یوحنا سوّمین نامَه 1 - کتاب مقدس به زبان تالشی شمالی

¹ شیخی طرفی کا، عزیزَه گایوسی را که از اَئی نَه ’حقیقتی‘ کا خِشیمَه.

² اِی عزیز، چِمِن دعا اِمَه که گِردِ چیون کا چاک پیش بِشی و سلامت بِبی، و هِنته نی اِشتِه جان سلامتی کا بِبو.

³ چوم شاد آبیمَه اَ موقعی که بِرا اِن اومینَه، و اِشتِه وفاداری که حقیقتی کا زندگی بَکَردیش شهادتی دوشونَه.

⁴ هیچ چی مِن اِمی کا وِرتَر شاد آنِکَرِه که دَرَسِم چِمِن خِردَنِن ’حقیقتی‘کا زندگی بَکَردین.

⁵ اِی عزیز، تِه گِردِ اِشتِه کارون کا بِرا اون را، اِشتِه اَمانتداری نیشون بَدایش، مخصوصاً اِم که بَه تِرا بیگانه اینه.

⁶ اَوِن نی کلیسا پیشی کا اِشتِه محبتی شهادتی دوعَشونه؛ بَس چاکَ کاری بَکَردیش اَگم اَوون هَتَه که خِدا شَئنی کا اِستَه، سَفری را رایی بِکَردیش.

⁷ چوم که اَوِن اَ نومی واسی سَفر کَردَشونه و غیریهودیون کا هیچ کمکی ویگِتَشون نییَه.

⁸ بَس اَمَه بَسی اِنتَه رَه آدَمون کمک بِکَرَم تا بِشایَم اَوون نَه حَقیقَتی را همکار بِبییَم.

⁹ از کلیسا را ایی چیی نیویشتِمه، امّا دیوتْرِفیس که خِشَه اِشتَن اوّل بِزونه، چَمَه اِقتداری اِعتنا نِکَرِه.

¹⁰ بَس اَگم از اومیمَه، کارونی که اَ بَکَردی رسیدگی بَکَردیم، چوم که قصد غَرَضی نَه چَمَه ضِد گف بَژَی، و اِمی نَه نی راضی نییَه، بِرااون نی قبول کَردَه نیشَه؛ و بِرااونی که پیستِشونَه اَوون قبول بِکَرِن، چَوون پیشی نی گِتَشه و کلیسا کا بَرکَردَشه.

¹¹ اِی عزیز، بَدی اِشتِه سَرمشق مَکَه، بَلکَم چاکی کا سرمشق بِگِه؛ چوم کسی که چاکه کارون بَکَردی خِدا کا یَه، امّا کسی که بَدَه کارون بَکَردی خِدا ویندَه نیشَه.

¹² گِرد دیمیتریوسی درباره چاک شهادتی بَداین، حتی حقیقت اِشتَن. اَمَه نی اِنتَه شهادتی بَدایمون و بَزنیش که چَمَه شهادتی راستَه.

خاتیمه

¹³ وِرَه چیونی هِستِمَه که بَه تِه را بینیویسِم، امّا نِپیستِمَه مرکّب و قلمی نَه بِبو.

¹⁴ امید دارِم هِم زودییون تِه بِوینِم و یَندی نَه دیمادیس گف بِژَنم.

¹⁵ سلامت بِبی! رَفِقِن بَه تِرا سلام آرِساوونِن. تک تک رَفِقون را نومی نَه سلام آرِساوون.