رَسولون اَعمال 19 - کتاب مقدس به زبان تالشی شمالیپولس اَفِسُسی کا 1 ولی موقعی که آپولس قُرِنتُسی شهری کا بَه، پولس بعد از اِم که اَ منطقه اون خِشکی راه کا دَوییَردَه، آرَستَه اَفِسُسی شهری را. اوآ کا چَن گِله شاگِردون تِلَفتِشه 2 پولُس اَوون کا دَفَرسِشه: «وختی که ایمان وَردِرونَه، روح القدسی ویگِتِرونَه؟» اَوِن جَواو دوشونه: «نِه، اَمَه حتی دَرَسَمون نییَه که روح القدسی نی اِستَه.» 3 پولس اَوون نَه واتِشه: «بَس چِنتَه رَه غسل تعمیدی گِتَرونَه؟» اَوِن واتِشونَه: «یحیی غسل تعمیدی.» 4 پولس واتِشه: «یحیی کَسونی که توبه کَردَشون بَه، تعمید بَدای. اَ، مردمی نَه بَواتی اَ کسی ایمان بواَرِن که چَیی پَش بومَی، یعنی بِه عیسی.» 5 وختی اَوِن اِمی دَرَسِشونَه، عیسایِ خِداوندی نومی نَه غسل تعمید گِتِشونَه. 6 و وختی که پولس چَوون سَری دَس پِنوشه، روح القدس چَوون سَر قرار گِتِشه. اَوِن دییَر زَوونون نَه گَف ژَندِشونَه و نبوّت کَردِشونَه. 7 اَ مِردَکِن، گِرد حدوداً دونزَه نفر بینَه. 8 دومله پولس شَه یهودیون عِبادتگاه، اوآ کا سِه مانگ جرئتی نَه گَف ژَنی و دلیل بواَردی و خِدا پاُتشایی درباره اَوون قانع بَکَردی. 9 امّا بَعضی سَرسختی بَکَردین و ایمان نِوَرین و گِردی چِمی پیشی کا اَهل ’طریقتی‘ یعنی ایماندارون، بَدی بَواتین. بَس پولس اَوون کا جِدا آبَه، اِشتَن شاگِردون پِگِتِشه و هَر روز تیرانوسی مدرسه کا دَمندَه گَف ژَندِه و دلیل وَردِه. 10 دِ سال اِنتَه دوییَرده و اِم مدتی کا، گِردِ آسیا ایالتی مردم، چِه یَهودیی و چِه یونانی، خِداوَندی کلامی دَرَسِشونَه. اِسکیوایی زوعَه اِن 11 خِدا پولسی دَسی نَه عجیب غریبَه مُعجزه اونی اَنجام بَدای، 12 جوری که مردم دَستمالون و پیشبندونی که چَیی جانی کا گِنَه بینَه، مریضون را بَبردین، و چَوون مریضی وَج آبی و پلیدَه اَرواح اَوون کا بِرون بَشین. 13 بَس چَن گِله یَهودی که جِن گیر و دورَه گَرد بینَه نی تَقّلا کَردِشونَه عیسایِ خِداوَندی نومی کَسونی سَر که پلیدَه روح دارین، بوخونِن. اَوِن بَواتین: «شِمَه قَسَّم بَدایمون بِه اَ عیسایی که پولس اَیی اِعلام بَکَردی!» 14 کَسونی که اِنتَه بَکَردین، اِسکیوایی هفت گِله زوعَه اِن بینَه که یهودی ایلَه سَران کاهنون کا بینَه. 15 امّا پلیدَه روح چَوون جَواوی کا واتِشه: «عیسی آزونِم، پولسی نی آزونِم، امّا شِمَه کی اِستیرونَه؟» 16 اَ مِردی که پلیدَه روح داری چَوون سَر ویخِتَه، اِنتَه اَوون ژَندِشَه که لُخت و زَخمی اَ کَ کا دَوَشتینَه. 17 وختی اَفِسُسی مردم گِرد، چِه یَهودی چِه یونانی، اِم کاری کا خَوَر دار بینَه، گِردی جانی کا تَرس دَلَکه، جوری که چَیی پَش عیسایِ خِداوندی نومی وِر اِحترام بَناین. 18 و وِر کسونی که ایمان وَردَشون بَه، اومینَه نار، اِشتَن کارون آشکارا اِقرار کَردَشونَه. 19 وِر کَسِن نی که چِمی پیش جادوگری بَکَردین، اِشتَن کتابون وَردِشونَه و گِردی چِمی پیشی کا سوتِشونَه. وختی کتابون پولی حِساب کَردِشونَه، پینجا هَزار گِله نقره سِکه بَه. 20 اِنتَه، خِداوندی کلام گِردِ جِگا کا پخش آبی و قوّت گِری. 21 اِم اِتِفاقون پَش، پولس، خِدا روح کا هدایت بَه که مقدونیَه و اَخائیَه منطقه کا دَوییَرِه، بِشو اورشلیمی را. پولس واتِشه: «چِمِن شییِه پَش بِه اوآ، بَسی رومی شهری نی بِوینِم.» 22 دومله دِ نفر اِشتَن همکارون کا، تیموتائوس و