رَسولون اَعمال 18 - کتاب مقدس به زبان تالشی شمالی

پولس قُرِنتُسی شهری کا

¹ چَیی پَش، پولس آتِنی شهری کا اومَه بِرون و شَه قُرِنتُسی شهری را.

² اوآ کا ایلَه یهودی یَه مِردی نَه آشنا آبَه که چَیی نوم آکیلا بَه. آکیلا پونتوسی منطقه مردمی کا بَه. اَ اِشتَن ژِنی نَه، پْریسکیلا نَه، تازگی ایتالیا کا اومَه بَه، چوم کْلودیوس، رومی اِمپراطور دَستور دوعَش بَه که یَهودییِن گِرد، رومی کا بِشون. پولس شَه چَوون ویندِه را،

³ و چوم اَ نی چَوون شیوار کارِش خیمه دِرزی بَه، چَوون وَری کا مَندَه و مَشغول بِه کار بَه.

⁴ پولس هَر هفته مقدّس شنبه روز، عِبادتگاه کا یَهودیون و یونانیون نَه بَحث بَکَردی و تَقَّلا بَکَردی اَوون قانِع بِکَرِه.

⁵ وختی سیلاس و تیموتائوس مقدونیَه منطقه کا اومینَه، پولس اِشتَن گِردِ وختی، خِدا کلامی را نوعَش بَه، و یَهودییون را شهادتی بَدای که مسیح موعود هَ عیسی یَه.

⁶ امّا وختی یهودییِن، پولسی نَه مخالفَت کَردِشونَه و عیسی فَش دوشونَه، پولس اَ شهری خاک و خُلی اِشتَن خَلااون کا چَوون ضِدّ تَکان دوشَه و اَوون نَه واتِشه: «شِمَه خون شِمَه گَردن بِبو! اَز تقصیر کار نیمَه. چِمی پَش، بَشیم غیریهودیون وَر.»

⁷ دومله عِبادتگاه نَه شَه تیتوسِ یوستوسی کَ که خِداپرستَ مِردی بَه و چَیی کَ عِبادتگاه وَری کا بَه.

⁸ کْریسپوس که عِبادتگاه رئیس بَه، گِردِ اِشتَن خانواده نَه خِداوندی ایمان وَردِشونَه. هِنته نی وِر کَسِن قُرِنتُسی شهری اَهالی کا وختی پیغومی دَرَسِشونَه، ایمان وَردِشونَه، غسل تعمید گِتِشونَه.

⁹ ایی شَو خِداوند رویا کا پولسی نَه واتِشه: «مَتَرس! گَف بِژَن و ساکت مَبَش!

¹⁰ چوم اَز بَه تِنه ایمَه و هیچکس نیمَشا بَه تِن هُجوم بواَرَه تا اِشتِه سَر بَلایی بواَرِه، چوم که از اِم شهری کا وِرَه آدَمونی هِستِمَه.»

¹¹ بَس، پولس ایی سال و نیم اوآ کا مَندَه و خِدا کلامی اَوون تعلیم دوشَه.

¹² امّا اَ موقع که گالیو، اَخائیه ولایتی حاکم بَه، یَهودییِن هَمدَس بینَه، ویبینَه پولسی سَر اَیی وَردِشونَه مَحکمه را.

¹³ اَوِن واتِشونَه: «اِم آدَم مَردمی قانع بَکَردی که ایلَه رَوِشی نَه که خلاف شریعتَه، خِدا پرستش بِکَرِن.»

¹⁴ دومله وختی پولس پیستِشَه گَف بِژَنه، گالیو یَهودییون نَه واتِشه: «اِی یهودییِن اَگم جُرم و جِنایَتی درکار بِبی، از دلیلی داریم که شِمَه شکایتی گوش بِدَم،

¹⁵ ولی چوم که مسئله، کلمه اون و نومون و شِمَه اِشتَن شریعتی سَری واسی یَه، بَس شِمَه اِشتَن اَیی حل و فصل بِکَرَه. اَز نِپیستِمه اِنتَه رَه چییون درباره داوری بِکَرِم.»

