رَسولون اَعمال 17 - کتاب مقدس به زبان تالشی شمالی

پولس و سیلاس تَسالونیکی کا

¹ پولس و سیلاس، آمْفیپولیس و آپولونیا شهرون کا دَوییَردینَه و آرَستینَه تَسالونیکی شهری، که اوآ کا یَهودی اِن عِبادتگاه شون اِستبَه.

² پولس طبق اِشتَن عادَت شَه عِبادتگاه، اَ، سِه گِله مقدّس شنبه روزی کا درباره مقدّس نیویشته اون اَوون نَه بَحث بَکَردی

³ و توضیح بَدای، دلیل بواَردی که لازمَه مَسیح رنج بِکَشه و مَردَه اون دیلَه کا زِندَه آبو. پولس بَواتی: «اِم عیسی که اَیی شِمَه را اِعلام بَکَردیم، هَ مَسیح موعودَه.»

⁴ بعضی اَوون کا قانع بینَه کِه پولسی و سیلاسی مُلحق بِبون. و هِنتَه نی ایلَه یالَه گروه خِداپرستَ یونانیون کا و وِرَه سَرشناس ژِنَکِن، چَوون مُلحق بینَه.

⁵ امّا یَهودی اِن حسودی کَردِشونَه و چَن نفر قالتاقَه آدَم بازاری کا جَمع آکَردِشونَه، ایی دسته راه دَرَفندِشونَه و شَهری کا بَلوا بِه پا کَردِشونَه. اَوِن پولس و سیلاسی دومله گردین و هُجوم بَردِشونَه یاسونی کَ تا اَوون بواَرِن بِرون جماعتی دیلَه.

⁶ وختی اَوون پیدا نِکَردِشونَه، یاسون و بعضی دییَر بِرااون کَشوندِشونَه شهری حاکِمون وَر و خِلِع کَردِشونَه که: «اِم مِردَکِن که گِردِ دنیا کا آشوب کَردَشونَه، حِسَه اومَینه اییا

⁷ و یاسون اَوون بَردَشه اِشتَن کَ. اِمِن گِرد، اِمپراطوری دستورون کا سَرپیچی بَکَردین و اِدعا بَکَردین که ایلَه پاُتشا دییَری اِستَه که چَیی نوم عیسی یَه.»

⁸ وختی مردم و شهری حاکِمِن اِمی دَرَسشونَه، پریشون آبینَه.

⁹ دومله یاسون و بقیه کا ضِمانت ویگِتشونَه، و اَوون آزاد آکَردِشونَه.

پولس و سیلاس بیریَه شهری کا

¹⁰ بِرااِن شَوونَه، اَلبَحَل پولس و سیلاسی ویسا آکَردِشونَه بیریَه شهری را. اَوِن وختی آرَستینَه اَ شهر، شینَه یَهودییون عبادتگاه دیلَه.

¹¹ اِم یهودییِن اَ یَهودیونی کا که تَسالونیکی شهری کا بینَه، نَجیبتَر بینَه، اَوِن شور و شوقی نَه پیغومی قَبول کَردِشونَه و هَر روز مقدّس نیویشته اون خونین تا بِوینِن که پولس و سیلاسی گف خِدا کلامی شیوارَه یا نِه.

¹² اِنتَه، وِر کَسِن یَهودیون کا ایمان وَردِشونَه و ژِنَکونی تعداد که ایمان وَردِشونَه نی کَم نِبَه. وِر یونانی یَه مِردَکِن که سرشناس بینَه نی ایمان وَردِشونَه.

¹³ امّا وختی تَسالونیکی یهودییِن زونِستِشونَه که پولس بیریه کا نی خِدا کلامی اِعلام بَکَردی، شینَه اوآ و مَردمی آنتیریک کَردِشونَه و شهری کا بَلوا بِه پا کَردِشونَه.

¹⁴ بِرااِن اَلبحَل پولسی رایی کَردِشونَه ساحِلی طرفی را، امّا سیلاس و تیموتائوس بیریه کا مَندینَه.

¹⁵ کسونی که پولسی همرایی کَردِشونَه، اَیی وَردِشونَه تا آتِنی شهر. دومله پولس اَوون دستور دوشَه که آگَردَه بیریَه شهری را و سیلاس و تیموتائوسی، هَر چِه زودتَر ویسا آکَرِن چَیی وَر.

پولس آتِنی کا

¹⁶ هَتَه که پولس آتِنی کا اَ دِ نفری منتظر بَه، وختی ویندِشه که شهر بُتون نَه پُورَه، چَیی روح ناراحت آبَه.

¹⁷ اِمی واسی، عِبادتگاه کا یَهودیون و خِدا پَرستَ یونانیون نَه و هِنتَه نی هَر روز شهری مَیدونی کا رادَوییَرون نَه بَحث بَکَردی.