اِراستوسی وَیسا آکَردِشه مقدونیَه را و اِشتَن چَن وخت آسیا ایالتی کا مَندَه. اَفِسُسی کا بَلوا بَبی 23 اِم موقع، اَهل ’طریقت‘ یعنی ایماندارون ضِد، ایلَه بَرکَ بَلوایی بَر پا بَه. 24 ایلَه نقره کار که چَیی نوم دیمیتریوس بَه، آرتِمیسی معبدی را نقره ای یَه چییونی وَج آکَری و اِم راه نَه وِرَه درآمدی صنعتگرون عائد کَردَش بَه، 25 صنعتگرون و اِنتَه رَه کارون صاحِبون جمع آکَردِشه و اَوون نَه واتِشه: «آقا اِن، بَزنیرون که چَمَه درآمد اِم کسب و کاری کایَه. 26 امّا هَتَه که بَویندیرون و دَرَسه، اِم پولس نِه فقط اَفِسُسی کا، بَلکَم تقریباً گِردِ آسیا ایالتی کا، وِرَه یالَ جماعتی قانع و گمراه کَردَشه. اَ بَواتی خِدا اونی که آدَمی دَسی نَه وَج آبَه اینَه، خِداِن نینَه. 27 بَس اِم خطَر اِستَه که نِه فقط چَمَه کسب و کار رونقی کا دَلَکِه، بَلکَم آرتِمیس چَمَه یالَ الهۀ معبد نی هیچ آبو و حتی اِشتَن عظمَتی از دَس بِدَه. اَ اِلهه ای که گِردِ آسیا ایالتی کا و گِردِ دنیا کا پَرستش بَبی.» 28 اَوِن وختی اِمی دَرَسشونَه، وِر عصبانی آبینَه، خِلِع کَردِشونَه که: «یالَه، اَفِسُسیانی آرتِمیس!» 29 گِردِ شهری کا بَلوا بَر پا بَه! و اَوِن یَندی نَه هَمدَس بینَه و هُجوم بَردِشونَه مسابقاتی مَیدونی طرفی را. اَوِن گایوس و آریستارخوسی که مقدونیَه شِن بینَه و پولسی هَمراه اوون کا بینَه، ویسویِه ویسویِه نَه اِشتَن نَه بَردِشونَه . 30 پولس پیستِشَه بِشو جماعتی دیلَه، امّا شاگِردِن نییَشتِشونَه. 31 حتی آسیا ایالتی حاکمون کا بعضی که چَیی رَفِق بینَه، اَیی را پَیغومی ویسا آکَردِشونَه، خواهیشت کَردِشونَه که مسابقاتی مَیدونی کا پا مَنه. 32 جماعتی دیلَه کا غوغا بَه و مردم گیج بینَه. گِرد خِلِع ژنین و هَر کسی ایی چیی بَواتی و وِرتَرِه مردم نیمَزنین چیرا جَمع آبَه اینَه. 33 بعضی اِن گمون بَکَردین که اِسکندر، مسئولَه، چوم یَهودییِن اِسکندری پیش دَرَفَندَه شون بَه، و بَعضی جماعتی میانه کا بَیی دستورونی بَداین. اَ، اِشتَن دَسی تکان دوشَه، مردمی کا پیستِشَه ساکت آبون و تَقَّلا کَردِشه چیی بوآجِه و اِشتَن کا دفاع بِکَرِه. 34 امّا وختی مردم زونِستِشونَه یَهودی یَه، گِرد یَکصدا، دوروبَر دِ ساعت خِلِع بَکَردین: «یالَه، اَفِسُسیانی آرتِمیس!» 35 آخِرسَر، شهری داروغۀ جماعتی آروم آکَردِشه و واتِشه: «اِی اَفِسُسی مردم، کییَه که مَزونِه اَفِسُسی شهر یالَه آرتِمیسی معبدی نگهبانَه؟ کییَه که مَزونِه اَفِسُسی شهر مقدّسَ سِنگی نگهبانَه که آسِمونی کا بَلَکَه جیر؟ 36 بَس چوم نییَب اِم چییون اِنکار کَردِه، شِمَه بَسی آروم بِبییَه و هول هولکی کاری مَکَرَه. 37 چوم شِمَه که اِم مِردَکونی که وَردَرونَه اییا، نِه چِمَه معبدی بی حرمتی کَردَشونَه و نِه چِمَه الهۀ نَه کُفر واتَشونَه. 38 بَس اَگم دیمیتریوس و صنعتگرِنی که اَیی نَه همکاری نَه کسی کا شکایتی هِستِشونَه، محکمه اون بَر بازَه و حاکمِن نی حاضِری نَه. بَشاین اِشتَن شکایتون بِبَرِن اوآ. 39 امّا اَگم دییَر شِکایتی هِستِرونَه، بَسی اَیی، شهری اَنجمنی کا حل و فصل بِکَرَه. 40 چوم اَمَه راس راسی اِم خطری کا ایمونَه که اوری اِم اِتِفاقون واسی، شورشگری را محکوم بِبییَم. اَگَم اِنتَه بِبو، نیمَشایَم اِم بلوا را دلیلی بواَرَم.» 41 وختی که داروغه اِم گفی ژَندِشَه جَماعتی وِلا آکَردِشه. |
@ 2024 Korpu Company