دوومین نامه قرنتیانیرا 11 - کتاب مقدس به زبان تالشی شمالی

پولُس و دوروعی نَه رَسولِن

¹ کَشکی شِمَه چِمِن اِم روکَته نادونی کا مِن تاو بواَردیرون، مِن تاو بواَرَه!

² چوم که از شِمَه را غیرت هِستِمَه و اِم غیرت خِدا کایَه، چوم که از شِمَه ایلَه مِردی نَه، یعنی مسیح نَه، پِیوَندی کَردِمَه، تا شِمَه، ایلَه پاکَه باکِرَه ایی شیوار دَسپارِم چَیی دَس.

³ امّا تَرسِم هَتَه که نَلتی، حَوا گول ژَندِشَه، شِمَه فیکر نی اَ صاف و صادقی و خلوصی نَه که بِه مسیح هِستِرونه، منحرف بِبو.

⁴ چوم که اَگم ایی نفر با شِمَه وَر و شِمَه ایلَه دییَر عیسی نَه اَ عیسی غِیراز که اَمَه بِه شِمَه اِعلام کَردِمونه، اِعلام بِکَرِه، یا اَگم شِمَه ایلَه دییَر روح، روح القدوسی غِیراز که ویگِتَرونه، ویگِرَه یا اَگم اِنجیلی پِیغومی اَ اِنجیلی پِیغومی غِیراز که قبول کَردَرون بَه قبول بِکَره، شِمَه راحت اَیی تحمل بَکَردیرون.

⁵ راس راسی گَمون نِکَرِم از اَ ’یالَ رسولون‘ کا چیی کَم بِدارِم.

⁶ حتی اَگم گفَ ژَنی کا ماهِر مَبوم، دانایی کا چیی کم نیمَه؛ راس راسی اَمَه اِمی هَر لحاظی کا، هَر چی دیلَه کا شِمَه را روشن آکَردَمونه.

⁷ مَگم گناه کَردِمَه که اِشتَن روک آکَردِمَه تا شِمَه سَربِلند بِبییَه، چوم که خِدا اِنجیلی پِیغومی مِفتَکی شِمَه را اِعلام کَردِمَه؟

⁸ از دییَر کلیسااون غارت کَردِمَه و اَوون کا کمک مالی ویگِتِمَه تا شِمَه خدمت بِکَرِم.

⁹ و مدتی که شِمَه دیلَه کا بیمَه و محتاج بیمَه، هیچکسی دوشی سَری کا باری پنوعَه نیمَه، چوم بِرااِنی که مقدونیه ولایتی کا اومینَه چِمِن اِحتیاجاتی بَر طرف کَردِشونَه. و از هیچ جورَه شِمَه دوشی سَری کا باری نوعَم نِبَه و چِمی بِه دومله نی نِنَم.

¹⁰ مسیح اَ حقیقتی سَر قَسّم که چِمِن دیلَه کایَه، که هیچ‌کس اَخائیه منطقه کا چِمِن اِم اِفتخاری بَه مِن کا نِویگِرِه.

¹¹ و چیرا؟ یعنی اِمکه شِمَه نَه خِش نیمَه؟ خِدا بَزنی که خِشیمَه!

¹² و کاری که بَکَردیم اِدامه بَدایم تا کسونی کا که اِدعا بَکَردین پیستِشونَه، هَتَه که اَمَه خدمت بَکَردیمون خدمت بِکَرِن، فُرصتی ویگِرِم. کسونی کا که تَقّلا بَکَردین تا اِشتَن اَ چیی دیلَه کا که بَیی فخر بَکَردین اَمَه نَه بَرابَر بِکَرِن.

¹³ چوم اِنتَه رَه کسونی، دوروعی نَه رسولِن و دَقَلبازَه کارگرونی اِستینه که اِشتَن مسیح رسولون شیوار وَج آکَرِن.

¹⁴ و اِم عجیب نییَه، چوم که شیطان نی اِشتَن نوری ملائیکه شیوار وَج آکَرِه.

¹⁵ بَس تعجب نِدارِه که چَیی خادِمِن نی اِشتَن صالحی خادِمون شیوار وَج آکَرِن. آخِرسَر اَوِن اَ مُجازاتی که چَوون حَقَه ویگِرِن.

پولُسی عذابِن

¹⁶ هَنی بَواتیم: کسی مِن بیفَهم مَزونه. امّا اَگم اِنتَه بَکَردیرون نی، حداقل ایلَه بیفَهمَه آدَمی شیوار مِن قبول بِکَرَه، تا از نی بِشام روکَتِه اِفتخار بِکَرِم.

