رَسولون اَعمال 2 - کتاب مقدس به زبان تالشی شمالی

روح القدسی نزول پِنتیکاستی روزی کا

¹ وختی پِنتیکاستی عیدی روز آرَستَه، گِرد یَکدیل ایی جِگا کا جمع آبَه بینَه

² که ایی دفعه آسِمونی کا ایلَه سَسی اومَه که تِندَه وایی سَسی شیوار بَه و اَ کَ ایی که اَیی کا نِشت بینَه، کامل پور آکَردِشه.

³ اَ موقع ایی چیی آتشی آلاوی شیوار ویندِشونَه که تَقسیم بَه و چَوون هَر کمیله سَری کا نِشتَه.

⁴ دومله گِرد روح القدسی کا پُور آبینَه و هَتَه که خِدا روح اَوون قدرت بَدای گف بِژَنِن، دَمندینَه دییَر زَوونون نَه گَف ژَندِشونَه.

⁵ اَ روزون کا، دیندارَه یهودییِن، آسِمونی جیری گِردِ مملیکَتون کا اومَه بینَه اورشلیمی شهری را.

⁶ وختی اِم سَس اومَه، جماعتی که جمع آبَه بینَه، مات و مبهوت بینَه، چوم هَر کَمیله دَرَسین که اَوِن، چَوون اِشتَن زَوونی نَه گَف ژَنِن.

⁷ بَس مات و مبهوت، واتِشونَه: «مَگم اِمِن که گَف ژَنِن گِرد جَلیلی اَهالی نینَه؟

⁸ بَس چِنتَه یَه که دَرَسَم هَر کمیله چَمَه محلی زَوونی نَه گَف ژَنِن؟

⁹ پارتی اِن و مادی اِن و عیلامی اِن، بین‌النهرینی مردم، یهودیه و کاپادوکیَه، پونتوس و آسیا،

¹⁰ فْریجیه و پامفیلیَه، مِصر و لیبی اَطراف که قیرَوانی شِن اِستینه و کسونی که رومی کا اومَه بینَه

¹¹ هَم یهودی و هَم کسونی که یهودی‌ دینی قبول کَردَشون بَه؛ و هِنتَه نی کْرِت و عربستانی مردم- گِرد کارا دَرَسَم که اِمِن چَمَه زوونی نَه خِدا پُور قدرته کارون کا گف ژَنِن.»

¹² بَس گِرد هَتَه که حَیرون و سَرگردون بینَه یَندی نَه بَواتین: «اِم اِتِفاقی معنی چَه؟»

¹³ امّا بعضی نی ریشخند بَکَردین و بَواتین: «اِمِن تازه شَراوی نَه مست آبَیینَه!»

پطرسی پَیغوم پِنتیکاستی روزی کا

¹⁴ اَ موقع پطرس اَ یازده نفری نَه پِرِشته و اِشتَن سَسی بِلند آکَردِشه، اَوون نَه واتِشه: «اِی یَهودییِن و اِی اورشلیمی مردم، اِمی بِفهمه و اَ چیی که بَواتیم دقّتی نَه گوش آکَرَه!

¹⁵ اِم مِردَکِن بَرعکسِ اَ چیی که شِمَه گَمون بَکَردیرون، مست نینَه، چوم حَلا ساعت نِه صِبحَه!

¹⁶ بَلکَم اِم هَ چیی یَه که یوئیل پیغمبر چَیی درباره اِنتَه پیشگویی کَردَش بَه که:

¹⁷ «”خِدا بَواتی: آخِرین روزون کا چِمِن روح گِردِ مردمی سَری کا ویکَرِم. شِمَه زوعَه اِن و شِمَه کِلَه اِن نَبوّت بَکَردین، شِمَه جَوونِن رؤیا اون بَویندین و شِمَه پیرِن خاو اون بَویندین.

¹⁸ اَ روزون کا، حتی چِمِن نوکَرون و خاتَکون سَری کا نی، چِمِن روح کا ویکَرِم و اَوِن نَبوّت بَکَردین.

¹⁹ کَفا، آسِمونون کا، عجیبَ چیون، و جیری کا، زمینی سَری کا، معجزه اونی بَکَردیم، خون و آتش و دو کا.

²⁰ پیش از اِم که خِداوندی روز آرَستِه، اَ پرشکوه و یالَ روز، آفتاو تاریک بَبی و مانگی رنگ خونی شیوار بَبی.

²¹ و اِنتَه بَبی که هَر کسی خِداوندی نومی دَخونه، نِجات پیدا بَکَردی.“

²² «اِی یَهودیِن، اِمی دَرَسَه: هَتَه که اِشتَن بَزنیرون، عیسایِ ناصری مِردی بَه، که خِدا، مُعجزه اون و عجیب چیون و علامتونی نَه که چَیی دَسی نَه شِمَه دیلَه کا ظاهر آکَردِشه، شهادتی دوشَه که اَ، حقیقتَه.

²³ هَ عیسی، طبق خِدا اِراده و نَخشه شِمَه تسلیم بَه و شِمَه، شَرورَه آدَمون دَسی نَه، اَیی صلیبی سَری کا مصلوب کَردِرونَه و کِشتِرونَه.

²⁴ خِدا اَیی مرگی عذابون کا نِجات دوشَه، اَیی زِندَه آکَردِشه، چوم مَحال بَه که مرگ بِشای اَیی اِشتَن چَنگی کا غَم بَری.

