دِوُّمین نامَه تیموتائوسیرا 1 - کتاب مقدس به زبان تالشی شمالی

¹ پولُسی طرفی کا، که خِداپیستَه نَه و طبق اَ وعده ی زِندگی که مسیحْ عیسی کایَه، مسیحْ عیسی رسول اِستَه،

² چِمِن عزیزَه زوعَه، تیموتائوسی را: فیض و رحمت و صُلح و سلامتی خِدای دَده طرفی کا و چَمَه خِداوند مسیحْ عیسی کا بَه تِرا با.

تشویق وفاداری را

³ هَتَه که شَواَنده روز یکسرَه چِمِن دعااون کا تِه ویر بواَردیم، خِدا شُکر بَکَردیم، اَ خِدایی که از نی چِمِن دَده اون شیوار پاکَه وجدانی نَه اَیی خِدمت بَکَردیم.

⁴ وختی اِشتِه اِسِرگون ویر بواَردیم، آرزو بَکَردیم تِه بِوینِم تا شادی کا پُور آبوم.

⁵ از اِشتِه خالِصَه ایمانی ویر بواَردیم، اَ ایمانی که اوّل اِشتِه دِدِه لوئیس و دومله اِشتِه نَنه یونیکی کا بَه، و حِسَه مُطمئِنیمَه بَه تِه کا نی اِستَه.

⁶ اِمی واسی، ته ویر بواَردیم که خِدا اَ عطیَه که چِمِن دَس گذاری واسی اومَه اِشتِه دیلَه، چَیی آتشی شعله وِر آکَری.

⁷ چوم که خِدا تَرسی روح بَمون آدوعَه نیشَه، بَلکَم قوّت و مُحبت و نَفسی پیشی گِتِه روح آدوعَشَه.

⁸ بَس، اِمی واسی که چَمَه خِداوندی را شهادتی بِدَی یا از که چَیی واسی زِندانی کا دَلَکیمَه، عار مَدا، بَلکم تِه نی خِدا قوّتی نَه اِنجیلی واسی عذاب کَشِه کا شریک بِبَش.

⁹ خِدایی که اَمَه نجات دوشَه و ایلَه مقدّسَ زندگی را دَخوندِشه. اِمی نِه چَمَه کارون واسی، بَلکم اِشتَنِش فیض و هدفی واسی، که مسیح عیسی کا دنیا صِفته نَه، آدوشَه اَمَه،

¹⁰ ولی حِسَه اِم فیض چَمَه نجات‌ دهندۀ، مسیحْ عیسی اومِه نَه آشکار آبَه. هَ مسیحْ عیسی که مرگی از بِین بَردِشه و اَبَدی یَه زندگی اِنجیلی واسطه نَه گِردی را آشکار آکَردِشه،

¹¹ که اَز اَیی را مُعین بیمَه تا اِم اِنجیلی رسول و معلّم بِبوم و موعظه بِکَرِم.

¹² اِمی واسی یَه که اِنتَه عذاب کَشِم، امّا عار نیمَه، چیرا که بَزنیم بِه کی ایمان وَردَمه و قانع بیمَه که اَ، بَشای اَ چیی که بَه مِن دَسپاردَشَه تا اَ روز محافظت بِکَرِه.

¹³ اَ ایمان و محبتی نَه که مسیحْ عیسی کایَه، و اَ چیی که بَه مِن کا دَرَسَرَه، ایلَه دُرستَه سرمشقی شیوار دِ دَسی دَچیک اَیی.

¹⁴ روح القدسی واسطه نَه که چَمَه دیلَه کا یَه، اَ چاکَه اَمانتی کا که بَه تِن دَسپارده بییَه، محافظت بِکَه.

¹⁵ بَزنیش که آسیا ایالتی مَردمِن، گِرد مِن وِل آکَردَشونه که چَوون دیلَه کا، فیگِلوس و هِرموگِنِس نی مَندینه.

¹⁶ خِداوند، اونیسیفوروسی خانواده رحمت بِکَرِه، چوم اَ چِندی کَرَه چِمِن جانی تازه آکَردِشه و چِمِن زندونی بییِه کا عارِش نِبَه.

¹⁷ بَلکَم وختی اومَه رومی شهری را، چِمِن دومله گَردِستَه تا آخِرسَر مِن تِلفتِشه.

¹⁸ خِداوند اَیی عطا بِکَرِه که اَ روزی کا، خِداوندی کا رحمت ویگِرِه- و تِه، گِردِ اَ خِدمتونی که اَفِسُسی شهری کا کَردِشَه، چاک بَزنیش.