دوّمین نامَه تَسالونیکی کلیسا را 3 - کتاب مقدس به زبان تالشی شمالیاَمَه را دعا بِکَرَه 1 آخِرسَر، اِی بِرااِن، اَمَه را دعا بِکَرَه تا خِداوندی کلام تُند پیش بِشو و چَیی اِحترامی غَم بَرَه، هَتَه که شِمَه دیلَه کا هِنتَه بَه، 2 و تا شَرورَه آدَمون و گناه کارون کا آزاد بِبییَم. چوم گِردی را ایمان نییَه. 3 امّا خِداوند وفادارَه. اَ شِمَه قوّت بَدای و اَ شَروری پیشی کا شِمَه کا محافظت بَکَردی. 4 اَمَه خِداوندی کا شِمَه اِطمینان هِستِمونَه که اَ چیی که شِمَه را حُکم بَکَردیمون بِه جا بواَردیرون و اَنجام بَدایرون. 5 خِداوند شِمَه دیلون خِدا محبت و مسیح پابَرجایی نَه هدایت بِکَرِه. هشدار تَنبلَ آدَمون را 6 اِی بِرااِن، چَمَه خِداوندْ عیسایِ مسیح نومی نَه شِمَه را حُکم بَکَردیمون که هَر بِرایی کا که تنبلی بَکَردی و مطابق تعلیمی که اَمَه کا گِتَرونه رفتار نِکَرِه، دوری بِکَرَه. 7 چوم شِمَه اِشتَن بَزنیرون که چِنتَه بَسی اَمَه کا سَرمَشق بِگِرَه، چوم اَ موقعی که اَمَه شِمَه نَه بیمونه، تنبل نِبیمونه، 8 و هیچکسی نونی مِفتَه نییَردِمونه، بَلکَم شَواَنده روز سختی و زحمتی نَه کار کَردِمونه تا شِمَه هیچ کَمیله سَر بار مَبییَم. 9 نِه اِمی واسی که اَمَه اِم حقّی نیمونَه، بَلکَم تا اِشتَن کا ایلَه نِمونه شِمَه را سَرمَشقی را بِنییَم. 10 چوم حتی وختی که شِمَه نَه بیمونه، اِمی شِمَه را حُکم کَردِمونه که: «هَر کسی که نِپیستِشه کار بِکَرِه، نون نی مَرِه.» 11 چوم اَمَه دَرَسَمونه که شِمَه میانَه کا بعضی اِن تنبلی بَکَردین، هیچ کاری نِکَرِن، بَلکَم خَلکی کاری کا فضولی بَکَردین. 12 حِسَه خِداوندْ عیسایِ مسیح نومی نَه اِنتَه رَه آدَمون حُکم بَکَردیمون و اَوون تشویق بَکَردیمون که آروم و قرار بِگِرِن و اِشتَن خرج مخارجی بِرون بواَرِن. 13 ولی شِمَه اِی بِرااِن، چاکی کَردِه کا خسته آمَبییَه. 14 اَگم ایی نفر اَ چیی کا که اَمَه اِم نامه کا بَواتیمون اِطاعت مَکَرِه، اَئی نیشون بِکَرَه و اَیی نَه رفت و آمَد مَکَرَه تا خجالت بِکَشِه. 15 ولی اَئی دِشمن مَزونَه، بَلکَم ایلَه بِرایی شیوار اَیی هُشدار بِدییَه. خِیرَه دعا 16 حِسَه، صُلح و سلامتی یَه خِداوند، اِشتَن هَر موقع و هر وضعی کا بِه شِمَه صُلح و سلامتی آدَه. خِداوند شِمَه گِردی نَه بِبو. 17 از، پولُس، چِمِن دَسی نَه اِم سلامی نیویسِم. اِم چِمِن گِردِ نامه اون نیشونه یَه. از اِنتَه نیویسِم. 18 چَمَه خِداوند عیسایِ مسیح فیض شِمَه گِردی نَه بِبو. آمین. |
@ 2024 Korpu Company