دوومین نامه قرنتیانیرا 6 - کتاب مقدس به زبان تالشی شمالی1 بَس اَ چیونی کا که خِدا همکارونیمونه، شِمَه کا خواهیشت بَکَردیمون که خِدا فیضی بیخودی بِه دَس مَواَرَه. 2 چوم خِدا، اِشعَیای پِیغمبری کیتابی کا بَواتی که: «چِمِن مُناسب وختی کا، اِشتِه جَواوی دومَه و نِجاتی روزی کا، اِشتِه یاوَر بیمَه.» حِسَه، الان خِدا مُناسبَه وخته؛ حِسَه، الان نِجاتی روزَه. پولسی سختی اِن 3 اَمَه هیچ سِنگی هیچکسی راه کا فِرآنِدییَم، تا چَمَه خِدمتی کا هیچ عیبی مَبو، 4 بَلکَم هَر کاری که بَکَردیمون نیشون بَدایمون که خِدا نوکَرونیمونه: تاو و تحملی نَه مصیبتون کا، سختیون و بَلااون کا، 5 لِس هَردَه اون موقع، زِندونون دیلَه کا، وِلوِله اون دیلَه کا، چَتین کاری کا، شَو بی‌خواویون کا، و وِشیی کا نیشون بَدایمون که خِدا نوکَرونیمونه؛ 6 پاکی نَه، دانایی نَه، صَبری نَه، میهروونی نَه، روح القدسی نَه، خالصَه محبتی نَه، 7 راستَه واجی نَه، خِدا قدرتی نَه، صالح بییِه سِلاحون نَه که چَمَه راستَ دَس و چپَ دَسی کایَه؛ 8 عِزّت و ذِلّتی کا، چِه اَمَه بُختون بِژَنِن چِه اَمَه کا تعریف بِکَرِن . اَمَه نَه دَقَلبازون شیوار رفتار بَبی، با اِم حال اَمَه راستَه واجیمونه؛ 9 اَمَه نَه بی نوم و نیشونون شیوار رفتار بَبی، با اِم حال آزونِسته بَیمونه؛ اَمَه نَه مَردَه اون شیوار رفتار بَبی، با اِم حال بِوینه حَلا زِنده ایمونه؛ اَمَه نَه جوری رفتار بَبی که اِنگاری کارا مجازات بَبیمون، با اِم حال کِشتَه بَه نیمونه؛ 10 اَمَه نَه غمگینون شیوار رفتار بَبی، با اِم حال هَمَش شادیمونه؛ اَمَه نَه نَدارون شیوار رفتار بَبی، با اِم حال وِرکَسون پولدار بَکَردیمون؛ اَمَه نَه جوری رفتار بَبی که اِنگاری هیچی نِدارَم، با اِم حال همه چیی صاحابیمونَه. 11 اِی قُرِنتُسی شهری مردم، اَمَه، شِمَه نَه رُک گَف ژَندِمونه و چَمَه دیلی سِفرَه شِمَه را آکَردِمونه. 12 اَمَه، چَمَه محبتی شِمَه کا دریغ نِکَردِمونه. بَلکَم شِمَه ایرونه که شِمَه محبتی اَمَه کا دریغ کَردِرونه. 13 شِمَه نَه چِمِن خِردَنون شیوار گَف ژَنِم؛ شِمَه نی شِمَه دیلی سِفرَه اَمَه را آکَرَه. خِدای زِنده معبد 14 بی ایمانون یوغی جیر مَشییَه، چون صالح بییِه و شِرارت یَندی نَه چِه سَنَمی دارِن، نور و ظلمت چِه رَفاقتی دارِن؟ 15 مسیح و بِلیعان یعنی شیطان چِه سُلوکاتی دارِن و مؤمن و کافر چِه چی کا یندی مونِن؟ 16 و خِدا معبد و بُتون را چِه سُلوکاتی اِستَه؟ چوم که اَمَه خِدای زِنده مَعبَدیمونه. هَتَه که خِدا، تورات و پِیغمبرون کیتابی کا بَواتی که: «از چَوون دیلَه کا بَمَندیم و چَوون دیلَه کا راه بَشیم، و اَز چَوون خِدا بَبیم و اَوِن چِمِن قوم بَبین.» 17 بَس، خِداوند بَواتی: چَوون دیلَه کا بایَه بِرون و اَوون کا جِدا آبییَه. هیچ نِجِس چیی دَس مَژَنه، و اَ موقع از شِمَه گرمی نه قبول بَکَردیم.» 18 «و از شِمَه را دَده بَبیم و شِمَه بَه مِرا زوعَه اون و کِلَه اون بَبیرون، خِداوندِ قادر مطلق اِمی بَواتی.» |
@ 2024 Korpu Company