رَسولون اَعمال 14 - کتاب مقدس به زبان تالشی شمالی

پولس و بَرنابا قونیه کا

¹ قونیه شهری کا نی پولس و بَرنابا شینَه یهودیون عبادتگاه دیلَه و اِنتَه گَف ژَندِشونَه که وِر کَسِن یَهودیون و یونانیون کا ایمان وَردِشونَه.

² امّا یهودیونی که ایمان وَردَشون نِبَه، غیریهودیون آنتیریک کَردِشونَه و چَوون فیکری بِرا اون ضد مسموم کَردِشونَه.

³ بَس پولس و بَرنابا وِرَه زمانی اوآ کا مَندینَه و جرئتی نَه خِداوندی را گَف ژَندِشونَه، خِداوندی که اَوون قوّت بَبَخشستی تا علامت و معجزه اون اَنجام بِدَن و اِنتَه، اِشتَن فیض بَخشَه پَیغومی تأیید بَکَردی.

⁴ ولی اَ شهری مردم دِ گروه بینَه؛ ایی گروه یَهودیون طرفدار بینَه و اَ ایلَه گروه رسولون طرفدار.

⁵ وختی غیریهودییِن و یَهودییِن اِشتَن پیله تَرون نَه تصمیم گِتِشونَه که پولس و برنابا نَه بَدرفتاری بِکَرِن و اَوون سِنگسار بِکَرِن،

⁶ پولس و بَرنابا اِم ماجرا کا خَوَر دار بینَه، و دَوشتینَه شینَه لِستْرِه و دِربِه را، که لیکائونیَه شهرون کا بَه،

⁷ و اوآ کا خِدا خوشَه خَوَری اِعلام کَردِشونَه.

پولس و بَرنابا لِستْرِه کا

⁸ لِستْرِه کا ایلَه مِردی نِشت بَه که نیمَشای اِشتَن پا اون تَکان بِدَه و هَرگز راه شَه نِبَه، چوم مادرزادی شَل بَه.

⁹ وختی که پولس گَف ژَنی، اَ شَلَ مِرد گوش بَدای. پولس اَیی زول ژَندِشه و ویندِشه که ایمان هِستِشه شفا بِگِرِه.

¹⁰ پولس بِلنده سَسی نَه اَیی نَه واتِشه: «اِشتِه پااون سَری کا سَرپا بومون!» اَ مِرد اِشتَن جِگا کا وَشتَه و راه دَلَکه.

¹¹ وختی مردم اَ چیی که پولس اَنجام دوشَه ویندِشونَه، لیکائونی زوونی نَه خِلع ژَندِشونَه: «خِدا اِن اِنسانون شیوار اومَینَه جیر چَمَه وَر!»

¹² اَوِن بَرنابا نومی’زِئوس‘ پِنوشونَه و پولسی نومی’هِرمِس‘ پِنوشونَه، چوم اَصلی یَه گفَ ژَن پولس بَه.

¹³ زئوسِ کاهِن که چَیی معبد شهری دروازَه بِرونی کا بَه، چَن گِله گا و تاجِ گُل وَردِشَه شهری دروازَه وَر؛ اَ و جَماعت پیستِشون بَه که اَوون را قِربونی بِکَرِن.

¹⁴ امّا وختی اَ دِ گِله رسول، یعنی بَرنابا و پولس، اِم کُفری دَرَسِشونَه، اِشتَن خَلااون یَخَه پِزارنیشونَه و جَماعتی دیلَه نَه ویریتینَه، خِلع کَردِشونَه که:

¹⁵ «اِی مِردَکِن، چیرا اِنتَه بَکَردیرون؟ اَمَه نی شِمَه شیوار، اِنسانیمونه. اَمَه خوشَ خَوَری شِمَه را بَدایمون که اِم پوچَه کارون کا دَس پِگِرَه و زِندَه خِدا ایمان بواَرَه که آسِمون و زمین و دریا و هَر چیی که چَوون دیلَه کا یَه، خَلق کَردِشه.

¹⁶ گِذَشتَه کا خِدا گِردِ غیریهودیه قومون نَسلون اِشتَن حال وِل آکَردِشه تا هَر کمیله اِشتَن راه را بِشون،

¹⁷ با اِم حال اَ اِشتَن بیدونِ شهادتی نِنوشه؛ چوم که اَ، آسِمونی کا وارِش ویکَردِه نَه و پُور بارَه فصلون بَخشِستِه نَه، شِمَه را چاکی کَردِشه، وِر خوراک شِمَه آدوشَه و شِمَه دیلون شادی نَه پور آکَردِشه.»

¹⁸ اَوِن حتی اِم گَفون نَه نی، چَتین شاستِشونَه مردمی پیشی بِگِرِن که قِربونی مَکَرِن.

¹⁹ امّا یهودیونی، اَنطاکیَه و قونیَه شهرون کا اومَه بینَه و مردمی اِشتَن نَه هَمدَس کَردِشونَه، و پولسی سِنگسار کَردِشونَه و خَیال کَردِشونَه که پولس مَردَه، اَیی شهری کا بِرون بَردِشونَه.

²⁰ امّا وختی شاگِردن پولسی دور جمع آبینَه، پولس پِرِشتَه و آگَردِستَه شهری را. صَبایی نَه روز، پولس و برنابا رایی بینَه و شینَه دِربِه شهری را.

²¹ اَوِن اَ شهری کا نی بشارت دوشونَه و وِر کَسون نی عیسی شاگِرد کَردِشونَه. دومله آگَردِستینَه لِستْرِه و قونیه و اَنطاکیه را.

²² اَ شَهرون کا شاگِردون جانی قوّت دوشونَه، و اَوون تَشویق کَردِشونَه که اِشتَن ایمانی کا بومونِن و اَوون نصیحت کَردِشونَه که: «بَسی بَرکَ سختیون تاو بواَرَم تا خِدا پاُتشایی دیلَه دَشییَم.»

²³ اَوِن هَر کلیسا کا ایماندارون سَری کا مشایخی هَشتِشونَه و دعا و روزَه نَه اَوون دَسپَردِشونَه خِداوندی دَس که اَیی ایمان وَردَشون بَه.

²⁴ دومله پیسیدیَه منطقه کا دَوییَردینَه و شینَه پامفیلیَه منطقه را،

²⁵ اَوِن پِرجَه کا خِدا کلامی تعلیم دوشونَه، و اوآنَه اومینَه آتّالیَه شهری را.

²⁶ آتّالیَه کا کشتی نَه آگَردِستینَه اَنطاکیَه را، اَ جِگایی را که ایماندارِن پولس و بَرنابا، دَسپَردَشون بَه خِدا فیضی دَس تا هَ کاری اَنجام بِدَن که حِسَه اَنجام دوعَشون بَه.

²⁷ وختی پولس و بَرنابا آرَستینَه اوآ، کلیسا آدَمون جَمع آکَردِشونَه، اَوون را واتِشونَه که خِدا چَوون واسطه نَه چِه‌ کارونی کَردَشه و چِنتَه، ایمانی بَری غیر یهودیون را آکَردَشَه.

²⁸ و وِرَه مدتی شاگِردون نَه اوآکا مَندینَه.