رَسولون اَعمال 20 - کتاب مقدس به زبان تالشی شمالی

پولس بَشی مقدونیَه و یونانی را

¹ و وختی بَلوا تمون آبَه، پولس، شاگِردون دَخوندِشه اِشتَن وَر و چَوون تَشویق کَردِه پَش، اَوون نَه خِداحافظی کَردِشه و مقدونیَه منطقه را رایی بَه.

² پولس، اَ منطقه کا دَوییَردَه، اِشتَن گَفون نَه ایماندارون وِرَه دیلگرمی دوشَه، تا آرَستَه یونان.

³ پولس سِه مانگ اوآ کا مَندَه. وختی که پیستِشَه کَشتی نَه بِشو سوریه، یَهودییِن چَیی ضِد توطئه کَردِشونَه. بَس تصمیم گِتِشه مقدونیَه راه نَه آگَردِه.

⁴ پولسی هَمراه اِن اِمِن بینَه، سوپاتِر، پیرروسی زوعَه که بیریَه مردمی کا بَه، آریستارخوس و سِکوندوس که تَسالونیکی مردمی کا بینَه، گایوس و تیموتائوس که دِربِه مردمی کا بینَه، تیخیکوس و تْروفیموس که آسیا مردمی کا بینَه.

⁵ اَوِن چَمَه پیش شینَه و تْروآسی شهری کا چَمَه منتظر بینَه.

⁶ ولی اَمَه، فَطیرَه عیدی پَش، کَشتی نَه فیلیپی شهری کا رایی بیمونَه و پینج روزَه پَش، تْروآسی کا اَوون مُلحق بیمونَه و هَفت روز اوآ کا مَندیمونَه.

یوتیخوسی زِندَه آبییِه

⁷ هفته اوّلین روزی کا، نونی پَله کَردِه را جَمع آبیمونَه. پولس مردمی نَه گف ژَنی و چوم پیستِشَه صَبایی نَه روز اوآنَه بِشو، چَیی گف ژَندِه تا نِصبِ شَو طول کَشِشه.

⁸ اَ، بالاخونه ای کا که جَمع آبَه بیمونَه، وِر چِرا روشون بَه.

⁹ ایلَه جَوونی پنجره کناری کا نِشت بَه که چَیی نوم یوتیخوس بَه، وختی پولس کارا گف ژَنی اَ جَوون کم کم سَنگینَ خاوی آشَه و ایی دفعه سوّمین طبقه کا بَلَکه جیر. وختی اَیی پِگِتِشونَه ویندِشونَه که اَ مَردَه.

¹⁰ پولس شَه جیر، اِشتَن دَرَفَندِشه جَوونَ مِردی سَر و اَیی کَشَه آگِتِشه و واتِشه: «مَتَرسه، حَلا جان دارِه!»

¹¹ دومله شَه کَفا و نونی پَله کَردِشه و هَردِشه. اَ تا سَحری موقع اَوون نَه گَف ژَندِشَه، و دومله اوآنَه شَه.

¹² مردم اَ جَوونی زِنده بَردِشونَه کَ و بَرک تَسلی گِتِشونَه.

¹³ ولی اَمَه چَمَه سفری کا، پیش از پولس ایلَه کَشتی دَنِشتیمونه و آسوسی شهری را رایی بیمونَه تا طبق قراری که پولسی نَه داریمون، اَیی بواَرَم کَشتی دیلَه، چوم پولس پیستِش بَه تا خشکی راه نَه بِشو اوآ.

¹⁴ بَس وختی پولسی، آسوسی کا ویندِمونه، اَیی وَردِمونَه کَشتی دیلَه و شیمونَه میتیلینی شهری را.

¹⁵ اوآکا کَشتی نَه رایی بیمونَه و صَبایی نَه روز آرَستیمونَه خیوسی جَزیره. پَشرایی شیمونه ساموسی جزیره و پَشراتَر، آرَستیمونَه میلیتوسی شهر.

¹⁶ پولس تصمیم گِتِشه دَریا راه کا اَفِسُسی وَری نَه دَوییَره تا آسیا ایالتی کا اِشتَن وختی هَدَر مَدَه، چوم عجله ش اِستبَه که اَگم ممکن بِبو، پِنتیکاستَه روزی را اورشلیمی شهری کا بِبو.

پولس اَفِسُسی مشایخی نَه خِداحافظی بَکَردی

¹⁷ پولس، میلیتوسی کا ایلَه پَیغومی اَفِسُسی را ویسا آکَردِشه و کلیسا مَشایخی دَخوندِشه اِشتَن وَر.

¹⁸ وختی اَوِن اومینَه، پولس اَوون نَه واتِشه: «شِمَه بَزنیرون که از هَ اوّلین روز که اومیمَه آسیا ایالتی را، چِنتَه گِردِ چِمِن وختی شِمَه را نومَه.

