دِوُّمین نامَه تیموتائوسیرا 4 - کتاب مقدس به زبان تالشی شمالی

خِدا کلامی اِعلام کَردِه

¹ از، خِدا و مسیحْ عیسی پیشی کا که زِنده اون و مَردَه اون داوری بَکَردی، و چَیی اومِه و پاُتشایی واسی، بَه تِن سفارش بَکَردیم که،

² خِدا کلامی اِعلام بِکَه و وخت و بی وخت آمادَه بِبی و وِرَه صَبر و کامِلَ تعلیمی نَه، اِصلاح و توبیخ و تَشویق بِکَه.

³ چوم زمانی بومَی که مردم دُرستَ تعلیمون تاو نِوَرِن، بَلکَم معلمونی اِشتَن دور جمع آکَرِن تا اَ چیی دَرَسِن که چَوون گوش خِشَه دَرَسِه و چَوون هَواهَوسون نه جور دَر بومَی؛

⁴ و اَوِن، حقیقتی گوش دوعِه کا دیم آگاردِنییَشونه، داستانون طرف گمراه بَبین.

⁵ امّا اِشتِه هَواس هَر چیی کا جَمع بِبو؛ عذابون تاو بوعَه، اِنجیلی اِعلام کَردِه کاری اَنجام بِدَه و اِشتِه خدمتی تَمام کمال بِه آخِر آرِساوون.

⁶ چوم که چِمِن خون، هِم حِسَه نی، ایلَه هدیه شرابی شیوار، کارا ویبو و چِمِن شییِه وخت اِم دنیا کا آرَستَه.

⁷ از چاکَه جنگی کا جَنگِستَه ایمَه، چِمِن مسابقه تمون آکَردَمه و چِمِن ایمانی حفظ کَردَمه.

⁸ حِسَه نَه بِه بعد، اَ صالِحی تاج، بَه مِرا آمادَه یَه، تاجی که خِداوند، اَ عادلَ داور، اَ روزی کا بَه مِن آدوشَه- نِه فقط بَه مِن، بَلکَم گِردِ کسونی که چَیی ظهوری مشتاق بینَه.

آخِرین سِفارشِن

⁹ تَقَّلا بِکَه که زودتَر بای چِمِن وَر.

¹⁰ چوم دیماس اِم دنیا خِش بییِه واسی مِن وِل آکَردَشَه و شَه تَسالونیکی شهری را. کریسکیس شَه غلاطیه منطقه را و تیتوس نی دَلماتیه منطقه را شَه.

¹¹ فقط لوقا چِمِن هَمراه یَه. مَرقُسی پِگه، اِشتَن نَه بوعَه، چوم که اَ چِمِن خدمتی را وِر بِه کار بومَی.

¹² تیخیکوسی ویسا آکَردِمه اَفِسُسی شهری را.

¹³ وختی کارا بومَیش، چِمِن اَبا که تْروآسی شهری کا کارپوسی وَری کا جا نومَه اِشتَن نَه بوعَه، و کیتابون و مخصوصن طومارون نی اِشتَن نَه بوعَه.

¹⁴ مِسگرَه اِسکندر، مِنَه وِر بَدی کَردِشه؛ خِداوند چَیی کارون جَزا بَیی بَدای.

¹⁵ تِه نی اَیی کا دوری بِکَه، چوم چَمَه پِیغومی نَه بَرک مخالف بَه.

¹⁶ چِمِن اوّلین دفاع کا، هیچکس چِمِن پِشت نِبَه، بَلکَم گِرد مِن ول آکَردِشونه. نَبادا اِم چَوون حساب نوعَه بِبو.

¹⁷ امّا خِداوند مِنَه بَه، و مِن قوّت دوشَه تا اَ پیغام، چِمِن واسطه نَه تَمام کمال اِعلام بِبو و گِردِ غیریهودییِن اَیی دَرَسِن. اِنتَه شیری گَ کا جیوَشتیمونَه.

¹⁸ خِداوند مِن هَر بَدَه کاری کا رَهایی بَدای و مِن سلامتی نَه بواَردی اِشتَن آسِمونی پاُتشایی دیلَه. جلال تا اَبَد و تا اَبَد اَیی را با. آمین!

آخِرین سلامِن

¹⁹ پْریسکیلا و آکیلا و اونیسیفوروسی خانواده سلام آرِساوون.

²⁰ اِراستوس، قُرِنتُسی شهری کا مَندَه، و اَز تْروفیموسی که مریض بَه، میلیتوسی شهری کا نومَه.

²¹ تَقَّلا بِکَه زوموستونی پیش بای اییا. یوبولوس، پودِنْس، لینوس، کِلودیا و گِردِ بِرا اِن بَه تِرا سلام دارِن.

²² خِداوند اِشتِه روح نَه بِبو. خِدا فیض شِمَه گِردی همراه بِبو.