رَسولون اَعمال 15 - کتاب مقدس به زبان تالشی شمالی

اورشلیمی شورا

¹ امّا چَن نفر یهودیه ولایتی نَه اومینَه اَنطاکیَه را. اَوِن بِرا اون تعلیم بَداین و بَواتین که: «اَگم مطابق موسی دَب ختَنه مَبییَه، نیمَشایَه نِجات پِیدا بِکَرَه.»

² وختی پولس و بَرنابا اَوون نَه وِر مخالفَت کَردِشونَه و بحث کَردِشونَه، هِنتَه نی قَرار نوشونَه که اَ دِ نفر چَن نفر دییَری نَه اَوون کا بِشون اورشلیمی شهری را و اِم ماجرا رسولون و شیخون نَه در میان بِنَن.

³ بَس کلیسا اَوون رایی کَردِشه؛ و وختی اَوِن فینیقیه و سامِرِه کا کارا دَوییَرین، جزئیاتی نَه تعریف کَردِشونَه که چِنتَه غیریهودیِن ایمان وَردِشونَه و گِردِ بِرا اِن اِم خَوَری کا وِر خوشحال بینَه.

⁴ وختی آرَستینَه اورشلیم، کلیسا و رَسولِن و مشایخ، گرمی نَه اَوون قبول کَردِشونَه. پولس و بَرنابا هَر چی که خِدا چَوون واسطه نَه اَنجام دوعَش بَه، چَوون را واتِشونَه.

⁵ ولی بعضی فریسی فِرقه عُلما که ایمان وَردَشون بَه، پِرِشتینَه، واتِشونَه: «واجِبَه که غیریهودیِن ختَنه بِبون و اَوون دستور دوشونَه که موسی شریعتی غَم بَرِن.»

⁶ رَسولِن و مَشایخ جَمع آبینَه تا اِم قضیه بَررسی بِکَرِن.

⁷ وِر بحث کَردِه پَش، آخِرسَر پطرس پِرِشته و اَوون نَه واتِشه: «اِی بِرا اِن، شِمَه بَزنیرون که اوّلین روزون کا، خِدا شمَه دیلَه کا مِن اِنتخاب کَردِشه تا غیریهودییِن چِمِن زوونی کا اِنجیلی پَیغومی دَرَسِن و ایمان بواَرِن.

⁸ و خِدایی که دیلی کا خَورِش اِستَه اَوون را گواهی دوشَه اِنتَه که روح القدسی اَوون عَطا کَردِشه، هَتَه که بَمون نی عطا کَردَشه.

⁹ خِدا چَمَه و چَوون میانه کا هیچ فرقی نِنوشه، بَلکَم ایمانی واسی، چَوون دیلون پاک آکَردِشه.

¹⁰ بَس حِسَه چیرا خِدا آزمایش بَکَردیرون و شاگِردون گَردنی کا یوغی پِنَیه که نِه اَمَه بَشایمون اَیی پِگِرَم، نِه چَمه اَجداد؟

¹¹ ولی اَمَه ایمان هِستِمونَه که عیسایِ خِداوندی فیضی کا یَه که اَمَه نِجات پیدا بَکَردیمون، هَتَه که اَوِن نی نجات پیدا بَکَردین.»

¹² دومله جماعتْ گِرد ساکت آبینَه و بَرنابا و پولسی گفون گوش دوشونَه. اَوِن علامت و معجِزه اونی که خِدا چَوون واسطه نَه غِیریهودیون دیلَه کا کَردش بَه، هَنی بَواتین.

¹³ وختی که چَوون گَفِن تَمون آبینَه، یعقوب واتِشه: «اِی بِرااِن، چِمِن گفون گوش بِدییَه.

¹⁴ شَمعونِ پطرس واتِشه که چِنتَه خِدا اوّلین کَرَه غِیریهودیون لطف کَردَشه، و چَوون دیلَه کا اِشتَن نومی را ایلَه قومی اِنتخاب کَردَشه.

¹⁵ اِم پیغمبرون گفون نَه مطابقَه، هَتَه که نیویشتَه بییَه:

¹⁶ «”چِمی پَش، آگَردِم و داوود پاُتشا خیمَه که بَلَکَه از نو وَج آکَرِم؛ هَنی چَیی ویرونَه اون بینا بَکَردیم، و اَیی چَیی اوّلی شیوار وَج آکَرِم،

¹⁷ تا اَوِنی که اِنسانون نَسلی کا بِجا مَندینَه، و گِردِ غِیر یهودیونی که چمِن نومی اِشتَن کا هِستِشونَه، خِداوندی طلب بِکَرِن. خِداوند بَواتی، خِداوندی که،

¹⁸ اِم چییون قَدیمی کا مَعلوم کَردَشه.“

¹⁹ «بَس چِمِن حکم اِمَه، کسونی که غِیر یهودیون کا خِدا طَرف آگَردِن، زَحمَت مَدییَم.

²⁰ امّا بَسی ایلَه نامه‌ای دیلَه کا اَوون کا بِپییَم که خوراکی کا که بُتون را قِربونی بییَه، زِنا کا، خفه بییَه حَیوونون گوشت و خونی کا دوری بِکَرِن.

