دِوُّمین نامَه تیموتائوسیرا 2 - کتاب مقدس به زبان تالشی شمالی

مسیح چاکَه سرباز

¹ بَس تِه اِی چِمِن بَلَه، اَ فیضی نَه که مسیحْ عیسی کایَه قوی بِبَش،

² و اَ چیونی که وِرَه شاهِدون حضوری کا بَه مِن کا دَرَسِرَه، دَسپار وفادارَه آدَمون که بَشاین بقیه نی باموجِن.

³ هِنتَه مسیحْ عیسی، سربازی شیوار عذابون کا شَریک بِبَش.

⁴ هیچ سربازی، اِشتَن خدمتی موقع، اِشتَن، اِشتَن زِندگی کارون کا گیرفتار نِکَرِه، چوم پیستِشَه اَ کسی راضی آکَرِه که اَیی خدمتی سَری کا نوعَشَه.

⁵ ایلَه پهلَوونی تاج آنِدَن مَگم اِم که، طبق مسابقه قانونون عمل بِکَرِه.

⁶ اَ کشاورزی که بَرک کار بَکَردی بَسی اوّلین کسی بِبو که اِشتَن مَحصولی کا بَهره بَبَردی.

⁷ اَ چی که کارا بَواتیم فیکر بِکَه، چوم که خِداوند هَر چیی کا بَه تِه فهم آدَه.

⁸ عیسایِ مسیح ویر بوعَه که داوود پاُتشا نسلی کا بَه و مَردَه اون دیلَه کا زندَه آبَه، اِنجیلی که از اِعلام بَکَردیم اِمَه،

⁹ چِمی واسی یَه که ایلَه جِنایتکاری شیوار زنجیری کا ایمَه و کارا عذاب کَشِم، امّا خِدا کلام زنجیری کا نییَه.

¹⁰ اِمی واسی از گِردِ چییون، اِنتخاب بییَه اون واسی تاو بواَردیم، تا اَوِن نی اَ نجاتی که مسیحْ عیسی کایَه، اَبَدی یَه جلالی نَه بِه دَس بواَرِن.

¹¹ بَبی اِم گَفی اِعتماد کَردِه که: اَگَم اَیی نَه مَردیمونَه، اَیی نَه نی زِندگی بَکَردیمون.

¹² اَگَم تاو بواَرَم، اَیی نَه نی سلطنت بَکَردیمون. اَگَم اَیی هاشا بِکَرَم، اَ نی اَمَه هاشا بَکَردی.

¹³ اَگَم بی‌وفا بِبییَم، اَ، وفادار بَمَندی، چوم که نیمَشا اِشتَن هاشا بِکَرِه.

¹⁴ اِمی چَوون ویر بوعَه، و خِدا حضوری کا اَوون سفارش بِکَه که کلماتی سَر دعوامُرافه مَکَرِن، که فایده ای نیشَه، بَلکَم فقط باعث بَبی، راه کا بَرشون.

¹⁵ تَقَّلا بِکَه که خِدا وَری کا مقبول بِبی، ایلَه کاریگری شیوار که خجالت نِکَشِه و حقیقتی کلامی دُرست بِکار بَبَردی.

¹⁶ ولی دنیا مِفتَ گفون کا دوری بِکَه، چوم که مردمی وِرتَر و وِرتَر بَبردی بی دینی طرفی را.

¹⁷ و اِنتَه رَه آدَمون گَفِن، جُذامی شیوار پخش بَبین، هیمِنائوس و فیلیتوس اِم دَسته کااینه،

¹⁸ که حقیقتی کا آگَردَه اینَه و بَواتین: اَ روزی که مَردَه اِن زِندَه آبون، حِسَه یَه و اِنتَه بَعضییون ایمانی از بِین بَبَردین.

¹⁹ با اِم حال، اَ مُحکمَه پاکاری که خِدا نوعَشه، پابَرجایَه و اِمی نَه مُهر بییَه که: «خِداوند اِشتَن آدَمون آزونِه،» و «هَر‌ کسی خِداوندی نومی اِقرار بِکَرِه، بَسی نادُرستی کا دوری بِکَرِه.»

²⁰ حِسَه ایلَه یالَ کَ کا، فقط طِلا و نِقره قَبِن نییَه، بَلکَم چویَه قَب و گِلی نی اِستَه؛ بعضی اِن مهم کارون را استفادَه بَبین و بعضی اِن نی دَم دَسی را.

²¹ بَس اَگم ایی نفر اِشتَن اِم چییون کا پاک غم بَرِه، قَبی بَبی که مهم کارون را اِستفادَه بَبی، قَبی مقدّس و مفید کَ صاحابی را و هَر چاکَه کاری را آمادَه یَه.

²² بَس جَوونی هَواهَوسی کا دَوز، و کسونی نَه که پاکَه دیلی نَه خِداوندی دَخونِن، صالِحی، ایمان، محبت، صُلح و سلامتی دومله بِبَش.

²³ اَ بحثونی کا که نادونی و نَفهمی کایَه دوری بِکَه، چییرا که بَزنیش دعوامُرافه راه دَلکِه.

²⁴ خِداوندی نوکر نَبی دعوامُرافه بِکَرِه، بَلکَم بَسی گِردی نَه میهروون بِبو، بِشا تعلیم بِدَه و بَدی اون کا صبری نَه تاو بواَرِه.

²⁵ بَسی کسونی که مخالفی نَه، نرمی نَه اِصلاح بِکَرِه، شاید خِدا اَوون توبه عطا بِکَرِه، تا حقیقتی آزونِن،

²⁶ و سَر حِساب بِبون و اِبلیسی تَله کا جیوَزِن، چوم چَیی گیریفتار بَبین تا چَیی پیستَه اون اَنجام بِدَن.