رَسولون اَعمال 22 - کتاب مقدس به زبان تالشی شمالی

¹ «اِی بِرا اِن و اِی دَده اِن، چِمِن دفاعیۀ ای که حِسَه شِمَه نَه بَواتیم، گوش بِدییَه.»

² اَوِن وختی دَرَسِشونَه که پولس اَوون نَه عِبرانی زَوونی نَه گف ژَنِه، ساکیتتَر آبینَه. اَ موقع پولس واتِشه:

³ «اَز یهودیه مِردیمَه، که تارسوسِ کیلیکیه کا دنیا اومَه ایمَه. امّا اِم شهری کا یال آبَییمَه. چِمِن اَجدادی شریعتی کامِلاً، گامالائیلی وَری کا یاد گِتَمه و خِدا را غیرت داریم، هَتَه که گِردِ شِمَه اوری غیرت اِستِرونَه.

⁴ اَز اِم ’طریقتی‘ پِیروون تا مرگی قَدَر اَذیت آزار کَردَمه و اَوون چِه مِرد و چِه ژِنی کا گِته، دستگیر بَکَردیم، و زندانی کا دَرَفَنیم.

⁵ کاهِن اَعظم و گِردِ شورای یَهودی اَعضا بَشاین اِم جریانی درباره شهادتی بِدَن، چوم اَوون کا نامه‌ اونی ویگِتِمَه که اِشتَن بِرااون را که دَمشقی کا اینَه نیویشتَه شون بَه تا بِشوم اوآ و اَهل طریقتی دستگیر بِکَرِم و مجازات کَردِه را بواَریم اورشلیم.

⁶ «امّا وختی دمشقی نِزدیک آبیمَه راه کا، ناهارَه موقع، ایی دفعه ایلَه بَرکَ نوری که آدَمی چِمی کا ژَنی، آسِمونی نَه چِمِن دُوری کا دَتاویسته.

⁷ از زمینی کا بَلَکیمه و ایلَه سَسی دَرَسِمَه که مِنَه بَواتی: ”شائول! شائول! چیرا مِن اَذیت آزار بَکَردیش؟“

⁸ «دَفَرسِمَه: ”خِداوندا، تِه کی ایش؟“ «جَواو دوشَه: ”از هَ عیسایِ ناصری ایمَه که تِه اَیی اَذیت آزار بَکَردیش.“

⁹ چِمِن همراه اِن نوری ویندِشونَه، امّا اَ کسی سَسی که مِنَه گَف ژَنی، نِدَرَسِشونَه.

¹⁰ «از واتِمَه: ”خِداوندا، چِه بِکَرِم؟“ «خِداوند واتِشه: ”پِرِز بِش دَمشقی را. اوآ کا هَر چیی که اِشتِه وظیفه یَه، بَه تِنه واتَه بَبی.“

¹¹ چوم اَز اَ نوری دَتاویستِه واسی کور بیمَه، چِمِن هَمرااِن چِمِن دَسی گِتِشونَه و اومیمونَه دَمِشق.

¹² «دَمِشقی کا، ایلَه مِردی زِندگی بَکَردی که دیندار بَه و شریعتی کاملاً اَنجام بَدای. اَ مِردی نوم حنانیا بَه و گِردِ یَهودیون دیلَه کا، خوشنوم بَه.

¹³ حنانیا چِمِن ویندِه را اومَه و چِمِن وَری کا مَندَه و واتِشه: ”بِرا شائول! بینا بِبو!“ هَ لَحظه، چِمِن، چِمِن سو دَلَکینَه و حنانیا ویندِمَه.

¹⁴ «حنانیا واتِشه: ”چَمَه اَجدادی خِدا تِه اِنتخاب کَردِشه تا چَیی اِراده بِزونی و اَ صالحی بِوینی و چَیی گَ کا گَفونی دَرَسی.

¹⁵ چوم تِه گِردِ مردمی پیشی کا، چَیی شاهد بَبیش و اَ چیی را که ویندَه و دَرَسَرَه، شهادتی بَدایش.

