دوومین نامه قرنتیانیرا 3 - کتاب مقدس به زبان تالشی شمالی

تازَه عهدی خِدمتکارِن

¹ مَگم هَنی دَمَندَه ایمونه اِشتَن کا تعریف کَردِه؟ یا اِمکه اَمَه اِحتیاج دارَم بعضیون شیوار، شِمَه سفارش نامه آدییَم یا شِمَه کا سفارش نامه ویگِرَم؟

² شِمَه اِشتَن چَمَه سفارش نامۀ ایرونه، ایلَه نامه‌ای که چَمَه دیلون سَری کا نیویشته بییَه که گِرد بَشاین اَیی بوخونِن و آزونِن.

³ شِمَه نیشون دوعَه رونه که مسیح نامۀ ایرونه، که چَمَه واسطه نَه آرَستَه بِه شِمَه، که جوهَری نَه نیویشته بَه نییَه، بَلکَم خِدای زِنده روح نَه نیویشته بَه، و نِه سِنگی یَه لوحی سَری کا، بَلکَم آدَمون دیلون لوحی سَری کا نیویشته بییَه.

⁴ مسیح واسی یَه که اَمَه اِنتَه رَه اِطمینانی خِدا حضوری کا هِستِمونَه.

⁵ نِه اِم که اِشتَن لیاقت بِدارَم که اِدعا بِکَرَم که چَمَه دَسی کا نی چیی بِرون بومَی، بَلکَم چَمَه لیاقت خِدا کایَه.

⁶ خِدا بَه که اَمَه لیاقت آدوشَه تا تازَه عهدی خِدمتکارون بِبییَم- عَهدی که خِدا روح سَری کا پابَرجایَه، نِه اَ چیی سَری کا که فقط ایلَه نِیوشتَیَه. چوم ’نیوشتَه‘ بَکِشتی، امّا خِدا روحْ، زِندگی بَبَخشِستی.

⁷ حِسَه، اَگم اَ خدمتی که بِه مَرگ خَتم بَبی و سِنگی یَه لوحی سَری کا حَک بییَه بَه، جلالی نَه ظاهر آبَه، جوری که قوم بنی اِسرائیل نیمَشاین موسی دیمی جلالی واسی اَیی دَیِسِن، هَر چَن اَ جلال کارا از بِین بَشی،

⁸ چِندی وِرتَر، اَ خِدمتی که خِدا روح واسطه نَه یَه جلالی نه بَبی.

⁹ چوم اَگم خِدمتی که محکومیتی را خَتم بَبی جلالی نه بَه، چِندی وِرتَر خِدمتی که صالِحی را خَتم بَبی جلالی نَه پورَه.

¹⁰ چوم اَ چیی که ایی موقعی پُور جلال بَه، حِسَه اِم جلالی مقایسه نَه که سَرتَرَه، دِ جلالی نیشَه.

¹¹ و اَگم اَ چیی که از بیِن بَشی، جلالی نَه همراه بَه، چِندی وِرتَر اَ چیی که باقی بَمَندی جلالی نَه همرایَه.

¹² بَس چوم که اِنتَه رَه اُمیدی هِستِمونه، جُرئتی نَه گَف ژَنَم،

¹³ نِه موسی شیوار که اِشتَن دیمی کا ایلَه نِقاب ژَندِشَه تا قوم بنی اِسرائیل آخِرسَر، اَ چیی که کارا از بِین بَشی، مَوینِن.

¹⁴ امّا چَوون فیکرِن تاریک آبینَه چوم که تا اوری نَه روز هَ نِقاب قدیمَه عهدی خَندِه موقع باقی یَه و پِگِته بَه نییَه، چوم که فقط مسیح کا پِگِتَه بَبی.

¹⁵ حتی تا اوری نَه روز، هَر موقع که موسی توراتی خونِن، چَوون دیلی سَری کا ایلَه نِقاب بَمَندی.

¹⁶ امّا هَر موقع کسی آگَردِه خِداوندی وَر، نِقاب پِگِتَه بَبی.

¹⁷ خِداوند، روح اِستَه و هَر جِگا که خِداوندی روح بِبو، اوآکا آزادی اِستَه.

¹⁸ و گِردِ اَمَه که بی نِقابَ دیمی نَه، خِداوندی جَلالی، ایلَه آواینه شیوار دَیِسَم، هَ شِکلی شیوار، جلالی کا بِه ایلَه جلالی که وِرتَرَه عوض آبییَم؛ و اِم خِداوندی کا شروع بَبی که، روح اِستَه.