رَسولون اَعمال 23 - کتاب مقدس به زبان تالشی شمالی1 پولس شورا اَعضا زول ژَندِشَه و واتِشه: «بِرا اِن، اَز تا بِه اوری پاکَ وجدانی نَه خِدا پیشی کا زندگی کَردَمه.» 2 وختی پولس اِمی واتِشه، کاهِن اَعظم، حنانیا، دستور دوشَه تا کَسونی که پولسی وَری کا مَندَه بینَه، بِژَنِن چَیی گَ کا. 3 دومله پولس اَیی نَه واتِشه: «خِدا تِه بَژَه ی، اِی ایسبی آبییَه حَصار! تِه اَ تَختی سَری کا نِشتیش تا مطابق شریعت مِن محاکمه بِکَری، ولی حِسَه تِه خلاف شریعت، دستور بَدایش مِن بِژَنِن؟» 4 کَسونی که پولسی نِزدیکی کا مَندَه بینَه، واتِشونَه: «تِه خِدا کاهِن اَعظمی بی اِحترامی بَکَردیش؟» 5 پولس واتِشه: «اِی بِرااِن، از نیمَزنیم اِم کاهِن اَعظمَه؛ چوم توراتی کا نیویشتَه بییَه: ”اِشتِه قومی رهبری نَه بَد مَوآج.“ 6 دومله پولس که بَزنی بعضی اَوون کا صَدّوقی فِرقه عُلما کا ایی نَه و بعضی فریسی فِرقه عُلما کا ایی نَه، بِلنده سَسی نَه شورا کا واتِشه: «اِی بِرا اِن، اَز فریسی و فریسی زادَه ایمَه، و اِمی واسی محاکمه بَبیم که مَردَه اون زِندَه آبییِه اُمید دارِم.» 7 وختی پولس اِمی واتِشه، فریسیون فِرقه و صَدّوقیون فِرقه دیلَه کا جرّ و بَحث دَلَکه و جَماعت دِ دسته بینَه، 8 چیرا که صدّوقی اِن، مَردَه اون زِندَه آبییِه و ملائیکه و روح اِعتقاد نِدارین، امّا فریسی اِن گِردِ اِمون اِعتقاد دارین. 9 دومله بَرکَ بَلبَشویی بَر پا بَه! بعضی توراتی معلِمِن که فریسی فِرقه کا بینَه، پِرِشتینَه و اِعتراض کَرون واتِشونَه: «اِم مِردی کا هیچ خطایی نِوینَم. کیا کا مَعلوم که ایلَه روح یا ایلَه ملائیکه اَیی نَه گَف ژَندَه ش مَبو.» 10 دعوا اِنتَه کَفا گِتِشه که فرمانده تَرسَه که نَبادا پولسی پَله و پَله بِکَرِن. بَس سَربازون دَستور دوشَه بِشون جیر و پولسی چَوون چنگی کا بَروَرِن، بواَرِن قلعه دیلَه. 11 هَ شَوی کا، خِداوند پولسی وَری کا مَندَه و واتِشه: «اِشتِه دیل قُرص بِبو! هَتَه که اورشلیمی کا بَه مِرا شهادتی دوعَه رَه، رومی کا نی بَسی شهادتی بِدَی.» پولسی قَتلی توطئه 12 وختی صِبح آبَه، یَهودی اِن یَندینه توطئه کَردِشونَه، قَسَم هَردِشونَه تا پولسی مَکِشِن، نِه چیی بَرِن و نِه چیی بِنجِن. 13 اِم توطئه کا چِهل نفری کا نی وِرتَر دَس دارین. 14 اَوِن شینَه سَران کاهنون و مَشایخی وَر و واتِشونَه: «اَمَه قَسَّم هَردَمونَه تا پولسی مَکِشَم، هیچیی مَرَم. 15 بَس حِسَه شِمَه و شورا اَعضا، رومی فرماندۀ کا بِپییَه اَیی بواَرِه شِمَه وَر، اِم بهونه نَه که پیستِرونَه دَقیقتر چَیی درباره تحقیق بِکَرَه. اَمَه آمادَه ایمونَه پیش از اِم که اَ آرَستِه اییا، اَیی بِکِشَم.» 16 پولسی خُوئَرَه زا اِم توطئه کا خَوَردار بَه و شَه قلعه دیلَه و پولسی خَوَر دوشَه. 17 پولس ایلَه اَفسرون دَخوندِشه و واتِشه: «اِم جَوونی بِبَه فرمانده وَر، چوم پیستِشَه اَیی نَه چیی بوآجِه.» 18 بَس اَفسر اَیی بَردِشه فرمانده وَر و بَیی نَه واتِشه: «زِندونی یَه پولس مِن دَخوندِشه و بَه مِن کا پیستِشَه اِم جَوونی بواَرِم شِمَه وَر؛ پیستِشَه ایی چیی شِمَه نَه بوآجِه.» 19 فرمانده، اَ جَوون مِردی دَسی گِتَشه، اَیی بَردِشه کَناری را و خَلوَتَکی دَفَرسِشه: «چِه چی پیستِرَه مِنَه بوآجی؟» 