دوومین نامه قرنتیانیرا 2 - کتاب مقدس به زبان تالشی شمالی

¹ چوم که تصمیم گِتِمَه هَنی از دِوارَه مام شِمَه وَر تا شِمَه غورصَه دار مَکَرِم.

² چوم اَگم شِمَه غورصَه دار بِکَرِم، دِ کی بَشای مِن شاد آکَرِه، شِمَه غِیراز که شِمَه غورصَه دار کَردَمَه؟

³ از شِمَه را جوری نامه نیویشتِمَه تا چِمِن اومِه موقع شِمَه وَر، اَوِنی که بَسی مِن شاد آکَرِن، چِمِن غورصَه باعیث مَبون. چوم که شِمَه گِردی کا مطمئن بیمَه که چِمِن شادی شِمَه گِردی شادی یَه.

⁴ چوم وِرَه غَم و غَورصه نَه و چَکیستَه دیلی نَه و اِسِرگینه چِمون نَه شِمَه را نیویشتِمَه، نِه اِمی واسی که شِمَه غورصَه دار بِکَرِم، بَلکَم تا بِزونه چَدَه شِمَه نَه خِشیمَه.

گناه کارون بِبَخشَه

⁵ حِسَه اَگم ایی نفر غم و غورصه باعیث بِبو، نِه فقط مِن، بَلکَم- اَگم مَپیم وِرَه گف بِژَنِم- تا حدودی شِمَه گِردی غورصَه دار کَردَشه.

⁶ چوم اِنتَه رَه آدَمی را اَ مجازاتی که شِمَه وِرتَرون طرفی نَه اَیی سِزاوار زونِستَه رونه، وَستَه.

⁷ بَس دِ بَسی اَئی بِبَخشَه و اَیی دیلداری بِدییَه، نَبادا وِرَه غورصه اَیی از پا بَروَرِه.

⁸ بَس، شِمَه کا خواهیشت بَکَردیم، اَئی شِمَه محبتی کا مطمئن بِکَرَه.

⁹ چوم اِمی واسی شِمَه را نیویشتِمه تا شِمَه اِمتحان بِکَرِم و بِوینِم که هَر دستوری کا فرمان بَبَردیرون یا نِه؟

¹⁰ هَر کسی که شِمَه اَیی بِبَخشَه، از نی اَئی بَبخشِستیم. و راس راسی اَگم ایی نفری بِبَخشِم - البته اَگَم دلیلی بَخشِسته را بِبو- از مسیح پیشی کا، شِمَه واسی اِنتَه کَردَمَه،

¹¹ تا شیطان اَمَه گول مَژَنه؛ چوم که اَمَه چَیی نَخشَه اون کا بی‌خَوَر نیِمونَه.

پیروزی مسیح کا

¹² وختی شیمَه تْروآسی شهری را تا مسیح اِنجیلی موعظه بِکَرِم، با اِمکه خِداوند اوآ کا ایلَه یالَه دَروازَه ای چِمِن دِیمی کا آکَردَشَه،

¹³ امّا هَنی آروم قَرار نِداریم چوم که چِمِن بِرا، تیتوسی نِتلَفتِمَه. بَس اوآ اَهالی نَه خِداحافظی کَردِمه، شیمَه مقدونیَه منطقه را.

¹⁴ امّا خِدا را شُکر که، همیشه مسیح کا، اَ اِشتَن پیروزی کا اَمَه راهنمایی بَکَردی و چَیی دانای یَه عطری چَمَه واسطه نَه گِردِ جِگاکا پخش آکَرِه.

¹⁵ چوم که اَمَه خِدا را، مسیح خوشبوعَه بو ایمونَه، چَه کسونی دیلَه کا که نجات پیدا کَردَشونه، چِه کسونی دیلَه کا که هَلاک بَبین.

¹⁶ ایی نفری را مرگی بو بَدایمون که مرگی طرفی را بَشی، ایی نفر دییَری را زِندگی بو بَدایمون که زِندگی طرف بَشی. کییَه که اِنتَه رَه چیون لَیاقتی بِدارِه؟

¹⁷ چوم که اَمَه اَ آدَمون شیوار نیمونه که منفعتی را خِدا کلامی خِرَشِن، بَلکَم اَمَه خِدا چِمی پیشی کا، مسیح کا گف ژَنَم. اَ آدَمونی شیوار که خالِصَه نیَّتون دارِن و خِدا طرفی کا ایینه.