رَسولون اَعمال 13 - کتاب مقدس به زبان تالشی شمالی

برنابا و شائولی سَفر اِنجیلی پیغومی واسی

¹ اَنطاکیه کلیسا کا، پیغمبرِن و مُعلِمِنی بینَه: بَرنابا، شَمعون معروف بِه نیجِر، لوکیوسِ قیرَوانی، و مَنائِن که هیرودیسِ حاکمی ناتَنی یَه بِرا بَه و شائول.

² وختی که اَوِن روزَه بینَه و خِداوندی پرستش بَکَردین، روح القدس واتِشه: «بَرنابا و شائولی بَه مِرا جِدا آکَرَه، اَ کاری واسی که از اَوون دَخوندَمَه.»

³ اَ موقع، روزَه و دعا پَش، اَ دِ نفری سَر دَس پِنوشونَه، اَوون رایی کَردِشونَه سَفَری را.

بَرنابا و شائول قِپرسی کا

⁴ اِنتَه اَ دِ نفر که روح القدسی طَرَفی نَه ویسا آبَه بَه بینَه، شینَه سِلوکیه بندری را و دریا راه نَه آرَستینَه قِپرس.

⁵ وختی دَشینَه سَلامیسی شهری دیلَه، یَهودییون عبادتگاه اون کا، خِدا کلامی اِعلام کَردِشونَه. اَوِن یوحنایی که مَعروف بِه مَرقُس بَه نی اِشتَن نَه بَردِشونَه تا اَوون کمک بِکَرِه.

⁶ اَوِن اَ جَزیره گِردی، گَردی نَه تا آرَستینَه پافوسی شهری را. اوآ کا ایلَه یهودیه مِردی ویندِشونَه که چَیی نوم بارْ‌یشوعَ بَه و جادوگر و دروعَه پیغمبر بَه.

⁷ اَ رومی فَرماندار’سِرگیوس پولسی‘ رَفِقون کا بَه. فرماندار که عاقلَ مِردی بَه، بَرنابا و شائولی دَخوندِشه اِشتَن وَر، چوم پیستِشَه خِدا کلامی دَرَسی.

⁸ امّا اَ جادوگر که چَیی نومی معنی عالِم بَه، اَوون نَه مخالفت کَردِشه و تَقَّلا کَردِشه که مَرزِه فرماندار ایمان بواَرِه.

⁹ ولی شائول، که اَیی نَه پولس نی بَواتین، روح القدسی کا پُور آبَه، اَ مِردی چِمی دیلَه دَیشتَه و واتِشه:

¹⁰ «اِی اِبلیسی خِردَن، تِه اِی گِردِ چاکیون دِشمن، اِی که مَکر و حیلّه کا پوریش! چیرا خِداوندی راستَه راه اون کَج آکَردِه کا دَس نِپِگِری؟

¹¹ بِزون که خِداوندی دَس اِشتِه ضِدَه. حِسَه کور بَبیش و تا چَن وخت نیمَشای آفتاوی رنگی بِوینی.» دَرجا، گِردِ جِگا اَیی را تیره و تار آبَه، اِشتَن دُور چَرخ ژَنی و ایی نفری دومله گَردی که چَیی دَسی بِگِرِه و راه بَیی نیشون بِدَه.

¹² دومله فرماندار اِم ماجرا ویندِشه، ایمان وَردِشه، چوم اَ، تعلیمی کا که خِداوندی درباره بَداین مات و مبهوت آبَه بَه.

پولس و بَرنابا اَنطاکیۀ کا

¹³ پولس و چَیی هَمراه اِن دَریا راه نَه، پافوسی شهری کا شینَه پِرجۀ را که پامفیلیه منطقه کا بَه. امّا اوآ کا یوحنایی که معروف بِه مرقس بَه اَوون کا جِدا آبَه و آگَردِستَه اورشلیمی شهری را.

¹⁴ ولی اَوِن پِرجَه کا دَوییَردینَه و آرَستینَه اَنطاکیۀ پیسیدیَه منطقه. یَهودییون مقدّس شنبه روزی کا، شینَه عِبادتگاه و نِشتینَه.

¹⁵ تورات و پیغمبرون کتابون خَندهِ پَش، عِبادتگاه رَهبرِن، اَوون را پَیغوم ویسا آکَردِشونَه و واتِشونَه: «بِرااِن، اَگم گفی دارَه که مردمی تشویق بَکَردی، بوآجَه.»