²⁵ هَتَه که داوود پاُتشا عیسی درباره بَواتی که: «”همیشه خِداوندی چِمِن، چِمی پیشی کا ویندَمَه، چوم اَ چِمِن راستَ دَسی کا یَه تا مَلَرزِم.

²⁶ اِمی واسی چِمِن دیل شادَه و چِمِن زَوون خوشحالی بَکَردی؛ چِمِن بَدَن نی اُمیدی کا بَبی.

²⁷ چوم چِمِن جانی مَردَه اون دنیا کا وِل آنِکَری، و نییَرزی اِشتِه اِنتخاب بییَه، بَدَن پوسدَه آبو.

²⁸ تِه زندگی راه اون بَه مِن آموتَه رَه، و اِشتِه حضوری نَه مِن شادی کا لِبالِب بَکَردیش.“

²⁹ «اِی بِرا اِن، اَز بَشایم اِطمینانی نَه شِمَه نَه بوآجِم که چَمَه جَّد داوود مَردَه و دَفن نی بَه و چَیی مقبره تا اوری نَه روز چَمَه دیلَه کا یَه.

³⁰ داوود ایلَه پیغمبر بَه و بَزنی که خِدا اَییرا قَسَّم هَردَشه که چَیی نَسلی کا ایی نفری چَیی سلطنتی تختی سَری کا نیشونِه.

³¹ داوود، پیش پیش آیَنده ویندِشه، و مسیح زِنده آبییِه درباره واتِشه که چَیی جان مَرده اون دنیا کا نِمونِه و چَیی بَدَن پوسدَه آنییَب.

³² خِدا هِم عیسی زِنده آکَردِشه و اَمَه گِرد چَیی شاهِدیمونَه.

³³ عیسی بَردَه بَه کَفا خِدا راستَ دَسی را و آسِمونی یَه دَده کا، روح‌ القدسِ موعودی ویگِتِشه و ویکَردِشه چَمَه سَری کا، اِمی که حِسَه بَویندیرون و دَرَسَه.

³⁴ چوم که داوود اِشتَن صعود نِکَردِشه آسِمونون را، ولی هَنی واتِشه که: «”خِداوند چِمِن خِداوندی نَه واتِشه: ’چِمِن راستَ دَسی وَری کا بِنِش

³⁵ تا اَ موقع که اِشتِه دِشمَنون اِشتِه پا جیری کا دَرَفَنِم.“‘

³⁶ «بَس گِردِ یهودی قوم یَقینی نَه بِزونِن که، اِم عیسایی که شِمَه اَیی، صلیبی سَری کا کِشتِرونَه، خِدا اَیی هَم خِداوند و هَم مسیح موعود کَردَشه.»

³⁷ وختی اَوِن اِم گفی دَرَسِشونَه، جوری بینَه که اِنگاری چَوون دیلی کا خَنجَر دَشه، پطرسی نَه و بَقیه رسولون نَه واتِشونَه: «اِی بِرااِن، چِه بِکَرَم؟»

³⁸ پطرس اَوون نَه واتِشه: «توبَه بِکَرَه و شِمَه هَر کمیله، عیسایِ مسیح نومی نَه شِمَه گناه اون بَخشِسته را غسل تعمید بِگِرَه که روح القدسی هدیه ویگِرَه.

³⁹ چوم اِم وعده شِمَه را و شِمَه خِردَنون را و گِردِ کَسونی رایَه که دوری نَه، یعنی هَر کسی که خِداوند چَمَه خِدا اَیی دَخونِه اِشتَن وَر.»

⁴⁰ پطرس وِر دییَر گفون نَه شهادتی دوشَه و اَوون تشویق کَردِشه، واتِشه: «اِم ناخَلَفه نَسلی دَسی کا اِشتَن نجات بِدییَه!»

⁴¹ بَس کسونی که پطرسی پیغومی قبول کَردِشونَه، غسل تعمید گِتِشونَه. هَ روزی کا تَقریبا سِه هَزار نفر اَوون مُلحَق بینَه.

ایماندارون زندگی

⁴² اَوِن اِشتَن وقف کَردِشونَه رسولون کا تعلیم گِتِه را. دییَر ایماندارون نَه مشارکت کَردِه را و نون پَله کَردِه و دعا کَردِه را.

⁴³ گِردِ اَوِن مات و مبهوت بینَه چوم که وِرَه عجیبَ چییِن و معجزه اونی رسولون دَسی نَه اَنجام بَبی.

⁴⁴ ایماندارِن گِرد یَندی نَه یَکدیل بینَه و گِردِ چییون کا شریک بینَه.

⁴⁵ اِشتَن مال و مَنالی خِرَشین و چَیی پولی هَر کسی اِحتیاجاتی قَدَر، گِردی میانه کا تَقسیم بَکَردین.

⁴⁶ اَوِن هَر روز، معبدی کا یَندی نَه جَمع آبین و اِشتَن کَ اون کا نی نون پَله بَکَردین، خوشی نَه و دَس دیل بازَه دیلی نَه یَندی نَه غذا بَردین

⁴⁷ اَوِن خِدا ستایش بَکَردین. مردم گِرد، اَوون اِحترام بَناین؛ و خِداوند هَر روز کسونی که نجات‌ پَیدا بَکَردین، چَوون جمعی دیلَه کا اِضافه آکَری.