دوومین نامه قرنتیانیرا 5 - کتاب مقدس به زبان تالشی شمالی

چَمَه آسِمونی یَه کَ

¹ حِسَه بَزنیمون که هَر موقع اِم خیمَه یعنی چَمَه زمینی یَه کَ، که چَیی دیلَه کا زِندگی بَکَردیمون ویبو، خِدا کا ایلَه عِمارت هِستِمونه، ایلَه کَ ایی که دَسی نَه وج آبَه نییَه و آسِمونی کا اَبَدی یَه.

² حَقیقتَن که اِم خیمَه کا آه کَشَم، چوم مُشتاقیمونَه که چَمَه آسِمونی یَه کَ ایلَه خَلایی شیوار دَکَرَم،

³ اَگم واقعا چَیی دَکَردِه نَه، دِ لُخت نیمونه.

⁴ چوم تا وختی که اِم خیمَه کا ایمونَه سَنگینَه باری نَه آه کَشَم، نِه اِمی واسی که لُخت بَبیمون بَلکَم وِرتَر پوشوندَه بَبیمون، تا زِندگی اَ چیی که فانی یَه ویبَرِه.

⁵ خِدایَه که اِم هدفی را اَمَه حاضِیر آکَردَشَه و روح القدوسی، ایلَه بَیانه ای شیوار بَمون آدوعَشه.

⁶ بَس اَمَه همیشه دیلگَرمیمونَه. اَمَه بَزنیمون تا وختی که اِم بَدَنی کا کَ هِستِمونه، خِداوندی کا دوریمونَه،

⁷ چوم ایمانی نَه زِندگی بَکَردیمون، نِه اَچیی نَه که بَویندیمون.

⁸ ها، اَمَه حیسابی دیلگَرمیمونَه و اِمی چاکتَر بَزنیمون که اِم بَدنی کا دور آبییَم، و کَ کا خِداوَندی نَه زِندگی بَکَردیمون.

⁹ بَس چِه بَدنی کا زِندگی بِکَرَم و چِه اَیی کا دور بِبییَم، چَمَه نیّت اِمَه که اَیی راضی آکَرَم.

¹⁰ چوم که اَمَه گِرد بَسی مسیح داوری یَه تختی پیشی کا حاضر آبییَم، تا هَر کسی بینا بَر اَ چاک و بَدَه اَعمالی که اِشتَن بَدنی کا زِندگی بَکَردی اَنجام دوعَشَه، سِزا بوینِه.

آشتی خِدمت

¹¹ بَس چوم خِداوندی تَرسی معنی بَزنیمون، مردمی قانع بَکَردیمون. ولی اَ چیی که اِستیمونَه خِدا را آشکارَه و اُمیدوارمَه شِمَه وجدانی را نی آشکار بِبو.

¹² اَمَه نِپیستِمونَه درباره اِشتَن هَنی تعریف بِکَرَم، بَلکَم پیستِمونَه دلیلی بواَرَم که شِمَه بَمون اِفتخار بِکَرَه، تا بِشایَه کسونی جَواوی بِدییَه که ظاهری را افتخار بَکَردین، نِه اَ چیی که دیلی دیلَه کایَه.

¹³ چوم که اَگم چَمَه عقلی از دَس دوعَمونه، خِدا واسی یَه؛ و اَگم عاقلیمونه، شِمَه واسی یَه.

¹⁴ چوم که مسیح محبت اَمَه کنترل بَکَردی، چوم فَهمِستمونه که ایی نفر گِردی واسی مَردَه، بَس گِرد مَردی نَه.

¹⁵ و اَ گِردی واسی مَردَه تا اَوِن دِ اِشتَن واسی زندگی مَکَرِن، بَلکَم اَ کسی را زِندگی بِکَرِن که چَوون واسی مَردَه و زِندَه آبَه.

¹⁶ بَس، چِمی پَش دِ اَمَه آدَمون هیچکسی مطابق جِسم آنِزونَم. هَر چَن پیشتری جِسمی مطابق مسیح آزونیمون، حِسَه دِ اِنتَه نییَه.

¹⁷ بَس اَگم ایی نفر مسیح دیلَه کا بِبو، تازه خِلقتی اِستَه. هَر چیی که کَنه بَه دِ تَمون آبَه؛ حِسَه، گِردِ چیی اِن تازه آبَیینه!

¹⁸ اِمِن گِرد خِدا کا اینه که مسیح واسطه نَه اَمَه اِشتَن نَه آشتی دوعَشَه و آشتی دوعِه خِدمتی نی بَمون دَسپَردَشه.

¹⁹ یعنی، خِدا مسیح کا دنیا اِشتَن نَه آشتی بَدای و مردمی تقصیراتی چَوون حِساب نِنَی، و آشتی پِیغومی بَمون دَسپَردِشه.

²⁰ بَس اَمَه مسیح سَفیرونیمونه، خِدا اِشتَن پیستَه از طریق چَمَه اَنجام بَدای. اَمَه مسیح طرفی نَه شِمَه کا خواهیشت بَکَردیمون که خِدا نَه آشتی بِکَرَه.

²¹ خِدا اَ، کسی که گناه آنِزونی، چَمَه واسی گناه وَج آکَردِشه، تا اَمَه، چَیی دیلَه کا خِدا صالِحی بِبییَم.