¹⁶ پولس مَندَه و اِشتَن دَسی نَه اِشاره کَردِشه، واتِشه: «اِی یهودی مِردَکِن و شِمَه اِی خِدا تَرسِن، گوش بِدییَه!

¹⁷ اِم یهودی قومی خِدا، چَمَه اَجدادی اِنتخاب کَردِشه و چَمَه قومی، اَ موقع که مِصری سرزمینی کا غریب بینَه اَوون سَربِلَند کَردِشه و بَرکَ قُدرَتی نَه اَوون اَ سرزمینی کا بِرون وَردِشه،

¹⁸ و نِزدیک چِل سال چَوون رفتاری ویاوونی کا تاو وَردِشه.

¹⁹ اَ، بعد از اِمکه اَ هفت گِلَه قومی که کنعانی کا بینَه نابود کَردِشه، چَوون سَرزمینی اِرث آدوشَه اِشتَن قومی.

²⁰ اِم ماجرا گِرد تقریبا چهارصد و پینجا سال طول کَشِشه. چَیی پَش، تا سموئیل پیغمبری دُوران، خِدا اَوون، داوَرون آدوشَه.

²¹ دومله اَوِن ایلَه پاُتشایی پیستِشونَه و خِدا شائولی اَوون آدوشَه که قِیسی زوعَه بَه و بِنیامینی قبیله کا بَه و چِل سال حکومت کَردِشه.

²² شائولی بَرکِنار کَردِه پَش، داوودی اِنتخاب کَردِشه تا چَوون پاُتشا بِبو، و چَیی درباره شهادتی دوشَه، واتِشه: ”از داوودی که یَسا زوعَه یَه، ایلَه مِردی ویندِمَه که وِر چِمِن دیلی کا نِشتَه؛ اَ چِمِن پیستَه گِرد کامل اَنجام بَدای.“

²³ «خِدا طبق اِشتَن وَعده، هِم مِردی نَسلی کا، یهودی قومی را ایلَه نجات‌دَهنده یعنی عیسی، ویسا آکَردِشه.

²⁴ پیش از عیسی اومِه، یَحیی گِردِ یهودی مردمی را غسل تعمید توبَه اِعلام بَکَردی.

²⁵ وختی یَحیی اِشتَن خدمتی دورَه تَمون آکَری، واتِشه: ”شِمَه خَیال بَکَردیرون از کی ایمَه؟ اَز، اَ نیمَه؛ بَلکَم اَ چِمِن پَش بومَی و اَز حتی لاییق نیمَه چَیی کفشون بَندی آکَرِم.“

²⁶ «اِی بِرا اِن، اِی اِبراهیم پیغمبری خِردَنون نَسل، و اِی خِدا تَرسِنی که شِمَه دیلَه کا اینَه! اِم نجات بخشَه پَیغوم اَمَه را ویسا آبَه.

²⁷ چوم اورشلیمی مردم و چَوون پیله اِن عیسی آنِزونیشونَه، پیغمبرون گفون که هَر مقدّسَ شنبه کا اَوون را خَندَه بَبی نِفَهمِستشونَه. و اَوِن عیسی محکوم کَردِه نَه، پیغمبرون گفون اَنجام دوشونَه.

²⁸ با اِم که اَوِن هیچ تقصیری نِتلفتِشونَه چَیی کِشتِه را، پیلاتُسی کا پیستِشونَه اَیی بِکِشِه.

²⁹ و وختی گِردِ چییونی که درباره چَیی نیویشتَه بییَه بَه، بِه اَنجام آرِساووندِشونَه، اَیی صَلیبی سَری کا جیر وَردِشونَه، مقبره دیلَه کا نوشونَه.

³⁰ ولی خِدا، عیسی مَردَه اون دیلَه کا زِندَه آکَردِشه.

³¹ وِرَه روزونی عیسی اِشتَن، کسونی را که اَیی نَه جَلیلی کا اومَه بینَه اورشلیمی طرف، ظاهر آکَری و حِسَه نی اَوِن چَمَه قومی را چَیی شاهِدِن اِستینَه.

