رَسولون اَعمال 12 - کتاب مقدس به زبان تالشی شمالییعقوبی کِشتِه 1 اَ موقع، هیرودیس پاُتشا دَمندَه چَن نفری اَذیت آزار کَردِه که کلیسا اَعضا بینَه. 2 هیرودیسی دَستوری نَه، یعقوبی که یوحنا بِرا بَه شَمشیری نَه کِشتِشونَه. 3 و وختی ویندِشه اِم کار یَهودیون خوشحال بَکَردی، پطرسی نی دستگیر کَردِشه. اِم ماجرا یهودیون فَطیرَه عیدی موقع اِتِفاق دَلَکَه. 4 هیرودیس، پطرسی دستیگر کَردِه پَش، اَیی دَرَفَندِشه زندانی کا و چار گروه چار نَفَری چَیی نِگهبانی را نوشه. و پیستِش بَه که پِسَخ عیدی پَش گِردِ مردمی پیشی کا پطرسی محاکمه بِکَرِه. 5 بَس پطرسی زندانی کا غَم هَردِشونَه، امّا کلیسا پِطرسی را یِکسَره خِدا وَری کا دعا بَکَردی. 6 ایی شَو، پیش از اَ روزی که هیرودیس پیستِشَه پطرسی محاکمه بِکَرِه، پطرس دِ گِله زنجیری نَه دَوَستَه بَه و دِ گِله سربازی میانه کا خِت بَه، و نگهبونِن نی زندانی بَری پیشی کا کیشیک بَداین. 7 ایی دفعه خِداوندی ایلَه مَلائیکَه ظاهر آبَه و ایلَه نوری زندانی دیلَه کا دَتاوِسته. مَلائیکه پطرسی تَکی کا ژَندِشَه و اَیی پِرِزاووندِشَه، واتِشه: «اَلبَحَل پِرِز!» هَ لَحظه زِنجیرِن چَیی دَسون کا آبینَه و بَلَکینَه جیر. 8 مَلائیکه پطرسی نَه واتِشه: «اِشتِه کَمری دَوَس و اِشتِه کفشی دَکه.» پطرس نی هَتَه کَردِشه. دومله مَلائیکه بَیی نَه واتِشه: «اِشتِه اَبا اِشتِه دوری کا دَپیچ و چِمِن دومله بِری.» 9 پطرس چَیی دومله زندانی کا شَه بِرون. پطرس باوَر نِکَری که اَ چیی که مَلائیکه اَنجام بَدای، واقعی یَه، بَلکَم خَیال بَکَردی رؤیا بَویندی. 10 اَوِن اوّلین و دوّمین نگهبانون کا دَوییَردینَه و آرَستینَه آهنی یَه دروازَه که شهری رو بَه رو کا آبی. دروازَه اِشتَرا چَوون پیشی کا آبَه. اَوِن شینَه بِرون و هَتَه که راه بَشین ایی دفعه مَلائیکه غِیب آبَه. 11 دومله پطرس سَرحساب بَه و واتِشه: «حِسَه دِ مُطمئِنیمَه که خِداوند اِشتَن ملائیکه ویسا آکَردَشَه و هیرودیسی چنگی کا و اَ، اَذیت آزاری کا که یهودی قوم توقع دارین چِمِن سَر بای، مِن نِجات دوعَشَه.» 12 پطرس وختی اِمی فهمِستِشه، شَه مریمی کَ که یوحنای معروف بِه مَرقسی نَنه بَه. اوآ کا وِر کَسِن جَمع آبَه بینَه و دعا بَکَردین. 13 وختی پطرس کَ بَری کوفِستِشه، ایلَه خاتَکی که چَیی نوم رُودا، بَه اومَه تا بَری آکَرِه. 14 وختی اَ خاتَک پطرسی سَسی آزونِستِشه، شادی کا، عَوَضِ اِم که بَری آکَرِه، اَلبَحَل شَه کَ دیلَه و واتِشه: «پطرس بَری پِشتی کا مَندَه!» 15 اَوِن خاتکی نَه واتِشونَه: «تور آبَییش؟» امّا وختی خاتکی اِصراری ویندِشونَه، واتِشونَه: «لابُد چَیی ملائیکه یَه.» 16 اِم موقع کا، پطرس هَتَه هِی بَر ژَنی. آخِرسَر، وختی بَری آکَردِشونَه و پطرسی ویندِشونَه مات و مبهوت بینَه. 17 پطرس اِشتَن دَسی اِشارۀ نَه، اَوون ساکت آکَردِشه و تعریف کَردِشه که چِنتَه خِداوند اَیی زندانی کا نِجات دوعَشَه، و واتِشه: «یعقوب و دییَر بِرااون نی اِم ماجرا کا خَوَر دار بِکَرَه.» دومله اوآ نَه شَه دییَر جِگایی را. 18 وختی صِب آبَه، سَربازون دیلَه کا غوغا بَه، چوم نیمَزنین پطرسی سَر چِه اومَه. 19 هیرودیس دَستور دوشَه گِردِ جِگا کا پطرسی دومله بِگرِدن؛ وختی اَیی پیدا نِکَردِشونَه سربازون بازجویی کَردِشه و چَوون کِشتِه حُکمی آدوشَه. دومله پطرس یهودیه ولایتی نَه شَه قیصریه شهری را و ایی مدّت اوآ کا مَندَه. هیرودیسی مرگ 20 هیرودیس، صور و صیدونی مردمی را غِیض گِتَش بَه. اِمی واسی اَ دِ گِله شهری مردم یَندی نَه شینَه چَیی وَر و اِجازه پیستشونَه تا هیرودیسی بِوینِن. اَوِن بِلاستوسی که پاُتشا خدمتکار بَه راضی آکَردِشونَه تا پاُتشا نَه آشتی بِکَرِن، چوم که چَوون غذا و مایحتاج هیرودیسی مملیکتی کا تهیه بَبی. 21 اَ روزی کا که قَرار نوعَشون بَه، هیرودیس اِشتَن پاُتشایی اَبا دَکَردِشه، تَختی سَری کا نِشته و جَماعتی را سخنرانی کَردِشه. 22 مردم خِلِع کَردِشونَه: «اِم ایلَه خِدا اون سَسَه، نِه آدَمی سَس!» 23 دَرجا، خِداوندی ایلَه مَلائیکه هیرودیسی ژَندِشَه، اِمی واسی که خِدا جلال دوعَش نِبَه. اَ موقع بولیزگه اِن چَیی بَدنی هَردِشونَه و اَ مَردَه. 24 امّا خِدا کلام وِرتَر و وِرتَر پیش بَشی و پخش آبی. 25 بَرنابا و شائول اِشتَن ماموریتی تمون آکَردِشونَه، اورشلیمی نَه آگَردِستینَه و یوحنایی که معروف بِه مَرقُس بَه، نی اِشتَن همراه وَردِشونَه. |
@ 2024 Korpu Company