رَسولون اَعمال 10 - کتاب مقدس به زبان تالشی شمالیپطرُس و کُرنِلیوس 1 قیصریَه شهری کا ایلَه رومی یَه اَفسری زندگی بَکَردی، که چَیی نوم کُرنِلیوس بَه. کُرنِلیوس رومی گُردانی فرمانده بَه که اَ گُردان، بِه ’ایتالیایی یَه گُردان‘ معروف بَه. 2 کُرنِلیوس ایلَه دیندارَه مِردی بَه، اَ، و چَیی خانواده گِرد خِداتَرس بینَه. کُرنِلیوس دَس و دیل بازی نَه فَقیر فُقرا کمک بَکَردی و هَمیشه خِدا درگا کا دعا بَکَردی. 3 ایی روز دور و بَر ساعت سِه بعد از ناهار، رویا کا واضِح ویندِشه که خِدا ایلَه ملائیکَه اومَه چَیی وَر و واتِشه: «کُرنِلیوس!» 4 کُرنِلیوس تَرسی نَه بَیی دَیشتَه و واتِشه: «چَه، آقا!» مَلائیکَه واتِشه: «اِشتِه دعا و صدقه اِن ایلَه یادگاری یَه هدیه ای شیوار آرَستَه اینه خِدا حضور. 5 حِسَه چَن نفری ویسا آکَه یافا شهری را تا شَمعونِ معروف بِه پطرُسی بواَرِن اییا. 6 اَ ایلَه دَبّاغی وَری کا بَمَندیَه که چَیی نوم شَمعونَه و دَریا کَناری کا کَ هِستِشه.» 7 وختی اَ ملائیکه ای که اَیی نَه گَف ژَنی چَیی وَری نَه شَه، کُرنِلیوس دِ نفر اِشتَن خادِمون کا و ایلَه اِشتَن وفادارَه سَربازون کا، دَخوندِشه اِشتَن وَر. 8 کُرنِلیوس گِردِ ماجرا اَوون را واتِشه و اَوون ویسا آکَردِشه یافا را. 9 صَبایی نَه روز، ناهارَه موقع، وختی راه کا بینَه و شهری نِزدیک آبین، پطرس پِشَه کَ بومی سَر تا دعا بِکَرِه. 10 پطرس اوآ کا وِشیش بَه و پیستِشَه چیی بَرِه. هَتَه که غذا حاضِر آکَرین، شَه حالت خَلسَه دیلَه. 11 هَ حالی کا ویندِشه که آسِمونِن آبینَه و ایی چیی ایلَه یالَه سفره‌ای شیوار که چهار گوشه نَه آویزونَه، بومَی جیر زمینی طرفی را. 12 اَ سِفرَه همه جورَه حَیوونون و خَزنده اون و پَرَنده اون نَه پور بَه. 13 اَ موقع سَسی چَیی گوش آرَستَه که بَواتی: «اِی پطرس، پِرِز، سَرآبِر و بَه!» 14 پطرس واتِشه: «اَصلاً، خِداوندا، چوم اَز هرگز حَرومَ چیی یا نِجِسَ چیی لِو ژَندَه نیمَه.» 15 دوّمین کَرَه هَ سَس اومَه که بَواتی: «اَ چیی که خِدا پاک وَج آکَردَشَه، تِه اَیی نِجِس مَزون!» 16 اِم رویا سِه کَرَه تکرار بَه و دومله سِفره اَلبَحَل بَردَه بَه آسِمونی را کَفا. 17 هَتَه که پطرس تعجبی نَه اَ رؤیا معنی را فیکر بَکَردی، کَسونی که کُرنِلیوس اَوون ویسا آکَردَش بَه، شمعونی کَ تِلَفتِشونَه و آرَستینَه چَیی کَ بَری وَر. 18 اَوِن بِلندَه سَسی نَه دَفَرسین: «اَ شمعونی که معروف بِه پطرسَه، اییاکا بَمَندیَه؟» 