³² «حِسَه اَمَه اِم خوشَه خَوَری بَدایمون شِمَه که خِدا اَ چیی که چَمَه اَجدادی وعده دوعَش بَه،

³³ عیسی زِندَه آکَردِه نَه، اَمَه را که چَوون خِردَنیمونَه، وفا کَردِشه. هَتَه که دوّمین مَزموری کا نیویشتَه بییَه که: «”تِه چمِن زوعَه ایش؛ اوری، اَز ته مولود کَردَمه.“

³⁴ «و خِدا مَردَه اون دیلَه کا اَیی زِندَه آکَردِشه تا هرگز پوسدَه آمَبو، هَتَه که خِدا واتَشه: «”از مقدّس و مطمئن بَرَکتونی که داوود پاُتشا را وعده دوعَه بییَه، بَبَخشِستیم بَه شِمَه.“

³⁵ و هِنتَه نی ایلَه دییَر مَزموری کا نیویشته بییَه که: تِه نییَرزی که اَ کسی که اِشتِه مقدّسَه پوسدَه آبو.“

³⁶ «داوود پاُتشا بعد از اِم که خِدا اِراده نَه اِشتَن دورَه مردمی خدمَت کَردِشه، مَردَه و اِشتَن اَجدادی مُلحق بَه و پوسدَه آبَه.

³⁷ ولی اَ کسی که خِدا اَیی زِندَه آکَردِشه، پوسدَه آنِبَه.

³⁸ «بَس، اِی بِرااِن، بِزونَه که اِم عیسی واسطه نَه، گناه اون بَخشِسته شِمَه را اِعلام بَبی.

³⁹ هَر چیی دیلَه کا که نِشاستِرونَه موسی شریعتی واسطه نَه صالِح حساب بِبَه، حِسَه هَر کسی که بِه عیسی ایمان بواَرِه، چَیی واسطه نَه صالِح حساب بَبی.

⁴⁰ بَس ویرا بِبییَه پَیغمبرون اِم نیویشتۀ شِمَه سَر ما که بَواتین:

⁴¹ «”دَیِسه، اِی مسخره کَرارون، تعجب بِکَرَه و نابود بِبییَه، چوم شِمَه دورانی کا، کارا کاری بَکَردیم، که هَر چی اَیی شِمَه را تعریف بِکَرِن هَرگز باوَر نِکَرَه.“

⁴² وختی پولس و بَرنابا عِبادتگاه نَه بِرون بَشین، مردم اَوون کا پیستِشونَه که هفته ی دییَر نی مقدّس شنبه روزی کا، درباره اِم چیون اَوون نَه گَف بِژَنِن.

⁴³ بعد از اِمکه جماعتْ عِبادتگاه نَه شینَه، وِر کَسِن یَهودیون کا و خِداپَرست مردم که یهودی بَه بینَه، پولس و بَرنابا دومله راه دَلکینَه. پولس و برنابا اِم گروه نَه گَف ژَندِشونَه و اَوون تشویق کَردِشونَه که خِدا فیضی کا اِدامه بِدَن.

⁴⁴ هفته دییَر مقدّس شنبه روزی کا، تقریبا شهری مردم گِرد جمع آبینَه تا خِداوندی کلامی دَرَسِن.

⁴⁵ ولی وختی یَهودییِن جماعتی ویندِشونَه، حسودی کا پُور آبینَه و بی حرمتی نَه پولسی گفون نَه مخالفت کَردِشونَه.

⁴⁶ پولس و بَرنابا جرئتی نَه واتِشونَه: «لازِم بَه خِداوندی کلام گِردی پیش شِمَه را واتَه بِبی. امّا چوم اَیی رَد آکَردِرونَه و اِشتَن اَبَدی یَه زندگی لایق نِزونِستِرونَه، بَس حِسَه اَمَه بَشیمون غِیریهودیون طرفی را.

⁴⁷ چوم خِداوند بَمون اِنتَه دستور دوعَشَه که: «”از، تِه غِیریهودیون را نور وَج آکَردَمه، تا نجاتی خَوَری زمینی چهار گوشه را آرِساوونی.“

⁴⁸ وختی غِیریهودیِن اِمی دَرَسِشونَه، شاد آبینَه و خِداوندی کلامی حُرمت کَردِشونَه؛ و کسونی که اَبَدی یَه زندگی را مُقَدر بَه بینَه، ایمان وَردِشونَه.

⁴⁹ اِنتَه خِداوندی کلام گِردِ اَ ناحیه کا پخش آبَه.

⁵⁰ امّا یَهودییِن، متعصب و سَرشِناس ژِنکون و شهری مِردکونی که رهبر بینَه، جوکو ژَندِشونَه. اَوِن نی پولس و بَرنابا اَذیت آزار کَردِشونَه و اَ ناحیه کا بَرکَردِشونَه.

⁵¹ پولس و بَرنابا نی اَ شهری خاکی اِشتَن پا اون کا چَوون ضِد تَکان دوشونَه و شینَه قونیَه شهری را.

⁵² شاگِردِن شادی کا و روح القدسی کا پُور بینَه.