رَسولون اَعمال 1 - کتاب مقدس به زبان تالشی شمالیعیسی صعود کَردِه بِه آسِمون 1 اِی تِئوفیلوس، اَز چِمِن اوّلین کیتابی، گِردِ چییونی درباره نیویشتِمَه که عیسی دَمَندَه چَوون اَنجام دوعِه و تعلیم دوعِه 2 تا اَ روزی که روح القدسی واسطه نَه، اِشتَن اِنتخاب کَردَه رسولون، دستورونی دوشَه و دومله آسِمونی را کَفا بَردَه بَه. 3 عیسی وِر رنج کَشِه پَش، اِشتَن، اَوون را ظاهر آکَردِشه و وِرَه کارون نَه ثابِت کَردِشه که زِنده آبَه. عیسی چِل روز اَوون را ظاهر آبی و اَوون نَه خِدا پاُتشایی درباره گَف ژَنی. 4 وختی عیسی رسولون همراه بَه اَوون دستور دوشَه که: «اورشلیمی شهری کا مَشَه، بَلکَم اَ وعده ای منتظر بِبییَه که آسِمونی یَه دَده وعده دوعَش بَه و واتِشه: هَتَه که بَه مِن کا دَرَسَرونَه، 5 یحیایِ تعمید دَهنده آوی نَه غسل تعمید بَدای، امّا چَن روز دییَر، شِمَه روح القدسی نَه تعمید بَگتیرون.» 6 وختی رَسولِن یَندی نَه جمع آبَه بینَه، عیسی کا دَفَرسِشونَه: «خِداوندا، الان هَ موقعی یَه که پیستِرَه پاُتشایی، آگاردِنی بِه قوم اِسرائیل؟» 7 عیسی جَواو دوشه: «لازم نییَه زمانون و فصلونی بِزونَه که آسِمونی یَه دَده اِشتَن قدرتی نَه مُعین کَردَشه؛ 8 امّا وختی روح القدس شِمَه سَر نازِل بِبو، قدرت بَگتیرون و اورشلیمی شهری کا، گِردِ یهودیه ولایتی کا، سامِره منطقه و دنیا دورتَرین جِگا اون کا، چِمِن شاهِدون بَبیرون.» 9 عیسی اِم گَفون ژَندِه پَش، هَتَه که رسولِن دَیِسین، آسِمونی را کفا بَردَه بَه و چَوون چِمی پیشی کا ایلَه خِری عیسی دُور آکَردِشه. 10 هَتَه که عیسی بَشی و شاگِردِن آسِمونی زول ژَندَشون بَه، ایی دفعه دِ گِلَه مِردی که ایسبی یَه اَبا دَکَردَشون بَه چَوون کناری کا مَندینَه 11 و واتِشونَه: «اِی جلیلی یَه مِردَکِن، چیرا اییا کا مَندیرونَه آسِمونی زول ژَندَرونَه؟ هِم عیسی که شِمَه دیلَه کا آسِمونی را کَفا بَردَه بَه، هَنی آگَردِه، هَتَه که ویندِرونَه شَه آسِمونی را.» یهودا عَوض، مَتّیاسی اِنتخاب کَردِشونَه 12 دومله رسولِن زیتونَ کوه کا آگَردِستینَه اورشلیمی شهری را. اَ کوه، ایلَه مقدّسَ شنبه روزی اَندازه قَدَر، یعنی حدوداً ایی کیلومتر اورشلیمی کا فاصله ش، اِستبَه. 13 وختی آرَستینَه اورشلیم، شینَه ایلَه بالاخونه ای را که چَوون اِقامتگاه بَه. کسونی که اوآکا بینَه اِمِن بینَه: پطرس و یوحنا، یعقوب و آندریاس، فیلیپُس و توما، بَرتولْما و مَتّی، یعقوب حَلْفای زوعَه و شمعون وطن پَرست و یهودا، یعقوبی زوعَه. 14 اَوِن گِرد، ژِنَکون همراه و مریم نی عیسی نَنه و عیسی برا اِن، یَکدیل اِشتَن وختی گِردی دعا کَردِه را بَناین. 15 ایلَه اَ روزون کا، پطرس بِرا اون دیلَه کا؛ که گِرد حدود صد و بیست نفر بینَه، مَندَه 16 و واتِشه: «اِی بِرا اِن، مقدّس نیویشته اون پیشگویی بَسی اِتِفاق دَلَکِه. اَ نیویشته اونی که روح القدس خَیلی مُدت پیش داوود پاُتشا زوونی نَه یهودا درباره پیشگویی کَردَشه. اَ کسی درباره که عیسی دستگیر کَرارون راهنما بَه. 17 چوم اَ ایلَه اَمَه کا حساب بَبی و اِم خدمتی کا سَهمیشی اِستبَه.» 18 یهودا اِشتَن شِرارتی مُزدی نَه ایی تیکه زمین خِریشه و اَ زمینی کا دیمی سَر بَلکَه تِرَکِسته و وسطی نَه دِ پَلَه بَه و چَیی اِشکَم روده اِن گِرد ویبینَه بِرون. 19 گِردِ کسونی که اورشلیمی کا بینَه، اِم اِتِفاقی کا خَوَر دار بینَه و اِشتَن زوونی نَه اَ مَله نومی پِنوشونَه ’حَقِلْ‌دَما‘، یعنی خونَ زَمین. 20 «مزامیری کتابی کا نیویشته بییَه: «”چَیی کَ خَراوَه بِبو و کسی اَیی کا زندگی مَکَرِه،“ و: «”چَیی مقام و منصبی ایی نفر دییَر ویِگِرِه.“ 21 بَس حِسَه بَسی ایی نفر اَ مِردَکون کا که گِردِ اَ موقعی که عیسایِ خِداوند چَمَه دیلَه کا دَوییَر آوییَر بَکَردی، همیشه چَمَه جمعی دیلَه کا بِبی. 22 یعنی یحیی تعمیدی موقع نَه تا اَ روزی که عیسی چَمَه وَری نَه بَردَه بَه آسِمونی را کفا، ایی نفر اَ مِردَکون کا، اَمَه نَه عیسی زِندَه آبییِه شاهد بِبو.» 23 اَوِن دِ نفر پیشنهاد دوشونَه: ایلَه یوسف که اَیی نَه بَرسابا بَواتین و اَیی بِه نوم یوستوس نی آزونین، و اَ ایلَه نی مَتّیاس. 24 دومله اَوِن اِنتَه دعا کَردِشونَه و واتِشونَه: «اِی خِداوند، تِه گِردِ آدَمون دیلی کا خَوَر داری. تِه اِشتَن اَمَه نیشون بِدَه که اِم دِ نفری کا کَمیله اِنتخاب کَردَرَه 25 تا اِم خدمتی و رسول بییِه قبول بِکَرِه، خدمتی که یهودا اَیی پَس ژَندِشَه و شَه جِگایی دیلَه که اوآ شِن بَه.» 26 دومله قُرعَه دَرَفَندِشونَه و مَتّیاسی نوم بِرون اومَه. اِنتَه مَتّیاس اَ یازده گِلَه رسولی مُلحَق بَه. |
@ 2024 Korpu Company