19 پطرس حَلا رؤیا درباره فیکر بَکَردی که خِدا روح بَیی نَه واتِشه: «دَیِس، سِه نفر اِشتِه دومله گردِن. 20 پِرِز و بِش جیر، شَک مَکَه اَوون نَه بِش، چوم اَز اَوون ویسا آکَردَمه.» 21 پطرس شَه جیر و اَوون نَه واتِشه: «اَز هَ کسی ایمَه که چَیی دومله گَردَه. شِمَه چِه چی واسی اومَیرونَه؟» 22 اَوِن واتِشونَه: «کُرنِلیوس، رومی یَه اَفسر، اَمَه ویسا آکَردَشَه. اَ مِردی دُرستکار و خِدا تَرسَه و یَهودییِن نی گِرد چَیی چاکی بَواتین. اَ ایلَه مقدّس ملائیکه ای کا دَستور گِتَشه که اِشتِه دومله ویسا آکَرِه و تِه دعوت بِکَرِه اِشتَن کَ، و اِشتِه گفون دَرَسِه.» 23 بَس پطرس اَوون بَردِشه کَ دیلَه تا چَیی میهمون بِبون. صَبایی نَه روز پطرس پِرِشته و چَوون هَمراه شَه، چَن گِله بِرا اِن نی که یافا شهری اَهالی بینَه اَیی نَه شینَه. 24 صَبایی روز آرَستینَه قیصریَه شهری را. کُرنِلیوس اِشتَن نِزدیکَه خویشون و رَفِقون نی جَمع آکَردَش بَه و چَوون چِم بِه راه بَه که بان. 25 وختی که پطرس اومَه کَ دیلَه، کُرنِلیوس شَه چَیی پیشواز و چَیی پا دَلکَه، اَیی پَرستش کَردِشه. 26 امّا پطرس اَیی زمینی کا بِلند آکَردِشه و واتِشه: «پِرِز؛ اَز نی ایلَه اِنسانیمَه.» 27 دومله هَتَه که اَیی نَه گف ژَنی شَه کَ دیلَه و ویندِشه اوآ کا بَرکَ جماعتی جمع آبَیینَه. 28 پطرس اَوون نَه واتِشه: «شِمَه اِشتَن بَزنیرون که یَهودیون را جایِز نییَه که دییَر قومی نَه مُعاشرت بِکَرِن یا بِشون چَوون کَ. امّا خِدا بَه مِن نیشون دوشَه که هیچکسی نِجِس یا ناپاک مَزونِم. 29 بَس وختی چِمِن دومله ویسا آکَردِرونَه، بی چون و چیرا اومیمَه. حِسَه بوآجَه، چِه چی واسی چِمِن دومله ویسا آکَردَرونَه؟» 30 کُرنِلیوس جَواو دوشَه: «چار روز پیش هِم موقع کا، دور و بَر ساعت سِه بعد از ناهار، چِمِن کَ کا دعا بَکَردیم که ایی دفعه ایلَه مِردی که ایلَه نورانی یَه خَلایی دَکَردَش بَه چِمِن پیشی کا ظاهر آبَه 31 و واتِشه: ”کُرنِلیوس، اِشتِه دعا قبول بییَه و اِشتِه صدقه اِن خِدا حضوری کا ویر وَردَه بَه اینَه. 32 حِسَه چَن نفر ویسا آکَه یافا شهری را تا شَمعونِ معروف بِه پطرسی بواَرِن اییا. اَ، شمعونِ دَبّاغی وَری کا بَمَندیَه که چَیی کَ دریا کناری کا یَه.