¹⁶ حِسَه چِه چیی منتظریش؟ پِرِز و چَیی نومی دَخون و غُسل تعمید بِگه، اِشتِه گناه اون کا پاک آبو!“

¹⁷ «وختی آگَردِستیمَه اورشلیم، معبدی کا کارا دعا بَکَردیم که شیمَه حالت خَلسَه دیلَه

¹⁸ و خِداوندی ویندِمه که بَواتی: ”بِتیل و اَلبَحَل اورشلیمی نَه بِش، چوم اَوِن، اِشتِه شهادتی که چِمِن درباره یَه قبول نِکَرِن.“

¹⁹ «از واتِمه: ”خِداوندا، اَوِن بَزنین که اَز عبادتگاه بِه عبادتگاه بَشیم و کَسونی که بَه تِن ایمان دارین، دَرَفَنیم زندانی کا و ژَنیم.

²⁰ و وختی اِشتِه شاهِد، اِستیفانی خونی ویکَردِشونَه، اَز اِشتَن اوآ کا مَندبیمَه و چَوون کاری نَه موافقت کَردِمه و چَیی قاتِلون خَلااون مواظب بیمَه.“

²¹ «خِداوند مِنَه واتِشه: ”بِش؛ چوم از تِه، دوره اُفتاده جِگا اون را ویسا آکَرِم، غیریهودیون وَر.»

²² مردم تا اییا پولسی گفون گوش بَداین، امّا وختی اِمی واتِشه، اِشتَن سَسی بِلند آکَردِشونَه، خِلِع ژَندِشونَه: «زَمینی اِنتَه رَه آدَمی وجودی کا پاک آکَرَه، چوم که نَبی اِجازه بِدییَم اِنتَه رَه آدَمی زِندَه بومونِه!»

²³ هَتَه که اَوِن خِلِع خِلِع بَکَردین و اِشتَن خَلااون اِشتَن سَری کفا کا تکان تکان بَداین و گَرد و خاک راست آکَرین،

²⁴ فرمانده دَستور دوشَه پولسی بِبَرِن قلعه دیلَه، شِلاق بِژَنِن و اَیی بازجویی بِکَرِن تا مَعلوم بِبو مردم چِه چی واسی اِنتَه چَیی ضِد خِلِع بَکَردین.

²⁵ امّا وختی که پولسی دَوِندین تا شِلاق بِژَنِن، پولُس اَ، اَفسَری نَه که اوآ کا مَند بَه، واتِشه: «قانون شِمَه اِجازَه بَدای ایی نفری که رومی شهروندَه بی اِم که محاکمه بِکَرَه شِلاق بَژَنَه؟»

²⁶ اَ، اَفسر وختی اِمی دَرَسِشَه، شَه فرمانده وَر و اَیی نَه واتِشه: «هیچ بَزنیش چِه بَکَردیش؟ اِم مِرد رومی شهروندَه!»

²⁷ بَس فرمانده اومَه پولسی وَر و اَییکا دَفَرسِشه: «بوآج بِوینِم، تِه رومی شهروندیش؟» پولس جَواو دوشَه: «ها، اِستیمَه.»

²⁸ اَ موقع فرمانده واتِشه: «اَز اِمی واسی که رومی شهروندی بِه دَس بواَرِم وِر بها آدوعَمه.» پولس چَیی جَواوی کا واتِشه: «امّا اَز اِم شهروندی نَه دنیا اومَه ایمَه!»

²⁹ کسونی که قَرار بَه پولسی کا بازجویی بِکَرِن، هَ لحظه اِشتَن کنار کَشِشونَه. فرمانده نی که زونِستَش بَه، ایلَه رومی دَستگیر کَردَشه، بَرک تَرسِستَه بَه.

پولس، یَهودی شورا وَری کا

³⁰ صَبایی نَه روز، فرمانده چوم پیستِش بَه بِزونِه که واقعاً چِه چی واسی یَهودی اِن پولسی متهم کَردَشونَه، اَیی زندانی کا آزاد آکَردِشه و دَستور دوشَه سَران کاهنِن و گِردِ یَهودی شورا اَعضا جَمع آبون. دومله، پولسی جیر وَردِشه تا چَوون پیشی کا حاضیر آبو.