رَسولون اَعمال 24 - کتاب مقدس به زبان تالشی شمالی

پولسی محاکمه فِلیکْسی وَری کا

¹ پینج روزَه پَش، کاهِن اَعظم، حنانیا، و چَن نفر مَشایخون نَه و ایلَه وکیلی نَه که چَیی نوم تِرتولُس بَه اومینَه قیصریه شهری را. اَوِن اِشتَن شکایتی پولسی ضِد بَردِشونَه فرمانداری وَر.

² وختی فرماندار، پولسی اِحضار کَردِشه، تِرتولُس، پولسی متهم کَردِشه و واتِشه: «عالیجناب فِلیکس، چوم خَیلی وَختَه که شِمَه سا جیری کا، صُلح و آرامش هِستِمونَه و اِشتِه پیشبینی باعیث بییَه اِم قومی وضع چاکتَر بِبو،

³ چَمَه وَظیفه بَزنیمون هَر جِگا و هَر وختی کا، بَه تِه کا قدردانی بِکَرَم.

⁴ امّا اِمی واسی که اِشتِه وختی وِرتَر مَگِرَم، خواهیشت بَکَردیمون لطف بِکَری و روکَتِه چَمَه گفی دَرَسی.

⁵ «اَمَه را ثابِت بییَه که اِم مِرد، فِتنه گرَه، کسی یَه که گِردِ دنیا یهودیون دیلَه کا شورش بَر پا بَکَردی. هِنتَه نی ناصری فِرقه سَردَسته اون کایَه.

⁶ اَ، حتی تَقَّلا کَردِشه معبدی بی‌ حُرمت بِکَرِه؛ ولی اَمَه اَیی دستگیر کَردِمونَه و پیستِمونَه مطابق چَمَه شریعت اَیی محاکمه‌ بِکَرَم

⁷ امّا لیسیاسِ فرمانده اومَه و زوری نَه اَیی چَمَه دَسی کا بِرون وَردِشه،

⁸ و چَیی شاکیون دَستور دوشَه تا بان شِمَه وَر. حِسَه، اَگم شِمه اِشتَن اَیی کا بازجویی بِکَرَه، هَر چیی که اَیی متهم بَکَردیمون، چَوون حقیقت شِمَه را معلوم بَبی.»

⁹ یَهودی اِن نی یَکصدا گِرد اِم چییون تأیید کَردِشونَه.

¹⁰ وختی فرماندار پولسی را اِشاره کَردِشه که گَف بِژَنِه، پولس اِنتَه جَواو دوشَه: «جِناب فرماندار، از بَزنیم که تِه وِرَه سالونی یَه که اِم قومی داوری بَکَردیش؛ بَس خوشحالی نَه اِشتَن کا دفاع بَکَردیم.

¹¹ شِمَه اِشتَن بَشایرون تحقیق بِکَرَه و بِزونَه که اَ موقعی نَه که اَز پرستش کَردِه را شیمَه اورشلیم تا حِسَه، دونزَه روز وِرتَر دَوییَرده نییَه،

¹² اِم مدّتی کا، هیچکسی ویندَه نییَه که از کسی نَه جرّ و بَحث بِکَرِم یا اِم که مردمی دیلَه کا بَلوایی بَر پا بِکَرِم، چِه معبدی کا، چِه عبادتگاه اون کا یا شَهری دیلَه کا.

¹³ اَوِن نیمَشان اِتهامونی که بَه مِن ژَنِن، ثابِت بِکَرِن.

¹⁴ امّا اِمی شِمَه وَری کا اِقرار بَکَردیم طبق طریقتی که اَوِن، اَیی ایلَه فِرقه بَزنین، چَمَه اَجدادی خِدا پرستش بَکَردیم و هَر چیی نی که توراتی کا و پیغمبرون کیتابی کا نیویشتَه بییَه، اِعتقاد دارِم.

¹⁵ اَز نی چَوون شیوار بِه خِدا اُمید دارِم و اِعتقاد دارِم که چاکَ آدَمون و بَدَه آدَمون را قیامتَه روزی اِستَه. دُرست اِم آدَمون شیوار که قبول دارِن.

¹⁶ اِمی واسی، همیشه تَقَّلا بَکَردیم تا خِدا و مردمی پیشی کا راحَتَه وجدانی نَه زندگی بِکَرِم.

¹⁷ «حِسَه اَز چَن سالَه پَش، شیمَه اورشلیم تا چِمِن قومی نیازمندون را صدَقه اونی بِبَرم و قِربونیونی بِکَرِم.

¹⁸ هَتَه که اِمی بِه جا بواَردیم، تطهیری آدابی اَنجام دوعَه پَش، مِن معبدی کا تِلفتِشونَه. نِه جَماعتی بَه و نِه بَلوایی بَه.

¹⁹ ولی اوآ کا چَن گِله یَهودی آسیا ایالتی کا اومَه بینَه که بَسی اییا کا شِمَه پیشی کا حاضِر بِبین تا اَگم چِمِن ضِد شکایتی هِستِشونَه، بوآجِن.

²⁰ یا بِدا، آدَمونی که اییا کا مَندینه، بوآجِن وختی که شورا پیشی کا مَندَه بیمَه، چِه جُرمی بَه مِن کا ویندِشونَه،

²¹ اِمی غِیراز که چَوون دیلَه کا بِلندَه سَسی نَه واتِمه: ”مَردَه اون زِندَه آبییِه مسئله واسی یَه که اوری شِمَه پیشی کا محاکمه بَبیم.“‌»

²² امّا فِلیکْسِ فرماندار که طریقتی چاک بَزنی، محاکمه دَرَفَندِشه دییَر وختی را و واتِشه: «هَر موقع که لیسیاسِ فرمانده با، شِمَه مسئله را تصمیمی بَگتیم.»

²³ دومله اَ، اَفسری نَه که مسئول بَه دَستور دوشَه تا پولسی زیر نظر بِگِرِه، ولی آزادیونی بَیی آدَه و مانع مَبو که چَیی رَفِقِن چَیی اِحتیاجون بَرطرف بِکَرِن.

²⁴ چَن روزَه پَش، فِلیکْس اِشتَن ژِن، دْروسیلا نَه که یَهودی بَه، اومَه و ویسا آکَردِشه پولسی دومله. اَ، پولسی گَفون که ایمان بِه عیسایِ مسیح درباره بَه،گوش دوشَه.

²⁵ اَ موقعی که پولس، صالِح بییِه کا، پَرهیزگاری و آیَنده داوری کا گف ژَندِشَه، فِلیکْس هَراسون آبَه و واتِشه: «فعلا وَستَه! بَشای بِشی. ایلَه دییَر فُرصَتی کا هَنی تِه دَخونِم بای چِمِن وَر.»

²⁶ با اِم حال اُمید داری پولس بَیی رِشوه‌ آدَه. اِمی واسی، چِندی کَرَه اَیی اِحضار بَکَردی و اَیی نَه گَف ژَنی.

²⁷ وختی که دِ سال دَوییَردَه، پورکیوس فِستوس، فِلیکْسی جانِشین بَه. ولی فِلیکْس، اِمی واسی که یَهودیون سَری کا مِنّت بِنه، هَتَه پولسی زندانی کا غَم هَردِشه.