رَسولون اَعمال 11 - کتاب مقدس به زبان تالشی شمالی

پطرس کلیسا را گزارش بَدای

¹ رسولِن و بِرا اِن گِردِ یهودیه ولایتی کا دَرَسِشونَه که غیریهودییِن نی خِدا کلامی قبول کَردِشونَه.

² بَس وختی پطرس آگَردِستَه اورشلیمی شهری را، اَ گروهی که خَتنه بییِه دَبی قبول دارین پطرسی کا ایراد گِتِشونَه و واتِشونَه:

³ «تِه شیرَه کسونی کَ که خَتنه بَه نینَه و اَوون نَه هَمسِفره بیشه.»

⁴ پطرس گِردِ ماجرا اوّلی نَه تا آخِر اَوون را تعریف کَردِشه و واتِشه:

⁵ «اَز یافا شهری کا، کارا دعا بَکَردیم که خَلسَه دیلَه کا ایلَه رؤیایی ویندِمه ایی چیی ایلَه یالَه سِفره‌ای شیوار که چهار‌گوشه کا آویزون بَه، آسِمونی نَه اومَه جیر و آرَستَه بَه مِن.

⁶ وختی چاک اَیی دَیِشتیمَه، اَهلی یَه حَیوونون و وحشی یَه حَیوون و خَزنده اون و پَرَنده اون، اَ سِفره سَری کا ویندِمه.

⁷ دومله ایلَه سَسی چِمِن گوش آرَستَه که بَواتی: ”پطرس، پِرِز، سَرآبِر و بَه.“

⁸ «ولی از جَواو دومَه: ”اَصلاً، خِداوندا، چوم از هَرگز حرومَه چیی یا نِجسَه چیی لِو ژَنده نیمَه.“

⁹ «دوّمین کَرَه آسِمونی نَه سَسی اومَه که ”اَ چیی که خِدا پاک وَج آکَردَشَه، تِه نِجس مَزون.“

¹⁰ و اِم اِتِفاق سِه کَرَه تِکرار بَه؛ دومله گِردِ اَ چیی اِن بَردَه بینَه آسِمونی را کَفا.

¹¹ «هَ موقع، سِه نفر که قیصریه شهری کا ویسا آبَه بینَه چِمِن وَر، آرَستینَه اَ کَ ایی که از اوآ کا بیمَه.

¹² خِدا روح مِنه واتِشه که چَوون همراه بِشوم و فرقی مَنَم. اِم شیش گِله بِرا نی مِنه اومینَه، و اَمَه شیمونَه اَ مِردی کَ.

¹³ اَ، اَمَه را تعریف کَردِشه که چِنتَه اِشتَن کَ کا ایلَه ملائیکه ایی ویندَشه که بَیی نَه واتَشه: ”چَن نفری ویسا آکَه یافا شهری را تا شَمعونِ معروف بِه پطرُسی بواَرِن اییا.

¹⁴ اَ، بَه تِرا ایلَه پَیغومی بواَردی که چَیی واسطه نَه تِه و گِردِ اِشتِه خانواده نِجات پیدا بَکَردیرون.“

¹⁵ «وختی دَمَندیمَه گف ژَندِه، روح القدس چَوون سَری کا قرار گِتِشه، دُرست هَتَه که اوّل چَمَه سَری کا قرار گِتِشه.

¹⁶ اَ موقع خِداوَندی گفی ویر وَردِمه که واتَش بَه: ”یحیی آوی نَه تعمید بَدای ولی شِمه روح القدسی نَه تعمید بَگتیرون.“

¹⁷ بَس اَگم خِدا اَوون نی هَ هدیه ای آدوعَشه که بَمون اَ موقعی آدوشَه که اَمَه عیسایِ مسیحِ خِداوندی ایمان وَردِمونَه، اَز کی بِبوم که بِشام خِدا کاری پیشی بِگِرِم؟»

¹⁸ وختی اَوِن اِم گَفون دَرَسِشونَه، ساکت آبینَه و خِدا ستایش کَردِشونَه، واتِشونَه: «بَس خِدا غیریهودیون نی فرصت بَدای تا اَوِن نی اِشتَن گناه اون کا توبه بِکَرِن و اَبَدی یَه زندگی بِه دَس بواَرِن!»

اَنطاکیه کلیسا

¹⁹ اَ ایماندارونی که اِستیفانی اَذیت آزار کَردِه پَش وِلا آبَه بینَه، تا فینیقیه و قِپرس و اَنطاکیه سَفر کَردِشونَه. اَوِن خِدا کلامی فقط یهودیون را اِعلام بَکَردین و وَس.

²⁰ امّا چَوون دیلَه کا چَند نفر قِپرس و قیرَوانی اَهالی کا بینَه. اَوِن وختی آرَستینَه اَنطاکیه، یونانیون نَه نی گَف ژَندِشونَه و عیسایِ خِداوندی خوشَ خَوَری اَوون نی آدوشونَه.

²¹ خِداوندی دَس نی اَوون نَه بَه و وِر کَسِن نی ایمان وَردِشونَه و خِداوندی مُلحق بینَه.

²² اِم خَوَر آرَستَه اورشلیمی کلیسا، بَرنابا ویسا آکَردِشونَه اَنطاکیه.

²³ وختی بَرنابا آرَستَه اوآ و خِدا فیضی ویندِشه، شاد آبَه و گِردی تشویق کَردِشه تا تَمونِ جان و دیلی نَه خِداوندی وفادار بِبون،

²⁴ چوم که بَرنابا چاکَه مِردی بَه و روح القدس و ایمانی کا پُور بَه. اِمی واسی وِرَه یالَ جماعتی بِه خِداوند ایمان وَردِشونَه.

²⁵ بَس بَرنابا شَه تارسوسی شهری را تا شائولی بِتلفِه.

²⁶ و وختی اَیی تِلفتِشه، اَیی وَردِشه اَنطاکیه. اَوِن اوآ کا ایی سال تمون، کلیسا آدَمون نَه جَمع آبین و ایلَه وِرَه یالَه جماعتی تعلیم بَداین. اَنطاکیه کا بَه که اوّلین کَرَه عیسی شاگِردون نَه ’مسیحی‘ واتِشونَه.

²⁷ اَ روزون کا چَن گِله پیغمبر اورشلیمی نَه اومینَه اَنطاکیه را.

²⁸ ایلَه اَوون کا که چَیی نوم آگابوس بَه، پِرِشته و خِدا روح الهامی نَه پیشگویی کَردِشه که گِردِ دنیا کا بَرکَ قحطی بومَی. اِم قحطی، کْلودیوسِ اِمپراطوری حکومتی دوره کا اِتِفاق دَلَکِه.

²⁹ بَس شاگِردن تصمیم گِتِشونَه که هَر کمیله هَر چَدَه که بَشاین، بِرا اونی را که یهودیه ولایتی کا بینَه، کمک ویسا آکِرِن.

³⁰ بَس اِنتَه کَردِشونَه و اَ هدیه اونی که جمع آکَردَشون بَه آدوشونَه بَرنابا و شائولی، تا آرِساوونِن مشایخی دَس.