¹⁷ وختی از اِنتَه رَه اِطمینانی نَه چِمِن اِفتخاری کا بَواتیم، خِداوندی طرفی کا نِواجِم، بَلکَم نَفهمی کا بَواتیم.

¹⁸ چوم که وِر کَسِن آدَمی یَه فیکرون نَه اِفتخار بَکَردین، از نی اِفتخار بَکَردیم.

¹⁹ نِه که اِشتَن عاقلیرونه، اِمی واسی شِمَه نَفَهمون، شادی نَه تحمل بَکَردیرون!

²⁰ چوم که اَگم ایی نفر شِمَه اِشتَن نوکر وَج آکَرِه، یا شِمَه ویبَرِه، یا شِمَه کا سوءاِستفاده بَکَرِه، یا اِشتَن شِمَه کا سَرتَر بِزونه، یا شِمَه دیمی کا سیله بِژَنه، تاو بواَردیرون.

²¹ شَرمندگی نَه بَسی بوآجِم که اَمَه اِم کاری را وِر ضَعیف بیمونَه! امّا اَگم کسی جُرئت بِدارِه چیی را اِفتخار بِکَرَه - از هَنی نادونون شیوار گَف ژَنِم - از نی اِشتَن جُرئت بَدایم اَ جریانی را اِفتخار بِکَرِم.

²² اَوِن عِبرانی‌ اینه؟ از نی اِستیمَه! اَوِن اِسرائیلی‌ اینه؟ از نی اِستیمَه! اَوِن اِبراهیمی خِردَنی نه؟ از نی اِستیمَه!

²³ اَوِن مسیح نوکَری نَه؟ از اَوون کا وِرتَریمَه، تورون شیوار گَف ژَنِم! گِردی کا سختتَر کار کَردَمَه، وِرتَر زندان شَه ایمَه، گِردی کا وِرتَر لِس هَردَمَه، وِر مرگی مَزَه چَشَمَه.

²⁴ پینج کَرَه یهودیون کا، سی و نِه ضربه شِلاق هَردِمَه.

²⁵ سِه کَرَه مِن لِس ژَندِشونَه، ایی کَرَه سِنگسار بیمَه، سِه کَرَه سَفری کا چِمِن کَشتی غرق آبَه، ایی روز و ایی شَو دریا کا مَندیمَه.

²⁶ اَ سَفرونی کا که پِشتِ سَرهم بَشیم، رِوارون خطری کا، دِزدون خطر؛ خطری که چِمِن اِشتَن قومی طرفی نَه داریم، غِیریَهودیون طرفی نَه خطر؛ خطر شهری کا، خطر ویاوونی کا، خطر دریا کا؛ خطری که دوروعَ واجَه بِرااون طرفی نَه داریم؛

²⁷ بَرک کار کَردَمَه و سختی کَشَمَه، چِه شَوونی که بی‌خواوی کَشَمَه؛ وِشیی و تِشیی کا، وِر وَختون بی غذا مَندَه ایمَه، سَردَه هواکا مَندبیمَه و لُخت و سُخت بیمَه.

²⁸ چِمون گِردی غِیراز، گِردِ کلیسااون را نِگرانی بارَه که چِمِن دوشی سَری کا سنگینی بَکَردی.

²⁹ کیَه که ضَعیف آبو و از ضَعیف آمَبوم؟ کیَه که بِلَغزه و از مَسوجِم؟

³⁰ اَگم بَسی اِفتخار بِکَرِم، اَ چیونی را اِفتخار بَکَردیم که چِمِن ضَعفی نیشون بَدای.

³¹ خِدا، خِداوندْ عیسی دَده، که اَئی تا اَبَد شُکر بَکَردیم، بَزنی که از دوروع نِواجِم.

³² دَمشقی شهری کا، اَ حاکِم که حارِث پاُتشا، اَیی مُعییَن کَردِشَه، دَمِشقی شهری را نگهبونونی نوشَه تا مِن دَستگیر بِکَرِن.

³³ امّا مِن نوشونه ایلَه زنبیلی دیلَه کا، و ایلَه بَرجَه ای نَه که شهری حصاری دیلَه کا بَه، مِن ویسا آکَردِشونه جیر و اِنتَه بَه که از چَیی دَسی کا دَوشتیمَه.