و شهری سَرشناسَه مِردَکون نَه دَشینَه دادگاه سالُنی دیلَه. فِستوسی دستوری نَه، پولسی وَردِشونَه. 24 فِستوس واتِشه: «اِی آگْریپاسِ پاُتشا، و اِی گِرد مردمی که اییا کا مَندیرونَه! گِردِ یَهودی مردم، چِه اورشلیمی کا و چِه اییا کا، اِم مِردی کا که بَویندیرون، چِمِن وَری کا شکایت کَردَشونَه و خِلِع خِلِع ژَندَشونَه که نَبی زِنده بومونِه. 25 امّا اَز زونِستِمه که اَ، کاری کَردَه نیشه که چَیی سِزا مرگ بِبو. ولی چوم اِشتَن پیستِشَه بِشو اِمپِراطوری محکمه، بَس از نی تَصمیم گِتِمه اَیی ویسا آکَرِم رومی را. 26 امّا از حَتمی یَه چیی نِدارِم که اِمپراطوری را بینیویسِم. بَس اَیی وَردِمه شِمَه گِردی وَر، اَلَلخصوص شِمَه وَر، اِی آگْریپاسِ پاُتشا، وَردَمَه تا اَیی کا بازجویی بِکَرَم، و از چیی بِتلَفِم که بینیویسِم. 27 چوم عَقلی نَه جور دَر نا که ایلَه زِندانی ویسا آکَرِم اِمپراطوری وَر، ولی مَنیویسِم که چَیی جُرم چَه.» |
@ 2024 Korpu Company