²¹ چوم قَدیمی کا موسی هَر شهری دیلَه کا کَسونی داشتَشه که چَیی شریعتی اِعلام بِکَرِن، هَتَه که هَر هفته مقدّس شنبه روزی کا، چَیی نیویشته اون یهودیون عبادتگاه اون کا بَخَندین.»

شورا نامه غِیر یهودیون ایماندارون را

²² بَس رسولِن و مَشایخ، گِردِ کلیسا نَه تَصمیم گِتِشونَه اِشتَن دیلَه کا مِردَکونی اِنتخاب بِکَرِن و اَوون پولس و بَرنابا همراه ویسا آکَرِن اَنطاکیَه شهری را. بَس یهودایِ معروف بِه بَرسابا و سیلاسی، که بِرا اون دیلَه کا رَهبر بینَه، اِنتخاب کَردِشونَه.

²³ دومله ایلَه نامه چَوون دَسی نَه ویسا آکَردِشونَه، که اَیی کا نیویشته بییَه بَه: « چَمَه طرفی نَه که شِمَه بِرا ایمونَه، هَم رسولِن و هَم مَشایخ، غِیر یهودیَه بِرااونی را که اَنطاکیَه، سوریَه و کیلیکیه کا اینَه، سلام!

²⁴ دَرَسَمونَه که کَسونی چَمَه میانه کا، بی اِم که دستوری اَمَه کا بِدارِن، اومَینَه و شِمَه، اِشتَن گفون نَه تَشویش کَردَشونَه، و باعیث بَه اینَه شِمَه فیکر پَریشون آبو.

²⁵ اِمی واسی اَمَه یَکدیل اِنتَه صَلاح ویندِمونَه که مِردَکونی اِنتخاب بِکَرَم و اَوون، بَرنابا و پولسی همراه، که چَمَه عزیزی نَه، ویسا آکَرَم شِمَه وَر،

²⁶ اَ مِردَکونی همراه که چَمَه خِداوند عیسایِ مسیح نومی واسی، اِشتَن جانی اِشتَن دَسی تونی کا نوعَشونه.

²⁷ بَس یهودا و سیلاسی ویسا آکَردِمونَه تا اِشتَن گفون نَه، شِمَه اِم کارون کا خَوَر دار بِکَرِن.

²⁸ روح القدس و اَمَه اِنتَه صلاح ویندِمونَه که شِمَه دوشی سَری کا باری مَنییَم، غیر اَز اِم چییون که ضَروری اینَه

²⁹ بُتون قِربونی یَه خوراکی کا و خفه بییَه حَیوونون خون و گوشت و زِنا کا دوری بِکَرَه. اَگم اِمون کا دوری بِکَرَه، چاک بَکَردیرون. وَسّلام.»

³⁰ بَس اَوِن رایی بینَه، شینَه اَنطاکیَه شهری را و اوآ کا کلیسا آدَمون جَمع آکَردِشونَه، و نامه آرِساووندِشونَه.

³¹ وختی که اَوِن نامه خَندِشوونَه، اَ پَیغومی کا که دیلگرمی باعیث بَه شاد آبینَه.

³² یهودا و سیلاس نی که پیغمبر بینَه، وِرَه گَفون نَه، بِرااون تَشویق کَردِشونَه و قوّت دوشونَه.

³³ یهودا و سیلاس چَن وَخت اوآ کا مَندینَه، و دومله بِرااِنْ، اَوون سلامتی نَه رایی کَردِشونَه تا آگَردِن اِشتَن ویسا آکَردَه کَسون وَر.

³⁴ امّا پولس و بَرنابا اَنطاکیه کا مَندینَه

³⁵ اَوِن دییَر ایماندارون همراه دَمَندینَه خِداوندی کلامی تعلیم دوشونَه و اِعلام کَردَشونَه.

پولس و بَرنابا میانه اِختلاف دَلَکِه

³⁶ چِندی پَش، پولس، بَرنابا نَه واتِشه: «آگَردَم شَهرونی را که خِداوندی کلامی اَوون کا اِعلام کَردَمونَه، و بِرا اون کا دیدار بِکَرَم تا بِوینَم چِه حال و اوضاعی دارِن.»

³⁷ بَرنابا پیستِشَه یوحنایی که معروف بِه مَرقُس بَه نی چَوون همراه بِشو،

³⁸ امّا پولس صلاح نِویندِشه کسی که پامفیلیه کا اَوون تَنخا نوشه و اِشتَن همکاری اِدامه دوعَش نِبَه، اِشتَن نَه بِبَرِه.

³⁹ اوآکا پولس و برنابا میانه کا بَدجوری اِختلاف دَلَکه، اِنتَه که یَندی کا جِدا آبینَه. بَرنابا، مَرقُسی پِگِتشه و دَریا راه نَه قِپرسی را رایی بَه؛

⁴⁰ امّا پولس، سیلاسی پِگِتِشه و بِرا اون نَه دَس آدوشَه، خِداوندی فیضی نَه سَفری را رایی بَه.

⁴¹ وختی پولس، سوریه و کیلیکیه کا دَوییَری، اوآ کلیسا اون تقویت بَکَردی.