یوحنا دوّمین نامَه 1 - کتاب مقدس به زبان تالشی شمالی

¹ شیخی طرفی کا، اِنتخاب بییَه بانو را و چَیی خِردَنون را که ’حقیقتی کا‘ اَوون نَه خِشیمَه- و نِه فقط اَز، بَلکَم گِردِ کَسونی که حقیقتی آزونِستَشونه-

² اَ حقیقتی واسی که چَمَه وجودی کا یَه و تا اَبَد اَمَه نَه بَمَندی.

³ فیض و رحمت و سلامتی خِدای دَده طرفی کا و عیسایِ مسیح طرفی کا، اَ دَده زوعَه، حقیقت و محبتی کا اَمَه نَه بَمَندی.

محبت و حقیقتی کا زندگی کَردِه

⁴ از وِر شاد آبیمَه که فهمِستِمه بعضی اِشتِه خِردَنِن، طبق حُکمی که دَده کا ویگِتَمونه، ’حقیقتی‘ کا زندگی بَکَردین.

⁵ حِسَه، عزیزگرامی یَه بانو، بَه تِه کا درخواستی هِستِمه. نِه اِم که تازه حُکمی بَه تِه را بینیویسِم، بَلکَم هَ حُکمی که صِفته نَه هِستِمونه، اِم که یَندی محبت بِکَرَم.

⁶ محبت اِمَه که اَمَه طبق چَیی اَحکام زندگی بِکَرَم. حُکم اِمَه، هَتَه که صِفته نَه دَرَسَرونه، تا اَیی کا زندگی بِکَرَه.

⁷ چوم دنیا کا وِر حُقه بازِن اِستینه، که اِقرار نِکَرِن که عیسایِ مسیح آدَمی جسمی کا اومَه بِه اِم دنیا. اِنتَه رَه آدَمِن هَ حُقه بازِن و ضِدّ مسیح اِستینه.

⁸ شِمَه هَواس جمع بِبو تا اَ کاری ثمره که اَمَه اَنجام دوعَمونه بِه وا مَدییَه، بَلکَم ایلَه پاداشی کامل ویگِرَه.

⁹ هَر کسی که مسیح تعلیمی کا پیشتَر بِشو و چَیی دیلَه کا ثابت مَمونه، خِدا نیشه، هَر کسی که اَ تعلیمی کا ثابت بَمَندی، هَم دَده هِستِشه و هَم زوعَه.

¹⁰ اَگم کسی بومَی شِمَه وَر و اِم تعلیمی مَواَرِه، اَئی شِمَه کَ کا راه مَدییَه و اَیی نَه موآجَه خِش اومَیش؛

¹¹ چوم اَ کسی که اَئی نَه بوآجِه خِش اومَیش، چَیی شَرورَه اَعمالون دیلَه کا شریک بَبی.

خاتیمَه

¹² وِر چیون هِستِمَه که شِمَه را بینیویسِم، امّا نِپیستِمه مُرَّکب و کاغذی نَه بِبو. بَلکَم امید دارِم بام شمَه وَر و یَندی نَه دیمادیس گف بِژَنم تا چَمَه شادی کامِل آبو.

¹³ اِشتِه اِنتخاب بییَه خالا خِردَنِن، بَه تِه را سلام آرِساوونِن.