دوّمین نامَه تَسالونیکی کلیسا را 1 - کتاب مقدس به زبان تالشی شمالی

¹ پولُس و سیلاس و تیموتائوسی طرفی کا، تَسالونیکی شهری کلیسا را، که چَمَه دَده خِدا و خِداوندْ عیسایِ مسیح کا اِستینَه:

² فیض و صُلح و سلامتی چَمَه دَده، خِدا و خِداوندْ عیسایِ مسیح طرفی کا شِمَه را با.

شُکرکَردِه

³ اِی بِرااِن، اَمَه بَسی همیشه خِدا شِمَه واسی شُکر بِکَرَم، دُرُست نی هِمَه، چوم شِمَه ایمان هِنتَه رُشد بَکَردی و شِمَه هَر کمیلَه محبت یَندی را وِرتَر بَبی.

⁴ اِمی واسی، اَمَه اِشتَن خِدا کلیسااون کا شِمَه را اِفتخار بَکَردیمون، شِمَه پایداری و ایمانی واسی، که تمون اَذیت آزارون و عذابون کا تاو وَردِرونه.

داوری مسیح آگَردِستِه موقع

⁵ اِم خِدا عادلانۀ داوری نیشونه یَه، تا شِمَه خِدا پاُتشایی شَئنی کا بِبییَه که چَیی راه کا، کارا عذاب نی کَشَه.

⁶ چوم که راس راسی خِدا اِمی عادلانه بَزنی، که کسونی که شِمَه عذاب بَداین، عذابی نَه عوض بِدَه،

⁷ و شِمَه که عذاب کَشَرونه و هَتَه اَمَه نی راحتی بَدای، اَ موقع که خِداوند عیسی اِشتَن نیرمندَه ملائیکه اون همراه، آسِمونی کا ظاهر آبو،

⁸ آلاو دارَه آتشی دیلَه کا و خِدا نَشناسون و کسونی که چَمَه خِداوند عیسی اِنجیلی کا اِطاعت نِکَرِن، تقاص ویگِرِه.

⁹ چَوون سِزا اَبَدی یَه نابودی خِداوندی حضوری کا و چَیی قدرت جلالی کا بَبی.

¹⁰ هَتَه که اَ، اَ روزی کا بومَی اِشتَن ایماندارون دیلَه کا جلال بَگَتی، و گِردِ کسونی دیلَه کا که اَیی ایمان وَردَشونه، مات بَبین و شِمَه نی اَوون نَه بَبیرون، چیرا که چَمَه شهادتی ایمان وَردَرونه.

¹¹ اِمی واسی، اَمَه همیشه شِمَه را دعا بَکَردیمون تا چَمَه خِدا شِمَه اِشتَن دعوتی شَئنی کا بِزونِه و اِشتَن قوّتی نَه هَر چاکَه نییَت و هر کاری که ایمانی کا سَرچشمه بَگتی اَنجام بِدَه،

¹² تا چَمَه خِداوند عیسی نوم شِمَه دیلَه کا جلال بِگِرِه، و شِمَه نی چَمَه خِدا و خِداوند عیسایِ مسیح فیضی واسی، چَیی دیلَه کا جلال بِگِرَه.