پطروسی دومین نامه 3 - کتاب مقدس به زبان تالشی شمالیخِداوندی روز 1 اِی عَزیزِن، اِم دوّمین نامه یَه که شِمَه را بَنیویشتیم. هَر دِ گِله نامه اِم نیَّتی نَه نیویشتِمَه تا شِمَه ویر بواَرِم و شِمَه پاکَ فیکرون غیرتی بِکَرِم، 2 تا اَ کلامی که مقدّس پِیغمبرِن پیشتَری واتَشون بَه و خِداوند و چَمَه نجات‌دهندۀ حُکمی که رسولون واسطه نَه شِمَه آدوشَه، ویر بواَرَه. 3 هَر چیی کا پیشتَر، بِزونَه که آخِر زمانی کا مسخره کَرارونی بومَین که اِشتَن پَلیده پیستَه اون دومله اینَه و مسخره کَرون 4 بَواتین: «بَس چَیی اومِه وعده چِه بَه؟ چوم هَ وختی نَه که چَمَه دَده اِن مَردی نه، گِردِ چی هَتَه یَه که دنیا صِفته نَه بَه!» 5 چوم اَوِن عمدی اِم حقیقتی ندید بَگَتین که آسِمونِن پیشتَرون بینَه و زَمین آوی کا و آوی واسطه نَه و خِدا کلامی نَه شِکل گِتِشَه؛ 6 و هِم آوی واسطه نَه، اَ دنیایی که اَ زمان وجود داری، غَرق بَه و نابود آبَه. 7 ولی هَ کلامی نَه، آسِمونون و زمینی که حِسَه بَویندیرون، آتشی را ذخیره بینَه و تا روز داوری، بی دینون هلاکت بییِه را غَم هَرده بَبی. 8 امّا اِی عزیزِن، اِم حقیقتی ندید مَگِرَه که خِداوندی را ایی روز هَزار سالی شیوارَه و هَزار سال ایی روزی شیوار. 9 بَرعکسِ بعضی اِن گمون، خِداوند اِشتَن وعده اَنجام دوعِه کا عَری آنِکَرِه، بَلکَم شِمَه نَه صَبورَه، چوم نِپیستِشه هیچکَس هَلاک بِبو بَلکَم پیستِشَه گِرد توبه بِکَرِن. 10 امّا خِداوند عیسی آگَردِستِه روز ایلَه دِزدی شیوار بومَی، اَ موقع آسِمونِن ایلَه بَرک یالَه سَسی نَه از بِین بَشین و ستاره اِن آتش بَگتین و نابود بَبین، زمین و چَیی گِردِ کارِن معلوم آبون. 11 اِمی واسی که گِردِ اِم چییِن کارا نابود بَبین، شِمَه بَسی چِنتَه رَه آدَمونی بِبییَه؟ شِمَه بَسی ایلَه مقدّس و دیندارَه زندگی بِدارَه، 12 خِدا روزی را چِم بِه راه بِبییَه و اِمی واسی که خِدا روز زودتَر با تَقَّلا بِکَرَه. اَ روزی کا که آسِمونِن آتش بَگَتین و نابود بَبین و آسِمونِن، ستاره اون آتَشی گرمی کا ذوب آبون. 13 امّا اَمَه بینا بَر چَیی وعده، تازه آسِمون و تازه زمینی مُنتظریمونَه که چَیی دیلَه کا هَرچیی که خِدا نظری کا دُرستَه، نوعَه. 14 بَس اِی عَزیزِن، حِسَه که اِم چییون مُنتظریرونه، تَقَّلا بِکَرَه تا چَیی نظری کا بی لَکه و بی عیب بِبییَه و صُلح و سلامتی کا بومونَه. 15 و چَمَه خِداوندی صَبری نجات بِزونِه، هَتَه که چَمَه عَزیزگِرامی یَه بِرا پولُس نی مطابق اَ حکمتی که بَیی آدوعَه بَه، شِمَه را نیویشتِشه. 16 پولُس گِردِ اِشتَن نامه اون دیلَه کا وختی که اِم چییون کا گف ژَنِه، نیویسِه. چَیی نامه اون کا چییونی نیویشته بَیینه که چَوون فَهمِستِه چَتینَه و نادونَ آدَمِن و بی ثُباتِن چَیی دیلَه کا دَس بَبَردین، هَتَه که دییَر مقدّس نیوشته اون نَه اِنتَه بَکَردین، و اِم چَوون نابودی باعیث بَبی. 17 بَس شِمَه اِی عزیزِن، حِسَه که اِمی بَزنیرون شِمَه هَواس جمع بِبو که نَبادا بی دینون نادُرستَ راه دیلَه کا راه کا بَرشَه و شِمَه مقاومتی کا دَس پِگِرَه، 18 بَلکَم چَمَه خِداوند و چَمَه نجات دهنده عیسایِ مسیح آزونِستِه و فیضی کا رُشد بِکَرَه، که حِسَه نَه تا اَبَد اَیی را جلال بِبو! آمین. |
@ 2024 Korpu Company