¹⁹ چِنتَه گِردِ فروتنی نَه و اِسِرگ ویکَردِه نَه خِداوندی خدمَت کَردِمَه، و چییونی که یهودیون توطئه‌ اون واسی چِمِن سَر اومَه، تاو وَردِمَه.

²⁰ هَتَه که بَزنیرون، از چِنتَه هَر چی کا که ممکن بَه شِمَه را فایدَه بِدارِه، چیی دریغ نِکَردِمَه، بَلکَم پیغومی شِمَه را اِعلام کَردِمه، چِه جمعی دیلَه کا و چِه کَ بِه کَ شِمَه تعلیم دوعَمه.

²¹ هَم یَهودییون و هَم یونانیون را، شهادتی دومَه که بَسی توبه نَه آگَردِن خِدا طرفی را و چَمَه خِداوند عیسایِ مَسیح ایمان بواَرِن.

²² «و حِسَه، خِدا روح هدایتی نَه بَشیم اورشلیم و نیمَزنِم اوآ کا چِمِن سَری چِه بومَی؛

²³ اِمی غیراز که هَر شهری کا روح القدس هشدار بَدای که زندان و سختی چِمِن منتظرَه.

²⁴ ولی از هَم جان و هَم زندگی بَه مِرا بی‌ اِرزش بَزنیم، فقط اَگم بِشام چِمِن دُورَه تَمون آکَرِم و خدمتی که عیسایِ خِداوندی کا ویگِتَمه تا آخِر اَنجام بِدَم، و خِدا فیضی خوشَه خَوَری شهادتی بِدَم.

²⁵ حِسَه بَزنیم که هیچ گِله شِمَه کا که از شِمَه دیلَه کا گَردِستَه ایمَه و خِدا پاُتشایی شِمَه را اِعلام کَردَمه، دِ مِن نِوینَه.

²⁶ پس اوری از شِمَه را شهادتی بَدایم که از گِردی خونی کا بَری ایمَه.

²⁷ چوم از کسی حقی کا کوتاهی نِکَردِمَه، بَلکَم خِدا پیغومی کامل، گِردی را اِعلام کَردَمَه.

²⁸ شِمَه حَواس جَمع بِبو. شِمَه حواس گِردِ رَمَه اونی کا بِبو که روح القدس شِمَه چَوون نظارت کَردِه را اِنتخاب کَردَشه. خِدا کلیسا را که اِشتَن خونی نَه اَیی خِرییَشه، شوونَتی بِکَرَه.

²⁹ بَزنیم که چِمِن شییِه پَش، دَرَندَه وَرگِن بومَین شِمَه دیلَه و رَمَه رَحم نِکَرِن.

³⁰ حتی شِمَه اِشتَن دیلَه کا کسونی پِرِزن که حقیقتی آگاردِنِن تا شاگِردون بِکَشونِن اِشتَن دومله و اَوون راه کا بَرکَرِن.

³¹ بَس هوشیار بِبییَه و ویر بواَرَه که از سِه سال تمون، شَواَنده روز، اِسِرگون نَه ایی لَحظه نی شِمَه هشدار دوعِه کا، دَس نِپِگِتِمَه.

³² «حِسَه از شِمَه دَسپارِم بِه خِدا و چَیی فیض بَخشَ کلامی که بَشای شِمَه بَنا بِکَرِه و گِردِ کَسونی دیلَه کا که تَقدیس بَیینَه، اِرث آدَه.

³³ چِمِن چِم هیچکسی طِلا، نقره و یا خَلا دومله نِبَه.

³⁴ شِمَه اِشتَن بَزنیرون که چِمِن دَسی نَه، چِمِن و چِمِن همراه اون نیازون فَراهم کَردِمَه.

³⁵ هَمَه جورَه شِمَه نیشون دوعَمَه که بَسی اِنتَه بَرک کار بِکَرَم تا بِشایَم ضعیفون دَسی بِگِرَم و عیسایِ خِداوندی گفون ویری کا بِدارَه که چِنتَه اَ اِشتَن واتَشه: ”آدوعِه، ویگِتِه کا چاکترَه.“‌»

³⁶ وختی پولس اِشتَن گَفون تَمون آکَردِشه، زِنگ ژَندِشَه و گِردِ اَوون نَه دعا کَردِشه.

³⁷ گِرد وِر داد کَردِشونَه و اَیی کَشَه آگِتِشونَه، و اَیی ماچ بَکَردین.

³⁸ اَ چیی که گِردی کا وِرتَر اَوون ناراحت بَکَردی، پولسی اِم گَف بَه که واتِشه: «دِ مِن نِوینه.» دومله تا کَشتی وَر اَیی نَه شینَه رادِرازی.