دوومین نامه قرنتیانیرا 12 - کتاب مقدس به زبان تالشی شمالیپولُسی رویا اِن و چَیی جِسمی تیگِن 1 از بَسی هِنتَه اِفتخار بِکَرِم. هَر چَن که اَیی کا هیچ نفعی نِبَرِم، حِسَه چِمِن اِفتخاری، رویااون و خِداوندی مکاشفاتی واتِه را اِدامه بَدایم. 2 ایی نفری مسیح کا آزونِم، که چاردَه سال پیش بَردَه بَه سوّمین آسِمونی را . نیمَزنِم بَدَنی نَه یا بَدنی کا بِرون، خِدا بَزنی. 3 و از بَزنیم که اَ آدَم بَردَه بَه بهشت- نیمَزنِم بَدَنی نَه یا بَدنی کا بِرون، خِدا بَزنی- 4 و اَ چییونی دَرَسِشَه که نییَب واتِه، که آدَمی را چاک نییَه چَوون درباره گف بِژَنه. 5 از اِنتَه رَه کسی را اِفتخار بَکَردیم. امّا درباره اِشتَن، چِمِن ضَعفون غِیراز چیی را اِفتخار نِکَرِم. 6 هَر چَن اَگم پیستِمه اِفتخار بِکَرِم، بیفَهم نِبوم، چوم حقیقتی بَواتیم. امّا اِم کاری کا پرهیز بَکَردیم تا نَبادا کسی خیال بِکَرِه از، اَ چیی کا که بَه مِن کا بَویندی و بَه مِن کا دَرَسِه یالتَریمَه. 7 بَس اِمی واسی که اِم یالَه مکاشفاتی که بی حد و اندازه نی اِستَه، مِن مغرور مَکَرِه، ایلَه تیگی، چِمِن جسمی کا بَه مِن آدوعَه بَه، یعنی شیطان ویسا آکَردِشَه، تا مِن عذاب بِدَه و مَرزِه از مغرور بِبوم. 8 اِم جریانی را سِه کَرَه خِداوندی مِنّت کَردِمَه که اَیی بَه مِن کا ویگِرِه، 9 امّا خِداوند مِنه واتِشَه: «چِمِن فیض بَه تِرا وَستَه، چوم که چِمِن قدرت، ضَعفون دیلَه کا کامل بَبی.» بَس اِمی واسی از پیشتری کا وِرتَر شادی نَه چِمِن ضَعفون را اِفتخار بَکَردیم تا مسیح قدرت چِمِن سَری کا قرار بِگِرِه. 10 بَس مسیح واسی، ضَعفون کا، فَشون کا، سختیون کا، اَذیت آزارون و بلائون کا، راضی ایمَه. چوم وختی از ضعیفیمَه، بَس قوی ایمَه. 11 از ایلَه نادون بیمَه! شِمَه مِن مَجبور کَردِرونه، چوم که بَسی بَه مِن کا تعریف بِکَریرون. چوم هَر چَن که هیچی نیمَه، امّا اَ ’یالَ رسولون‘ کا هچیی کم نیمَه. 12 ایلَه واقعی یَه رسولی نیشونه اِن، وِرَه صبر و تحملی نَه شِمَه دیلَه کا آشکار آبَه، علامت و معجزه اونی نَه که قدرتی نَه یَه. 13 چوم که چِه چی کا اَلباقی کلیسااون کا کمتر شِمَه را لطف بَه، اِمی غِیراز که از اِشتَن هرگز شِمَه دوشی سَری کا باری نِبیمَه؟ چِمِن اِم خطا بِبَخشه! 14 حِسَه آمادَه ایمه سوّمین کَرَه را شِمَه ویندِه را بام، و شِمَه دوشی سَری کا هیچ باری نِنَم. چوم که شِمَه مال و مَنالی دومله نیمَه، بَلکَم شِمَه اِشتَن پیستِمَه. چوم که خِردَنون وظیفه نییَه اِشتَن دَده نَنه را مال و مَنال جمع آکَرِن، بَلکَم دَده نَنه وظیفه یَه. 15 از وِرَه شادی نَه شِمَه جانون را خرج بَکَردیم و چِمِن جانی نی بَنایم. اَگم از شِمَه نَه وِرتَر خِشیمَه، مَگم شِمَه بَسی مِنه کمتر خِش بِبییَه؟ 16 امّا با اِم که قَبول دارَه از شِمَه دوشی سَری کا باری نوعَه نیمَه، لابُد بَواتیرون از حُقه بازیمَه و حیله نَه شِمَه بِه دَس وَردَمَه. 17 مَگم کسونی واسطه نَه که ویسا آکَردِمَه شِمَه وَر شِمَه کا منفعتی بَردِمَه؟ 18 از تیتوسی کا خواهیشت کَردِمَه که با شِمَه وَر و چَمَه بِرا نی چَیی همراه ویسا آکَردِمَه. مَگم تیتوس شِمَه کا منفعتی بَردِشه؟ مگم اَمَه ایلَه روح کا عمل نِکَردِمونه؟ مَگم اَمَه یَندی نَه ایلَه راه نِشیمونه؟ 19 مَگم تا حِسَه خَیال بَکَردیرون که اَمَه تَقَّلا بَکَردیمون که شِمَه پیشی کا اِشتَن کا دفاع بِکَرَم؟ اَمَه خِدا حضوری کا کسونی شیوار گف ژَنَم که مسیح کا اینَه، اِی عزیزِن، هَر چیی که بَکَردیمون، شِمَه ایمانی تقویت کَردِه را یَه. 20 چوم که از تَرسِم بام شِمَه وَر شِمَه اَته که اِنتظار هِستِمَه مَوینِم، و شِمَه نی اَته که اِنتظار هِسترونه، مِن مَوینه. شاید شِمَه دیلَه کا جَنگ و جَدَل، حَسودی، خشم، دِشمِنی، بُختون، غیبت، غرور و هَرکی هَرکی بِبو. 21 و اِمی کا تَرسِم که وختی هَنی بام شِمَه وَر، چِمِن خِدا شِمَه پیشی کا مِن فروتن بِکَرِه و از مجبور بِبوم بَعضیون واسی که قبلا گناه کَردَشونه و اِشتَن ناپاکی، و بی عفتی و عیاشی کا توبه کَردَه نیشونه، عزاداری بِکَرِم. |
@ 2024 Korpu Company