“ 33 بَس اَلبَحَل اِشتِه دومله وَیسا آکَردِمَه و تِه نی لطف کَردِرِه و اومیشه. حِسَه گِردِ اَمَه خِدا پیشی کا حاضِریمونَه تا هَر چِه خِداوند بَه تِن دستور دوعَشَه، دَرَسَم.» 34 دومله پطرس دَمَندَه اِنتَه گَف ژَندِشَه: «حِسَه فهمِستِمَه که راس راسی خِدا مردمی دیلَه کا هیچ فرقی نِنَه؛ 35 بَلکَم هَر قومی کا، هَر کسی که خِدا کا بِتَرسه و اَ چیی که دُرستَه عَمَل بِکَرِه، خِدا اَیی قبول بَکَردی. 36 خِدا طبق اِشتَن کلام که یهودی قومی را ویسا آکَردِشه، صُلح و سَلامتی و شادَه خَوَری عیسایِ مسیح واسطه نَه که گِردی خِداوندَه، اِعلام کَردِشه. 37 شِمَه اِشتَن بَزنیرون که اِم کار، اَ تعمیدی پَش که یحیی اَیی اِعلام کَردِشه چِنتَه جلیلی ولایتی دیلَه نَه شروع بَه و گِردِ یهودیه ولایتی دیلَه کا پخش آبَه. 38 و خِدا، چِنتَه روح القدس و قدرتی نَه عیسایِ ناصری مَسح کَردِشه، جوری که گِردِ جِگا کا گَردی و چاکَ کارون بَکَردی و گِردِ کسونی که اِبلیسی ظلم و ستمی جیری کا بینَه، شفا بَدای، اِمی واسی که خِدا اَیی نَه بَه. 39 «و اَمَه گِردِ اَ کارونی شاهدیمونَه که اَ، یهودی سرزمین و اورشلیمی شهری کا اَنجام دوشَه. اَوِن اَیی صلیبی سَری کا کِشتِشونَه. 40 امّا خِدا اَیی سوّمین روزی کا زِندَه آکَردِشه و ظاهر آکَردِشه، 41 ولی نِه گِردِ مردمی را، بَلکَم فقط اَمَه را که خِدا طرفی نَه اِنتخاب بیمونَه که چَیی شاهِدون بِبییَم. اَمَه ایی که بعد از اِم که اَ مردَه اون دیلَه کا زِندَه آبَه، اَیی نَه هَردِمونَه و هِنتِمونَه. 42 اَ بَمون دستور دوشَه تا اِم حقیقتی قومی را اِعلام بِکَرَم و شهادتی بِدییَم که خِدا اَیی مُعَین کَردَشه تا زِنده اون و مَردَه اون داوَر بِبو. 43 گِردِ پیغمبرِن عیسی درباره شهادتی بَداین که هَر کسی بَیی ایمان بواَره، چَیی نومی واسطه نَه چَیی گناه اِن بَخشِسته بَبین.» 44 پطرس حَلا کارا گَف ژَنی که روح القدس گِردِ کسونی سَر قرار گِتِشه که اَ پَیغومی دَرَسین. 45 اَ ایماندارونی که خَتنه بییِه دَبی دارین یعنی کسونی که اِصالَتَن یهودی بینَه و پطرسی همراه اومَه بینَه، وختی ویندِشونَه که روح القدسی هدیه حتی غیریهودیون را نی اومَه، مات و مبهوت مَندینه. 46 چوم دَرَسِشونَه که اَوِن دییَر زوونون نَه نی گَف ژَنِن و خِدا جلال بَداین. اَ موقع پطرس واتِشه: 47 «حِسَه که اِمِن درست چَمَه شیوار روح القدسی ویگِتَشونَه، کی بَشای چَوون پیشی بِگِرِه که آوی دیلَه کا غسل تعمید مَگِرِن؟» 48 بَس دَستور دوشَه که اَوون عیسایِ مسیح نومی کا تعمید بِدَن. اَ موقع اَوِن، پطرسی کا پیستِشونَه چَن روز اَوون نَه بومونِه. |
@ 2024 Korpu Company