¹⁸ ایی گروه فیلسوف اِپیکوری و رَواقی نی اَیی نَه دَمندینَه بَحث کَردِه. بعضی اَوون کا بَواتین: «اِم مِفتَه گفَه ژَن، پیستِشَه چِه بوآجِه؟» بقیه بَواتین: «اِنگاری خِدا اونی تبلیغ بَکَردی که اَمَه را ناشِناسی نَه.» چوم پولس، عیسی و مَردَه اون زندَه آبییِه درباره اَوون را گف ژَنی.

¹⁹ هَ موقع پولسی پِگِتشونَه، بَردِشونَه ’آریوپاگوسی‘ را، هَ جِگایی که مردم اوآکا جمع آبین، و اوآکا اَیی نَه واتِشونَه: «بَبی بِزونَم که اِم تازه تعلیمی که تِه بَدایش، چَه؟

²⁰ چوم که اِشتِه گفِن چَمَه گوشی کا عَجیب غِریبی نَه. بَس پیستِمونَه بِزونَم چَوون معنی چَه.»

²¹ گِردِ آتِنی مردم و غریبه اونی که اوآ کا زندگی بَکَردین، کاری غِیر اَز اِم نیشونه که اِشتَن وختی بِنَن که تازه عقیده اون درباره گف بِژنِن و دَرَسِن.

²² بَس پولس ’آریوپاگوسی‘ جمعی دیلَه کا پِرِشته و واتِشه: «اِی آتِنی یَه مِردَکِن، اَز شِمَه هَر نظری کا وِر دیندار بَویندیم.

²³ چوم وختی شَهری دیلَه کا گردیم و اَ چیی که شِمَه پَرستِش بَکَردیرون، دَیِسیم، ایلَه قِربونگاهی ویندِمه که چَیی سَری کا نیویشتَه بییَه بَه: ”تقدیم بِه خِدایی که ناشِناسَه“. حِسَه، از اَ چیی که شِمَه اَیی آنِزونَه و پَرستِش بَکَردیرون، شِمَه را اِعلام بَکَردیم.

²⁴ «خِدایی که دنیا و هَر چیی که چَیی دیلَه کایَه خَلق کَردِشه، آسِمون و زَمینی صاحِبَه و معبدونی کا که اِنسانی دَسی نَه وَج آبَیینه زندگی نِکَرِه.

²⁵ و چییونی محتاج نییَه که آدَمی پیستِشَه اِشتَن دَسون نَه خِدا را وَج آکَرِه، چوم اَ اِشتَن گِردِ مردمی زندگی و نَفَس و هَر دییَر چییونی بَبَخشِستی.

²⁶ اَ، گِردِ قومون ایلَه اِنسانی کا بِه وجود وَردِشه تا گِردِ زَمینی کا زندگی بِکَرِن؛ و اَوون را وَختون تعیین کَردِشه و چَوون زندگی محلی حَد و حدودی تعیین کَردِشه.

²⁷ تا مردم خِدا دومله بِگردِن، شاید چَیی دومله بِشون و اَیی بِتلَفِن، هَر چَن خِدا، هیچ کَمیله اَمَه کا دور نییَه.

²⁸ چوم که، ”چَیی دیلَه کایَه که زندگی بَکَردیمون و حرکت بَکَردیمون و هَستی اِستِمونَه؛“ هَتَه که بعضی شِمَه شاعِرِن نی واتَشونَه که: ”حقیقتاً چَیی نسلی کا ایمونَه.“

²⁹ «حِسَه که خِدا نَسلی کا ایمونَه، چاک نییَه اِنتَه فیکر بِکَرَم که خِدا، ایلَه طِلا یا نقره یا سِنگی شیوارَه، یا ایلَه مجسمه ای شیوار که آدَمی هنر و خَیالاتی نَه تِراشتَه بییَه.

³⁰ قدیمون، خِدا اِنتَه رَه نادونَ کارون کا چِم پوشی بَکَردی. ولی حِسَه گِردِ مردمی را هَر جِگا کا که اِستینَه دستور بَدای که توبه بِکَرِن.

³¹ چوم اَ، ایی روز تعیین کَردِشه که اَیی کا توسط اَ مِردی که مُعیین کَردَشه، عدالتی نَه دنیا داوری بَکَردی، و چَیی زِنده آکَردِه نَه مَردَه اون دیلَه کا، گِردی اِم ماجرا کا خاطِر جَمع کَردَشه.»

³² وختی اَوِن مَردَه اون زِندَه آبییِه درباره دَرَسِشونَه، بعضی ریشخند ژَندِشونَه، امّا بَقیه واتِشونَه: «اَمَه پیستِمونَه اِم چییون درباره، هَنی تِه کا دَرَسَم.»

³³ بَس پولس، چَوون جمعی دیلَه نَه شَه.

³⁴ ولی چَن نفر بَیی مُلحق بینَه و ایمان وَردِشونَه. و چَوون دیلَه کا دیونیسیوس، که ’آریوپاگوسی‘ ایلَه آدَمون کا بَه، ایلَه ژِنی که چَیی نوم داماریس بَه، و چَن نفر دییَر نی، اَ گروه کا بینَه.