20 پولسی خُوئَرَه زا اَیی نَه واتِشه: «یَهودی اِن هَمدَس بَیینه شِمَه کا بِپین که صَبا پولسی بواَرَه شورا وَر، اِم بهونه نَه که پیستِشونَه دقیقتر چَیی درباره تحقیق بِکَرِن. 21 ولی مَرزِن اَوِن تِه اِم کاری را قانع بِکَرِن، چوم چِل نفری کا نی وِرتَر اَوون کا، پولسی کمینی کا نِشتینَه. اَوِن قَسَّم هَردَشونَه که تا پولسی مَکِشِن، نِه چیی بَرِن و نِه چیی بِنجِن. حِسَه آمادَه اینَه، و فَقَط منتظرینه شِمَه چَوون درخواستی قبول بِکَرَه.» 22 بَس فرمانده، اَ جَوونی ویسا آکَردِشه و اَیی قَدغَن کَردِشه، واتِشه: «هیچکسی نَه مَواج که اِم چییون کا مِن خَوَردار کَردَرَه.» پولسی بَبردین قیصریه را 23 دومله فرمانده دِ نفر اِشتَن اَفسرون کا دَخوندِشه و اَوون نَه واتِشه: «دویست نفر پیاده سرباز، هفتاد نفر سواره سرباز و دویست نفر نیزَه دار، حاضیر آکَرَه تا شَنار ساعت نِه، بِشون قیصریه شهری را. 24 پولسی را نی ایلَه اَسب حاضیر آکَرَه و اَیی صحیح و سالم فِلیکْسِ فرمانداری تحویل بِدییَن.» 25 ایلَه نامه نی اِنتَه نیویشتِشَه: 26 «کْلودیوسِ لیسیاسی طرفی کا عالیجناب فِلیکْسِ فرمانداری را: سلام بَر شِمَه، 27 یَهودی اِن اِم مِردی گِتَشونَه، پیستِشونَه اَیی بِکِشِن، امّا اَز چِمِن سَربازون نَه شیمَه، اَیی نجات دومَه، چوم دَرَسَم بَه رومی شهروندَه. 28 اَز پیستِم بَه بِزونِم چِه چی واسی اَیی اِتهام ژَنِن، اَیی بَردِمه چَوون شورا وَر. 29 زونِستِمه که چَیی اِتهام مربوط بِه چَوون اِشتَن شریعتَه و چَیی جُرم اِنتَه وِر نییَه که چَیی سِزا مرگ یا زندان بِبو. 30 دومله وختی زونِستِمَه چَیی ضِد توطئه کَردَشونَه، اَلبحَل اَیی وَیسا آکَردِمه شِمَه وَر. چَیی شاکیون نی دَستور دومَه تا شکایتی که اَییکا هِستِشونَه، بواَرِن شِمَه وَر.» 31 اِنتَه، سَربازِن طبق دَستور، شَوونَه پولسی اِشتَن نَه تا آنتیپاتْریسی شهری را بَردِشونَه. 32 صَبایی نَه روز پیادَه سَربازِن آگَردِستینَه قلعه طرف و فقط سَوارَه سَربازِن پولسی همراهی کَردِشونَه. 33 وختی سواره سربازِن آرَستینَه قیصریَه شهری را، اَ نامه تحویل دوشونَه فرمانداری و پولسی وَردِشونَه چَیی وَر. 34 فرماندار نامه خَندِشه و پولسی کا دَفَرسِشه کَمیله ایالتی شِنَه. وختی زونِستِشه کیلیکیه منطقه شِنَه، 35 بَیی نَه واتِشه: «وختی اِشتِه شاکی اِن آرَستینَه اییا، اِشتِه گفی گوش بَدایم.» دومله دَستور دوشَه تا هیرودیسی کاخی دیلَه کا، پولسی زیر نظر بِگِرِن. |
@ 2024 Korpu Company