¹⁶ بَس اَوون مَحکمَه کا بَرکَردِشه.

¹⁷ اَوِن نی گِرد سوسْتِنِسی سَر هُجوم بَردِشونَه، که عِبادتگاه رئیس بَه و اَیی، فرمانداری پیشی کا ژَندِشونَه. امّا گالیو هیچ اِشتَرا نِنوشَه.

پولسی آگَردِستِه اَنطاکیه را

¹⁸ پولس وِرَه مدّتی قُرِنتُسی کا مَندَه، و بِرااون نَه وداع کَردِشه و دَریا نَه سوریه را رایی بَه. اِم سَفری کا، پْریسکیلا و آکیلا نی چَیی هَمراه بینَه. پولس کِنخْریه کا اِشتَن سَری تِراشتِشه، چوم اِنتَه نذر کَردَش بَه.

¹⁹ وختی آرَستینَه اَفِسُسی شهری را، اِشتَن همسَفَرون تَرک کَردِشه و اِشتَن شَه عِبادتگاه، دَمَنده یَهودیون نَه بَحث کَردِه.

²⁰ اَ موقع که اَوِن پولسی کا پیستِشونَه تِلی وِرتَر اَوون نَه بومونِه، پولس قبول نِکَردِشه،

²¹ ولی وختی کارا اَوون نَه خداحافظی بَکَردی، واتِشه: «اَگم خِدا پیستِشَه هَنی بومَیم شِمه وَر.» دومله ایلَه کشتی دَنِشتَه و اَفِسُسی کا شَه.

²² وختی قیصریه کا کشتی کا ویرمَه، شَه کلیسا آدَمون سَر ژَندِشَه و دومله اَنطاکیَه را رایی بَه.

²³ مدتی اوآ کا مَنده و هَنی رایی سَفر بَه، اَ، غَلاطیه و فْریجیه منطقه سَرتاسری کا جِگا بِه جِگا گَردی و گِردِ شاگردون ایمانی کا تقویت بَکَردی.

آپولس، اَفِسُسی شهری کا جرئتی نَه گف ژَنی

²⁴ اَ روزون کا، ایلَه یَهودی، که چَیی نوم آپولس بَه و اِسکندریه آدمون کا بَه، اومَه اَفِسُس. اَ، گفَ ژَنی کا اوستا بَه و مقدّس نیویشته اون کا وِر بَزنی؛

²⁵ خِداوندی راه کا تعلیم گِتَش بَه و شور و شوقی نَه گَف ژَنی و ‌دقّتی نَه عیسی درباره تعلیم بَدای، هَر چَن فقط یَحیی تعمیدی کا خَوَر داری.

²⁶ آپولس، یهودیون عِبادتگاه کا دَمَندَه جرئتی نَه گَف ژَندِه. ولی وختی پْریسکیلا و آکیلا چَیی گَفون دَرَسِشونَه، اَیی بَردِشونَه ایلَه گوشه اییرا و خِدا راه دقیقتر اَیی آموتِشونَه.

²⁷ وختی آپولس پیستِشَه بِشو اَخائیه منطقه را، بِرااِن اَیی تشویق کَردِشونَه و شاگِردون را نیویشتِشونَه که اَیی گَرمی نَه قبول بِکَرِن. وختی آپولس آرَستَه اوآ، کَسونی که فیضی واسطه نَه ایمان وَردَشون بَه، وِر کمک کَردِشونَه.

²⁸ چوم گِردی چِمی پیشی کا یَهودیون نَه بَحث بَکَردی، و چَوون عقیده اون، قوّتی نَه رَد بَکَردی، و مقدّس نیویشته اون نَه ثابِت بَکَردی که مسیح موعود هَ عیسی یَه.