دوّمین نامَه تَسالونیکی کلیسا را 2 - کتاب مقدس به زبان تالشی شمالی

بی دینَ مِرد

¹ حِسَه اِی بِرااِن، چَمَه خِداوند عیسایِ مسیح آگَردِستِه درباره و چَمَه، چَیی دور جمع آبییِه درباره، شِمَه کا خواهیشت بَکَردیم،

² هیچی شِمَه فیکری خَراو آمَکَرِه و هَراسون مَبییَه چِه ایلَه روح واسطه نَه، چِه ایلَه گفی نَه، چِه ایلَه نامه ای نَه که اِنگاری چَمَه طرفی کایَه که بوآجِه، خِداوندی آگَردِستِه روز آرَستَه.

³ مَرزَه هیچکس هیچ جوری شِمَه گول بِژَنه. چوم اَ روز نا، مَگر اِمکه اوّل مردم خِدا ضِد پِرِزِن و اَ بی دینَ مِرد که هَلاکتی زوعَه یَه ظهور بِکَرِه،

⁴ اَ، هَر چیی نَه که خِدا دَخونده بَبی یا پرستش بَبی، مخالفت بَکَردی و اِشتَن اَوون کا کَفاتر بَزنی، جوری که خِدا معبدی دیلَه کا بَنِشتی و اِعلام بَکَردی که اِشتَن خِدایَه.

⁵ یعنی شِمَه ویرِرون نییَه، اَ موقعی که شِمَه نَه بیمَه اِمون شِمَه نَه بَواتیم؟

⁶ و شِمَه بَزنیرون که حِسَه چِه چَیی پیشی بَگتی تا اَ اِشتَن وختی موقع کا با.

⁷ چوم اِم بی‌دینی سِرّ حِسَه نی کار بَکَردی. فقط تا وختی که اَ کسی که تا حِسَه مانعَه میانه کا پِگِته بِبو.

⁸ اَ موقع اَ بی‌دینَ آدَم بومَی، که خِداوندْ عیسی اِشتَن گَ نَفَسی نَه اَئی هلاک بَکَردی و اِشتَن پُرشکوهَ اومِه نَه، اَیی نابود بَکَردی.

⁹ اَ بی دینَ مِردی اومِه، شیطانی کاری واسطه نَه، گِردِ قوّت و دورعَه نیشونه اون و معجزه اون نَه و عجیبَ چیونی که گمراه بَکَردی،

¹⁰ و گِردِ شَرورانه حیله اون نَه کسونی را که هلاکتی راه کا اینه، چوم که اَوِن نِپیستشونه حقیقتی نَه خِش بِبون تا نجات پیدا بِکَرِن.

¹¹ بَس خِدا اَوون ایلَه یالَ دوروعی کا گیریفتار بَکَردی، جوری که اَوِن اَ چیی که دورعَه نی باور بَکَردین،

¹² تا گِردِ کسونی که حقیقتی باور کَردَه نیشونه و هَر چیی کا که نادُرستَه، کیف کَردَشونه، محکوم آبون.

پابَرجا بومونَه

¹³ امّا اِی بِرااِنی که خِدا را عزیز گِرامی ایرونه، اَمَه بَسی همیشه خِدا شِمَه واسی شُکر بِکَرَم، چوم خِدا شِمَه نوبری شیوار اِنتخاب کَردِشه که نجات پیدا بِکَرَه، اَ تقدیسی واسطه نَه که خِدا روح نَه اَنجام بَبی و حقیقتی ایمان داشتِه نَه.

¹⁴ اِنتَه بَه که اَ شِمَه، چَمَه اِنجیلی واسطه نَه دعوت کَردِشه، تا چَمَه خِداوند عیسایِ مسیح جلال شِمَه نصیب بِبو.

¹⁵ بَس، اِی بِرااِن، پابَرجا بِبییَه و دَچیکه اَ تعلیمونی که اَمَه کا آموتَه رونَه، چِه چَمَه گفون کا چِه چَمَه نامه اون کا.

¹⁶ حِسَه چَمَه خِداوند عیسایِ مسیح اِشتَن و چَمَه دَده، خِدا، که اَمَه نَه خِش بَه و فیضی واسطه نَه، اَمَه اَبَدی یَه تَسلی و چاکه اُمیدی آدوشَه،

¹⁷ شِمَه دیلون تَسلی بِدَه و هَر چاکه کار و گفی کا پابَرجا بِکَرِه.